សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តំបន់ប៉ែកខាងត្បូងរាជធានីភ្នំពេញ កាន់តែមានសក្ដានុពល និងភាពទាក់ទាញលើការវិនិយោគក្នុងវិស័យអចលនទ្រព្យ ពាណិជ្ជកម្ម លំនៅឋាន ជាពិសេស ក្រោយពេលដែលសមិទ្ធផលធំៗចំនួន៣ បានលេចជារូបរាង និងដាក់ដំណើរការក្នុងឆ្នាំ២០២៥នេះ ។ តើសមិទ្ធផលធំៗទាំងបីនោះ មានអ្វីខ្លះ ហើយនឹងជួយលើកកម្ពស់សក្ដានុពលដល់ការអភិវឌ្ឍក្នុងតំបន់នោះបែបណា ?
គម្រោងធំៗនៅតំបន់ប៉ែកខាងត្បូងរាជធានីភ្នំពេញ ដែលបានដាក់ដំណើរការមុនគេគឺស្ពានអាកាសមរតកតេជោ ដែលជាស្ពានអាកាសខ្ពស់ជាងគេនៅរាជធានីភ្នំពេញ និងមានកម្ពស់២ជាន់ ត្រូវបានសម្ពោធដាក់ឱ្យប្រើប្រាស់ជាផ្លូវការកាលពីថ្ងៃទី០៧ ខែមេសា ឆ្នាំ ២០២៥ កន្លងទៅនេះ ។ ស្ពាននេះបានតភ្ជាប់ពីផ្លូវព្រះមុនីវង្សទៅកាន់មហាវិថីសម្ដេចអគ្គមហាសេនាបតីតេជោ ហ៊ុន សែន ឬហៅថាផ្លូវ ៦០ម៉ែត្រ និងភ្ជាប់ពីផ្លូវកងយោធពលខេមរភូមិន្ទ ( ២៧១) ទៅស្ពានអាកាសក្បាលថ្នល់ ។
ស្ពាននេះដែរ ត្រូវបានរាជរដ្ឋាភិបាលចំណាយថវិកាប្រមាណជិត ៣៧លានដុល្លារអាម៉េរិក និងជាស្ពានដែលមានផ្លូវខ្វាត់ខ្វែងច្រើនជាងគេ ក្នុងចំណោមស្ពានអាកាសទាំងអស់ក្នុងរាជធានីភ្នំពេញ និងបានរំដោះចរាចរណ៍បានច្រើននៅទីតាំងនោះ ។
សមិទ្ធផលធំមួយទៀត គឺស្ពានសម្ដេចមហាបវរធិបតី ហ៊ុន ម៉ាណែត ត្រង់ចំនុចប្រសព្វផ្លូវ៦០ម៉ែត្រ និងផ្លូវជាតិលេខ២ ។ ស្ពាននេះ មានសារសំខាន់ណាស់ក្នុងការរំដោះចរាចរណ៍នៅទីតាំងនោះ ដើម្បីសម្រួលដល់ការធ្វើដំណើររបស់ពលរដ្ឋ ជាពិសេសអ្នកដំណើរដែលត្រូវឆ្លងកាត់ទៅកាន់អាកាសយានដ្ឋានអន្តរជាតិតេជោ ។ មកដល់ពេលនេះ ស្ពានអាកាសនេះ នៅមិនទាន់សាងសង់ហើយរួចរាល់ទាំងស្រុងទេ ប៉ុន្តែអាជ្ញាធរបានអនុញ្ញាតឱ្យអ្នកដំណើរឆ្លងកាត់លើស្ពាននេះជាបណ្តោះអាសន្ន។ ស្ពាននេះដែរ បានចំណាយថវិកាប្រមាណជាង១៦លានដុល្លារអាម៉េរិក និងជាប្រភេទស្ពានអាកាសភ្លោះ ។
