ជាធម្មតា ការដាំដុះដំណាំមិនត្រឹមតែដុះលូតលាស់នូវដំណាំដែលត្រូវបានដាំនោះទេ វាក៏មានដុះនូវរុក្ខជាតិដទៃទៀតក្បែរៗនោះ ដែលខ្លះមានប្រយោជន៍ និងខ្លះទៀតជារុក្ខជាតិចង្រៃអាចបង្កបញ្ហាដល់ការលូតលាស់របស់ដំណាំ។ ពាក់ព័ន្ធទៅនឹងការដុះលូតលាស់នូវប្រភេទរុក្ខជាតិចង្រៃនេះ មានឯកសារមួយបានណែនាំអំពីវិធានការសំខាន់ៗក្នុងការគ្រប់គ្រងរុក្ខជាតិចង្រៃដែលកសិករគួរយល់ដឹង និងអនុវត្តដើម្បីទទួលបានទិន្នផលដំណាំកាន់តែខ្ពស់។

បើតាមឯកសារផ្សព្វផ្សាយរបស់ក្រសួងកសិកម្ម រុក្ខាប្រមាញ់ និងនេសាទ បានបង្ហាញថា រុក្ខជាតិចង្រៃអាចបង្កជាបញ្ហាដក់ផលិតកម្មដំណាំចំការ ដោយវាអាចធ្វើឱ្យទិន្នផលដំណាំថយចុះ តាមរយៈការប្រជែងស្រូបយកសារធាតុសំខាន់ៗសម្រាប់លូតលាស់ ដូចជា ទឹក អាហារូបត្ថម្ភ និងពន្លឺ បន្ថែមពីលើនេះ វាក៏ធ្វើឱ្យមានការពិបាកក្នុងការប្រមូលផលដំណាំ ដោយគ្រាប់របស់វាមួយចំនួនលាយឡំជាមួយគ្រាប់ដំណាំ ធ្វើឱ្យគុណភាព និងតម្លៃនៃគ្រាប់ថយចុះ។ ដូច្នេះ ដើម្បីគ្រប់គ្រងកត្តាចង្រៃទាំងនោះ អ្នកជំនាញបានលើកឡើងនូវវិធីសាស្ត្រជាច្រើន ដោយរាប់តាំងពីវិធីប្រពៃណីដូចជាការកម្ចាត់ដោយដៃ ការរៀបចំដី និងទុករុក្ខជាតិចង្រៃក្នុងចំការ។ ដោយឡែក កំណើននៃតម្លៃកម្លាំងពលកម្ម គ្រឿងយន្ត និងប្រេងឥន្ធនៈ អាចនឹងមានការផ្លាស់ប្ដូរច្រើនជាងមុន ដោយប្រើថ្នាំកម្ចាត់ស្មៅ និងបន្ថយការភ្ជួររាស់នៅថ្ងៃអនាគត។

ក្រៅពីនេះ គេក៏មានវិធានការគ្រប់គ្រងចម្រុះ ជាពិសេសកសិករនៅតំបន់ខ្ពង់រាប ដែលច្រើនតែមានបញ្ហាទឹកសម្រាប់ស្រោចស្រពដំណាំ ការគ្រប់គ្រងរុក្ខជាតិចង្រៃឱ្យបានល្អ គឺពិតជាសំខាន់ចៀសវាងវាស្រូបយកសំណើមកក្នុងដីអស់ ដោយវិធានការចម្រុះមានរូបភាពគ្រប់ជម្រើសទាំអស់ដែលអាចធ្វើបាន ធ្វើយ៉ាងណារក្សាទុករុក្ខជាតិចង្រៃឱ្យមានចំនួនតិច និងការពារកុំឱ្យវាដាក់គ្រាប់ពេញមួយវដ្តជីវិតដំណាំ។ យ៉ាងណាមិញ រុក្ខជាតិចង្រៃខ្លះក៏មានប្រយោជន៍ដូចជាធ្វើជាដំណីសត្វ ឬប្រើជាបន្លែបាន ដែលកសិករអាចយកមកប្រើប្រាស់ក្នុងជីវភាពប្រចាំថ្ងៃបាន។

ការធ្វើជាចំណីសត្វនេះដែរ ចំពោះប្រភេទស្មៅឯកវត្ស អាចឱ្យសត្វស៊ីដោយផ្ទាល់ ឬច្រូតកាត់ដោយដៃធ្វើជាចំណីសត្វបាន។ កសិករក៏ត្រូវប្រុងប្រយ័ត្នទាក់ទងនឹងការពិនិត្យមើលគ្រាប់ដំណាំសម្រាប់ដាំដុះ គឺស្អាតល្អ គ្មានលាយគ្រាប់រុក្ខជាតិដទៃ មានភាគរយដំណុះខ្ពស់ កូនដំណាំថ្លោសមានកម្លាំង ដែលអាចដុះលូតលាស់លឿន និងប្រកួតប្រជែងបានល្អជាមួយនឹងរុក្ខជាតិចង្រៃ។

ដោយឡែក សម្រាប់ការឱ្យសត្វស៊ីក្នុងបរិមាណច្រើន ឬការដុតចោល ជាញឹកញាប់ត្រូវបានគេប្រើដើម្បីគ្រប់គ្រងរុក្ខជាតិចង្រៃ និងធ្វើឱ្យមានភាពងាយស្រួលក្នុងការភ្ជួររាស់ដី ប៉ុន្តែវាក៏ធ្វើឱ្យខូចផលប្រយោជន៍មួយចំនួនដូចជា ការកាត់បន្ថយគម្របដី សីតុណ្ហភាពដីស្រទាប់លើកើនឡើង និងសំណើមក្នុងដីថយចុះ។ ចំពោះការដុត ធ្វើឱ្យសារធាតុសរីរាង្គរបស់ដីថយចុះ ធ្វើឱ្យដីខ្សោះជីជាតិ និងបង្កើនការហូរច្រោះ។ ដូច្នេះ ដើម្បីគ្រប់គ្រងរុក្ខជាតិចង្រៃឱ្យទាន់ពេលវេលា កសិករគួរមានទម្លាប់ក្នុងការភ្ជួររាស់ដី និងរៀបចំថ្នាលដំណាំ ក៏ដូចជាមានការប្រើថ្នាំសម្លាប់ស្មៅផងដែរ ក្នុងករណីប្រភេទដីដែលមានភាពផុយស្រួយ មានគម្របដីស្រាប់។ ទន្ទឹមគ្នានេះដែរ ការរក្សាទុកកាកសំណ់ល់ដំណាំនៅតាមចំការបន្ទាប់ពីប្រមូលផលរួច ក៏ជាវិធីមួយជួយទប់មិនឱ្យរុក្ខជាតិចង្រៃដុះលូតលាស់បានដែរ ដូចជាប្រភេទចំបើង ដែលអាចជួយរក្សារសំណើមដីផង និងបន្ថយសីតុណ្ហភាពក្នុងដីផងដែរ៕