ភ្នំពេញ ៖ TVET សំដៅទៅលើជំនាញបច្ចេកទេសវិជ្ជាជីវៈ ដែលរាជរដ្ឋាភិបាលកម្ពុជាបច្ចុប្បន្ន​កំពុង​តែជំរុញ​ធនធាន​ផ្នែកនេះឱ្យបានកាន់តែច្រើន។ ការមានធនធានជំនាញច្រើន គឺស្មើនឹងការជួយដល់សេដ្ឋកិច្ច​ជាតិឱ្យកាន់តែប្រសើរតាមរយៈការទាក់ទាញវិនិយោគិនធំៗឱ្យមកបណ្ដាក់ទុននៅក្នុងស្រុក​ និងការ​បង្កើតការងារដល់ពលរដ្ឋគ្រប់ស្រទាប់។

ជាមួយគ្នានេះ ដើម្បីជំរុញធនធានមនុស្សឱ្យងាកទៅចាប់យកជំនាញ រាជរដ្ឋាភិបាលបានបង្កើតនូវកម្មវិធីមួយ គឺកម្មវិធីបណ្ដុះបណ្ដាលជំនាញ បច្ចេកទេស វិជ្ជាជីវៈ ដោយឥតគិតថ្លៃដល់យុវជនដែលមកពី​គ្រួសារងាយរងហានិភ័យចំនួន ១លាន ៥សែននាក់ផងដែរ។

លោក តេង នី គឺជាអតីតសិស្សដែលបានបញ្ចប់ការសិក្សាលើជំនាញឆុងកាហ្វេពីវិទ្យាស្ថាន​សហគ្រិន​ភាពនវានុវត្តន៍កាលពីខែវិច្ឆិកា ឆ្នាំ២០២៣កន្លងទៅ។ ក្រោយបានទទួលការបណ្ដុះបណ្ដាលដោយឥតគិតថ្លៃចំនួន ៣ខែរួចមក លោកបានបើកអាជីវកម្មកាហ្វេចល័តមួយដែលរហូតមកដល់ពេលនេះគឺទទួលបានជោគជ័យគួរសម។ ប៉ុន្តែទោះជាយ៉ាងណា​ មុនពេលរៀនជំនាញនេះ លោក តេង នី បានអះអាងថា លោក និងគ្រួសារធ្លាប់ជួបនូវវិបត្តិហិរញ្ញវត្ថុយ៉ាងធ្ងន់ធ្ងរ។ ធ្ងន់ធ្ងរ ព្រោះការងាររបស់លោកបានទទួលរងផលប៉ះពាល់​ចេញពីជំងឺកូវីដ១៩ ខណៈពេលដែលលោកមិនមានជំនាញអ្វីផ្សេង។

លោក តេង នី បានរៀបរាប់យ៉ាងដូច្នេះថា ៖

«ពីមុនសូម្បីតែមធ្យោបាយធ្វើដំណើរក៏លំបាកដែរ តែបច្ចុប្បន្នរបរនេះទោះជាមិនមានអ្វីធំដុំ តែអាចដោះស្រាយជីវភាពប្រចាំថ្ងៃបាន​ ទោះដោះ​មិនបាន១០០% ប៉ុន្តែក៏គ្រាន់បើជាងមុនច្រើនដែរ។»

ដោយខ្លួនជាអ្នកនិយមចូលចិត្តហូបកាហ្វេផងនោះ លោក តេង នី បានចាប់ផ្ដើមរៀបចំផែនការលក់កាហ្វេនេះ ចាប់តាំងពីពេលដែលលោកកំពុងស្ថិតក្នុងការបណ្ដុះបណ្ដាលមកម្លេះ ហើយដើម្បី​អាចឈរជើងលើទីផ្សារបាន លោកបានកែច្នៃចេញជារសជាតិប្លែកៗ និងបានស្វះស្វែងរករសជាតិ​កាហ្វេប្រចាំរបស់ខ្លួនតែម្ដង។

បើតាមការឱ្យដឹងពីបុរសវ័យ៤០ ស្ដើងរូបនេះ គ្រាប់កាហ្វេគឺលោកលាយបញ្ចូលគ្នារវាងគ្រាប់កាហ្វេល្បីៗនៅក្នុងតំបន់ ដើម្បីបង្កើតជារសជាតិពិសេសរបស់ខ្លួនមួយ ដែលរហូតមកដល់ពេលនេះ ការលក់របស់លោកគឺកាក់កបគួរសម ដោយក្នុងមួយថ្ងៃលោកអាចលក់បានចន្លោះពី ៣០ ទៅ ៤០កែវ។ រីឯវត្ថុធាតុដើមផ្សេងៗ ក៏លោកធ្វើដោយខ្លួនឯងដែរ ពោលគឺលោកទិញត្រឹមតែគ្រាប់កាហ្វេ ទឹកដោះគោស្រស់ និងទឹកដោះគោខាប់ប៉ុណ្ណោះ។

ជារឿយៗ ម៉ូតូរបស់លោកដែលបានច្នៃដាក់ធ្នើមួយពីក្រោយ តែងចល័តទៅតាមទីតាំងនានាជុំវិញរាជធានីភ្នំពេញ ហើយក៏មានថ្ងៃខ្លះលោកក៏ទៅលក់តាមការកម្មង់របស់ភ្ញៀវផងដែរ។

នៅក្នុងឱកាសផ្តល់ព័ត៌មានពីអាជីវកម្មខ្នាតតូចមួយនេះ លោកក៏បានបញ្ជាក់ប្រាប់ពីលក្ខខណ្ឌនៃការចុះឈ្មោះចូលរៀនជំនាញ វិជ្ជាជីវៈផងដែរថា គឺមិនជាមានភាពស្មុគស្មាញអ្វី​នោះទេ ផ្ទុយទៅវិញ សិស្សដែលបានចូលរៀនវគ្គបណ្ដុះបណ្ដាលជំនាញនេះអាចទទួលបាន​នូវអត្ថ​ប្រយោជន៍ជាច្រើន ជាពិសេសគឺបង្កើតជំនាញមួយសម្រាប់ការរស់នៅ​បានពេញមួយ​ជីវិតតែម្ដង។

ចេញពីបទពិសោធន៍ទាំងនេះ លោកក៏បានណែនាំដល់អ្នកផ្សេងទៀត ​ដែលចង់ស្វែងការងារជាក់លាក់មួយ គួរតែជ្រើសរើសរៀនជំនាញ ដែលមិនអស់ប្រាក់ ហើយថែមទាំងមានការងារសមស្របមួយផងដែរ៕