សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្រោយភាពរអាក់រអួលនៃដំណើរការសាងសង់ដោយសារផលប៉ះពាល់បណ្តាលមកពីជំងឺកូវីដ១៩អស់រយៈពេលជិត២ឆ្នាំ គម្រោងសាងសង់អាកាសយានដ្ឋានអន្តរជាតិសៀមរាប-អង្គរ បានពន្យារពេលមកបញ្ចប់ត្រឹមខែតុលា ឆ្នាំ២០២៣ ខាងមុខនេះ ដែលការពន្យារនេះ គឺអូសបន្លាយលើសរយៈពេលក្នុងគម្រោងចំនួន ៧ខែ។
ឯកឧត្តម តឹករ៉េត សំរេច រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការទីស្តីការគណៈរដ្ឋមន្ត្រី ដែលមានតួនាទីជាប្រធានគណៈកម្មការតម្រង់ទិសសម្រាប់ការសាងសង់អាកាសយានដ្ឋានអន្តរជាតិសៀមរាប-អង្គរបានឱ្យដឹងថា តាមផែនការនៃការសាងសង់គឺនៅត្រឹមដំណាច់ឆ្នាំ ២០២២ ឆាប់ៗខាងមុខ គម្រោងនេះអាចនឹងសម្រេចបានដល់៧០% ហើយនៅត្រឹមខែមីនា ឆ្នាំ២០២៣ សង្ឃឹមថាអាចបញ្ចប់បានដល់ ៩០% មុននឹងដាក់ឱ្យដំណើរការនៅខែតុលាឆ្នាំ២០២៣។
ឯកឧត្តមបានបញ្ជាក់ទៀតថា ៖
“គម្រោងនេះមានការរអាក់រអួលខ្លះនៅក្នុងឆ្នាំដំបូង ឆ្នាំ២០២០-២០២១ ប៉ុន្តែរាជរដ្ឋាភិបាលបានគិតគូរ និងផ្ដល់រយៈពេលសាងសង់បន្តជូនក្រុមហ៊ុន ២ឆ្នាំទៀត រហូតដល់ឆ្នាំ២០២៣។ រីឯការរៀបចំម្ដងទៀតនៃផែនការសាងសង់ នឹងត្រូវប្ដូរទិសដៅទៅរកខែតុលា ឆ្នាំ២០២៣ វិញ ដែលពេលវេលានេះសមស្របទៅនឹងការចាត់ចែងផលប៉ះពាល់ពីកូវីដ១៩ បានរួចរាល់ និងឈានទៅអនុវត្តនូវកម្មវិធីសាងសង់បន្ត”
ទោះបីយ៉ាងណាក៏ដោយ ភាពយឺតយ៉ាវនេះក៏មានចំណែកខ្លះបណ្តាលមកពីកង្វះសម្ភារៈ ដោយសារឧបករណ៍ទាំងអស់ត្រូវនាំចូលពីប្រទេសចិន ខណៈពេលដែលប្រទេសចិនស្ថិតនៅក្នុងការអនុវត្តផែនការ Zero Covid នៅឡើយ។
ឯកឧត្តម តឹករ៉េត សំរេច ក៏បានមានប្រសាសន៍បន្ថែមពីអត្ថប្រយោជន៍ដែលកម្ពុជានឹងទទួលបានបន្ទាប់ពីព្រលានយន្ដហោះមួយនេះដាក់ឱ្យដំណើរជាផ្លូវការថា ៖
“គម្រោងនេះនឹងក្លាយជាព្រលានយន្ដហោះធំទី១ នៅកម្ពុជា ! ហើយដូចយើងដឹងហើយថា អង្គរវត្តគឺជាគោលដៅទេសចរណ៍របស់ភ្ញៀវលើពិភពលោក បើទេសចរ មក ច្បាស់ជាមកតាមយន្ដហោះ។ ថ្វីត្បិតតែយើងមានច្រកព្រំដែនសំខាន់តាមផ្លូវគោកពីរទៀតគឺវៀតណាម និងថៃ តែ ៨០ ទៅ៩០ ភាគរយគឺតាមយន្ដហោះ”
ជាមួយនឹងការកសាងហេដ្ឋារចនាសម្ព័ន្ធជាច្រើន អាកាសយានដ្ឋានកម្រិតអន្តរជាតិមួយនេះ នឹងក្លាយជាកន្លែងដ៏សំខាន់ដែលអាចអនុញ្ញាតឱ្យយន្ដហោះ ធ្វើការហោះត្រង់ពីតំបន់ផ្សេងៗនៃពិភពលោកមកកាន់សៀមរាបតែម្ដង និងអាចនាំឱ្យភ្ញៀវទេសចរធ្វើដំណើរមកកាន់សៀមរាប កាន់តែមានភាពងាយស្រួល។ ក្នុងពេលជាមួយគ្នានេះ ឯកឧត្តមក៏បានដាក់ការរំពឹងថា ភាពងាយស្រួលនេះនឹងក្លាយជាកត្តាសំខាន់ក្នុងការទាក់ទាញភ្ញៀវជាអ្នកទេសចរ និងភ្ញៀវជាវិនិយោគិនមកកម្ពុជាកាន់តែច្រើនបន្ថែមទៀត។
គួររំលឹកថា អាកាសយានដ្ឋានអន្តរជាតិថ្មីនេះទទួលបានសិទ្ធិវិនិយោគដោយក្រុមហ៊ុនអាកាសយានដ្ឋានអន្តរជាតិសៀមរាប (AIAI) ដែលជាបុត្រសម្ព័ន្ធរបស់ក្រុមហ៊ុន Yunnan Investment Holdings របស់ចិនក្នុងចំនួនទឹកប្រាក់ ៨៨០លានដុល្លារ និងត្រូវបានសាងសង់លើផ្ទៃដី ៧៥០ ហិកតា ដែលបានផ្ដើមបើកការដ្ឋានសាងសង់កាលពីខែមីនា ឆ្នាំ២០២០ ហើយគ្រោងបញ្ចប់នៅខែមីនា ឆ្នាំ២០២៣ ដោយមានរយៈពេលសរុប ៣៦ខែ ប៉ុន្តែដោយសារវិបត្តិជំងឺកូវីដ គម្រោងនេះបានអូសបន្លាយពេលរហូតដល់ខែតុលា ឆ្នាំ២០២៣ ទើបបញ្ចប់ការសាងសង់ទាំងស្រុង និងដាក់ឱ្យដំណើរការជាផ្លូវការ៕
ជីវប្រវត្តិ: ជានិស្សិតនៃសាលកវិទ្យាល័យភូមិន្ទភ្នំពេញ ដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍។ បច្ចុប្បន្ន ជាអ្នករាយការណ៍ព័ត៌មាននៅ AMS Economy ។
របាយការណ៍ថ្មីៗ
មើលទាំងអស់ ➧
អ្នកជំនាញ ៖ ចង់មានសុវត្ថិភាពគណនីហិរញ្ញវត្ថុគប្បីបង្កើនប្រសិទ្ធភាពលេខសម្ងាត់ឱ្យបានរឹងមាំ
• 09/04/2026
ព័ត៌មានទូទៅ
មើលទាំងអស់ ➧
កម្មវិធីពិសេសរបស់ AMS ECONOMY
ព័ត៌មានសង្ខេប
Account
Security
Favourite Content