សមិទ្ធផលធំជាងគេមួយទៀតក្នុងតំបន់ប៉ែកខាងត្បូងដែលបានដាក់ដំណើរការក្នុងឆ្នាំ២០២៥នេះ គឺគម្រោងអាកាសយានដ្ឋានអន្តរជាតិតេជោ ។ គម្រោងនេះ បានធ្វើប្រតិបត្តិការកាលពីថ្ងៃទី០៩ ខែកញ្ញា ឆ្នាំ ២០២៥ ដែលទទួលបានការសាទរពីមជ្ឈដ្ឋានជាតិនិងអន្តរជាតិ ។ អាកាសយាដ្ឋាននេះ នឹងនាំកម្ពុជាឱ្យពិភពលោកបានស្គាល់កាន់តែច្បាស់ ដោយអាកាសមួយនេះនឹងអនុញ្ញាតឱ្យយន្តហោះខ្នាតធំចុះចត និងផ្ទេរជើងហោះហើរទៅកាន់គោលដៅផ្សេងៗទៀត ។
គម្រោងដ៏ធំមួយនេះបានចំណាយថវិកាប្រមាណ ១.៥០០លានដុល្លារអាម៉េរិក ក្រោយការចាប់ផ្ដើមសាងសង់កាលពីអំឡុងខែមិថុនា ឆ្នាំ២០២០ ស្ថិតនៅស្រុកកណ្ដាលស្ទឹង ខេត្តកណ្ដាល និងផ្នែកខ្លះនៃស្រុកបាទីខេត្តតាកែវ លើទំហំផ្ទៃដីសរុបប្រមាណ ២.៦០០ហិកតា ។
តាមរយៈសមិទ្ធផលនិងគម្រោងធំៗទាំងបីខាងលើនេះ បានធ្វើឱ្យតំបន់ប៉ែកខាងត្បូងកាន់តែមានភាពទាក់ទាញចំណាប់អារម្មណ៍ពីសំណាក់វិនិយោគិនក្នុងនិងក្រៅប្រទេស ដោយរំពឹងតំបន់ប៉ែកខាងត្បូងនឹងកាន់តែមានការអភិវឌ្ឍបន្ថែមទៀត ។
អ្នកនាង អាន សុធីតា អគ្គនាយិកាក្រុមហ៊ុន PropNex Cambodia បានមានប្រសាសន៍ថា សមិទ្ធផលធំៗដែលលេចរូបរាងឡើងនៅប៉ែកខាងត្បូងរាជធានីភ្នំពេញ នឹងកាន់តែទាក់ទាញការវិនិយោគបន្ថែម ជាពិសេសទៅលើម្រោងលំនៅឋាន និងពាណិជ្ជកម្ម ។ នៅប៉ែកខាងត្បូងរាជធានីភ្នំពេញ យើងមានគម្រោងអភិវឌ្ឍន៍លំនៅឋានជាច្រើនទាំងលំនៅឋានតម្លៃមធ្យម និងលំនៅឋានតម្លៃខ្ពស់ ។ ក្រៅពីនោះក៏មានគម្រោងអភិវឌ្ឍន៍ផ្សារទំនើប អគារពាណិជ្ជកម្ម និងសហគមន៍ធុរកិច្ចជាដើម ។
លោក ប៉ូ អ៊ាវគង់ អគ្គនាយកក្រុមហ៊ុន Advance ក៏បានឱ្យដឹងថា ទីណាមានការអភិវឌ្ឍហេដ្ឋារចនាសម្ព័ន្ធ ទីនោះនឹងមានការវិនិយោគ ។ គម្រោងធំៗបានលេចរូបរាងឡើង ធ្វើឱ្យគម្រោងតូចៗ និងលក្ខណៈឯកជនក៏ចាប់ផ្ដើមជាហូរហែ ដែលធ្វើឱ្យតំបន់ប៉ែកខាងត្បូងកាន់តែមានភាពមមាញឹក ។
លោកបន្តថា ការអភិវឌ្ឍហេដ្ឋារចនាសម្ព័ន្ធ អាចទាក់ទាញអ្នកវិនិយោគបានច្រើន ជាក់ស្ដែងនៅពេលរដ្ឋាភិបាលអភិវឌ្ឍន៍ហេដ្ឋារចនាសម្ព័ន្ធនៅតំបន់ណាមួយ អ្នកវិនិយោគតែងចូលទៅកាន់តំបន់នោះដើម្បីអនុវត្តគម្រោងរបស់ខ្លួនជាបន្តបន្ទាប់ ៕
Account
Security
Favourite Content