សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ដើម្បីបញ្ចប់វិវាទដីធ្លីក្នុងភូមិសាស្ត្រខេត្តដំបង ក្រសួងរៀបចំដែនដី នគរូបនីយកម្ម និងសំណង់ បានរួមគ្នាជាមួយនឹងក្រសួង ស្ថាប័ន ផ្សេងទៀត ដែលពាក់ព័ន្ធ បានបើកកិច្ចប្រជុំពិភាក្សារកដំណោះស្រាយឱ្យបានលឿនបំផុត ដែលប្រព្រឹត្តកាលពីថ្ងៃទី១០ ខែមេសា ឆ្នាំ២០២៥ ។ កិច្ចប្រជុំនេះ មានការចូលរួមពីក្រសួងយុត្តិធម៌ គណៈកម្មាធិការសិទ្ធិមនុស្សកម្ពុជា អាជ្ញាធរជាតិដើស្រាយវិវាទក្រៅប្រព័ន្ធតុលាការ គណៈកម្មការសុរិយោដីថ្នាក់ជាតិ អាជ្ញាធរជាតិដោះស្រាយទំនាស់ដីធ្លី ក្រុមការងាររាជរដ្ឋាភិបាលចុះមូលដ្ឋានខេត្តបាត់ដំបង និងរដ្ឋបាលខេត្តបាត់ដំបង ។
កិច្ចប្រជុំនេះបានដឹកនាំដោយឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងឯកឧត្តម កើត រិទ្ធ ឧបនាយករដ្ឋមន្ត្រី និងរដ្ឋមន្ត្រីក្រសួងយុត្តិធម៌ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបាត់ដំបង ។
បើតាមសេចក្ដីប្រកាសព័ត៌មានក្រោយកិច្ចប្រជុំនេះ បានបង្ហាញលទ្ធផល ដោយអង្គប្រជុំបានឯកភាព និងសម្រេចយកនីតិវិធីសុរិយោដី ដើម្បីចុះបញ្ជីដីបង្ហើយ និងដោះស្រាយបញ្ចប់វិវាទលើទីតាំងដីរដ្ឋ និងដីឯកជន ឈានទៅបង្កើតបរិយាកាសគ្មានវិវាទ ។
សេចក្ដីប្រកាសបានបង្ហាញនូវលទ្ធផលដីធ្លីដែលបានវាស់វែងរួចក្នុងភូមិសាស្ត្រខេត្តបាត់ដំបង ចំនួន ៦៧៥ ៤៤៣ក្បាលដី ចេញបណ្ណរួចបានចំនួន ៤៤៥ ១០៧បណ្ណ និងផ្ដល់បណ្ណជូនប្រជាពលរដ្ឋបានប្រមាណ ៤៤១ ៩៨៦បណ្ណ ។ បន្ទាប់ពី ក្រុមការងារនឹងបន្តជំរុញបញ្ចប់ការងារចុះបញ្ជីដីធ្លី មានលក្ខណៈជាប្រព័ន្ធ ទាំងដីរដ្ឋ និងដីឯកជនចំនួន ៣៩ ៩៧៣ក្បាលដី ដើម្បីបញ្ចប់វិវាទ និងហាមឃាត់រាល់ការចូលទន្ទ្រានកាន់កាប់លើដីរដ្ឋដោយខុសច្បាប់ ។
សេចក្ដីប្រកាសព័ត៌មានបានឱ្យដឹងថា ករណីវិវាទដីធ្លីសរុបក្នុងភូមិសាស្ត្រខេត្តបាត់ដំបងមានចំនួន ៦២៦ករណី ក្នុងនោះដោះស្រាយរួចបានចំនួន ៥៧៩ករណី ហើយអង្គប្រជុំក៏បានសម្រេចដោះស្រាយបិទបញ្ចប់បានចំនួន ៣៣ករណី បន្ថែមទៀត ដូច្នេះករណី នៅសល់ចំនួន១៤ករណីទៀតទូទាំងខេត្តបាត់ដំបង ។ ក្រៅពីនេះ នៅមានករណីសំណើសុំអន្តរាគមន៍របស់ប្រជាពលរដ្ឋចំនួន ៩ករណី ត្រូវបន្តសម្របសម្រួលដោះស្រាយដោយក្រុមការងារប្រតិបត្តិខេត្តបាត់ដំបង ដោយមានការចូលរួមពីគ្រប់យន្តការ គ្រប់ថ្នាក់ គ្រប់ផ្នែក និងអង្គភាពពាក់ព័ន្ធដើម្បីបិទបញ្ចប់ករណី វិវាទនេះ ។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានលើកឡើងថា ជំហានដំបូង ក្រុមការងារនឹងបញ្ចប់ការវាស់វែងដីធ្លីនៅទូទាំងប្រទេស ហើយបន្ទាប់មកចុះបញ្ជី និងចេញបណ្ណជូនពលរដ្ឋជាបន្តបន្ទាប់ ។ ទន្ទឹមគ្នានេះដែរ ក្រសួងរៀបចំដែនដី និងស្ថាប័នពាក់ព័ន្ធ ក៏នឹងពន្លឿនការដោះស្រាយវិវាទដីធ្លីឱ្យបានចប់សព្វគ្រប់នាពេលឆាប់ៗនេះដែរ ៕
Account
Security
Favourite Content