សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ផែសមុទ្រនៅទីក្រុង Darwin ដែលស្ថិតនៅដែនដីភាគខាងជើងនៃប្រទេសអូស្ត្រាលី ត្រូវបានលក់សិទ្ធិកាន់កាប់ និងគ្រប់គ្រងទៅឲ្យក្រុមហ៊ុន Landbridge group របស់ចិនក្នុងរយៈពេលដល់ទៅ៩៩ឆ្នាំ ប៉ុន្តែពេលនេះ នាយករដ្ឋមន្ត្រីអូស្ត្រាលី បានសម្រេច និងប្តេជ្ញាថា នឹងទិញយកសិទ្ធិគ្រប់គ្រងផែសមុទ្រមួយនេះយកមកស្ថិតនៅក្រោមរដ្ឋាភិបាលវិញ បើទោះបីជាទទួលរងនូវការគំរាមកំហែងពីរដ្ឋាភិបាលចិនក៏ដោយ។
យោងតាមការចេញផ្សាយរបស់កាសែត AFP បានឲ្យដឹងថា នាយករដ្ឋមន្ត្រីអូស្ត្រាលី លោក Anthony Albanese បានសន្យាថា ដាច់ខាតត្រូវតែទិញយកសិទ្ធិកាន់កាប់ និងគ្រប់គ្រងផែសមុទ្រដ៏មានសក្តានុពលមួយនេះត្រឡប់មកជាប្រយោជន៍របស់អូស្ត្រាលីវិញឱ្យខាងតែបាន។
តបទៅនឹងការប្តេជ្ញារបស់រដ្ឋាភិបាលអូស្ត្រាលី អគ្គរដ្ឋទូតចិនប្រចាំនៅអូស្ត្រាលី បានចេញមុខមកព្រមានចំៗថា រដ្ឋាភិបាលទីក្រុងប៉េកាំងនឹងមិនឈរអោបដៃមើលអូស្ត្រាលីក្នុងការធ្វើសកម្មភាពចាប់បង្ខំណាមួយដើម្បីទទួលបានសិទ្ធិកាន់កាប់ទីតាំងផែនេះដែលអាចប៉ះពាល់ប្រយោជន៍ដល់ក្រុមហ៊ុនរបស់ចិននោះទេ។
លោកអគ្គរដ្ឋទូតចិន Xiao Qian បានថ្លែងប្រាប់ក្រុមអ្នកកាសែតរបស់អូស្ត្រាលីកាលពីថ្ងៃពុធសប្តាហ៍នេះថា៖
«ប្រសិនបើក្រុមហ៊ុន Landbridge ត្រូវបង្ខំចិត្តដកខ្លួនចេញពីកុងត្រាជួលផែនៅ Darwin មែននោះ ប្រាកដណាស់ ចិនក៏នឹងត្រូវប្រើប្រាស់កាតព្វកិច្ចដើម្បីការពារប្រយោជន៍ជូនក្រុមហ៊ុនរបស់ចិននោះដូចគ្នាដែរ។ នេះគឺជាជំហររបស់យើង…ពួកយើងនឹងរង់ចាំពេលវេលាមកដល់ដើម្បីអាចថ្លែងអំពីអ្វីដែលយើងត្រូវថ្លែង និងធ្វើអ្វីដែលយើងត្រូវធ្វើ។ ជំហរបស់រដ្ឋាភិបាលចិន គឺចាំបាច់ការពារអត្ថប្រយោជន៍របស់ក្រុមហ៊ុនទាំងឡាយរបស់ចិនដោយស្របតាមផ្លូវច្បាប់»។
លោកអគ្គរដ្ឋទូតក៏បានព្រមានខ្លាំងៗទៀតថា ការសម្រេចចិត្តណាមួយក្នុងការត្រឡប់ទៅយកសិទ្ធិកាន់កាប់ផែ Darwin វិញ វានឹងធ្វើឲ្យប៉ះពាល់ជាមិនខានទៅដល់សកម្មភាពវិនិយោគនិងកិច្ចសប្រតិបត្តិការទាំងអស់របស់ក្រុមហ៊ុនចិនដែលមានវត្តមាននៅក្នុងប្រទេសអូស្ត្រាលី ជាពិសេសនៅទីក្រុង Darwin តែម្តង។ វាក៏នឹងធ្វើឲ្យប៉ះពាល់ខ្លាំងដល់អត្ថប្រយោជន៍របស់អូស្ត្រាលីដូចគ្នាដែរ។
យ៉ាងណាក្តី កន្លងមក លោកនាយករដ្ឋមន្ត្រីអូស្ត្រាលី Albanese ធ្លាប់បានបញ្ជាក់ច្បាស់ហើយថា រដ្ឋាភិបាលរបស់លោកបានធ្វើការសម្រេចចិត្តយ៉ាងច្បាស់ហើយ ដែលនឹងមិនយល់ព្រមឲ្យផែសមុទ្រជាយុទ្ធសាស្ត្រមួយនេះត្រូវបានកាប់កាប់ដោយមិនបានផ្តល់ផលប្រយោជន៍មកឲ្យពលរដ្ឋ និងប្រទេសអូស្ត្រាលីនោះឡើយ។
លោកនាយករដ្ឋមន្ត្រីបានបញ្ជាក់ថា ៖
«ពួកយើងបានប្តេជ្ញាចិត្តរួចមកហើយថា ត្រូវតែធានាឲ្យបាននូវសិទ្ធិកាន់កាប់ផែ Darwin មកដល់ដៃជនជាតិអូស្ត្រាលីវិញ ពីព្រោះថាវាគឺជាអត្ថប្រយោជន៍សម្រាប់ជាតិ»។
គួរឲ្យដឹងដែរថា ទីក្រុង Darwin លាតសន្ធឹងនៅក្បែរទៅនឹងបណ្តាប្រទេសក្នុងតំបន់អាស៊ីមួយចំនួន ហើយទីតាំងនេះក៏ត្រូវបានប្រើប្រាស់ជាមូលដ្ឋានទ័ពជើងទឹករបស់សហរដ្ឋអាម៉េរិកផងដែរ៕
Account
Security
Favourite Content