សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បានដាក់ផែនការក្នុងការបញ្ចប់ការវាស់វែង និងចុះបញ្ជីដីធ្លីទាំងស្រុងនៅអំឡុងខែមេសា ឆ្នាំ២០២៥ខាងនេះ បច្ចុប្បន្ន មានបណ្ដាខេត្តមួយចំនួន បានបញ្ចប់ការចុះបញ្ជីដីធ្លីទាំងស្រុង និងបណ្តាខេត្តមួយចំនួនទៀតកំពុងជំរុញ និងពន្លឿនការវាស់វែង និងចុះបញ្ជីបង្ហើយនៅក្នុងតំបន់របស់ខ្លួនផងដែរ ជាក់ស្ដែងខេត្តបាត់ដំបង ក៏បានត្រៀមក្នុងការបញ្ចប់ការចុះបញ្ជីដីធ្លីបង្ហើយនាពេលខាងមុខនេះ ។
នៅរសៀលថ្ងៃទី០៥ ខែកុម្ភ: ឆ្នាំ ២០២៥ ឯកឧត្តម សុខ លូ អភិបាលនៃគណៈអភិបាលខេត្តបាត់ដំបងបានដឹកនាំកិច្ចប្រជុំអំពីការពន្លឿនផែនការជំរុញការវាស់វែងដីធ្លីមិនទាន់បានចុះបញ្ជីមានលក្ខណៈជាប្រព័ន្ធក្នុងភូមិសាស្ត្រខេត្តបាត់ដំបង ការរៀបចំសណ្តាប់ធ្នាប់ ការកែលម្អសោភ័ណភាពក្រុង និងយុទ្ធនាការ “ផ្ទះមួយខ្នង ដើមឈើមួយដើម” ការរៀបចំដោះស្រាយសំណង់បណ្តោះអាសន្នមិនរៀបរយក្នុងក្រុងបាត់ដំបង ព្រមទាំងការរៀបចំដោះស្រាយទំនាស់ដីធ្លី ក្នុងឃុំបឹងប្រាំ ស្រុកបវេល និងនៅទីតាំងសំខាន់ៗផ្សេងទៀត នៅសាលប្រជុំសាលាខេត្តបាត់ដំបង ដោយមានការចូលរួមពីសំណាក់ លោក លោកស្រីប្រធានមន្ទីរអង្គភាពពាក់ព័ន្ធនានាក្នុងខេត្ត លោក លោកស្រី អភិបាលក្រុង ស្រុកទាំង១៤ និងអ្នកពាក់ព័ន្ធផ្សេងទៀតផងដែរ។
ឯកឧត្តម សុខ លូ បានណែនាំឪ្យលោកអភិបាលក្រុង ស្រុក បន្តខិតខំផ្សព្វផ្សាយពន្យល់ណែនាំអោយបងប្អូនប្រជាពលរដ្ឋជួយថែរក្សាដើមឈើដែលបានដាំរួចនាពេលកន្លងមកក្នុងយុទ្ធនាការ “ផ្ទះមួយខ្នង ដើមឈើមួយដើម” អោយបានល្អដោយចូលរួមក្នុងការស្រោចទឹក ថែទាំចំពោះដើមឈើដែលនៅមុខផ្ទះនីមួយៗអោយបានទៀងទាត់តាមលទ្ធភាពដែលបងប្អូនធ្វើបាន និងខិតខំដាំបន្តទៀតដើម្បីបង្កើនសម្រស់ទីក្រុងបាត់ដំបង ជាទីក្រុងបៃតង មានសោភ័ណភាពស្អាតទាក់ទាញភ្ញៀវទេសចរកាន់តែច្រើនក្នុងពេលអនាគត ។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ កាលពីពេលកន្លងទៅនេះបានមានប្រសាសន៍ថា នៅអំឡុងខែមេសា ឆ្នាំ២០២៥ ការវាស់វែង និងចុះបញ្ជីដីធ្លីនឹងបញ្ចប់ទាំងស្រុងនៅកម្ពុជា ហើយការងារបន្ត ក្រុមការងារនឹងចាប់ផ្ដើមជម្រះការងារ និងដោះស្រាយបញ្ហាដែលនៅសេសសល់កន្លងមកដូចជាទំនាស់ដីធ្លីរ៉ាំរ៉ៃជាដើម ។
ឯកឧត្តមបន្តថា ការបញ្ចប់ការវាស់វែង និងចុះបញ្ជីដីធ្លីនៅកម្ពុជានាពេលនេះ គឺជាប្រវត្តិសាស្ត្រដែលមិនធ្លាប់មាន សម្រាប់ការវាស់វែង ចុះបញ្ជី និងចេញបណ្ណជូនប្រជាពលរដ្ឋជាកម្មសិទ្ធិ សម្រាប់ប្រើប្រាស់ជាចាំបាច់ក្នុងជីវភាព ។ ការវាស់វែង និងចេញបណ្ណកម្មសិទ្ធិដីធ្លី ដែលជាកំណប់ទ្រព្យរបស់ប្រជាពលរដ្ឋ ទទួលបាននូវការស្វាគមន៍ និងសាទរជាច្រើនពីប្រជាពលរដ្ឋ។ ការណ៍នេះបានបង្កើតឱ្យមានចលករ នយោបាយ ឬឃោសនិក ជាច្រើនចូលរួមផ្សព្វផ្សាយតាមបណ្ដាញសង្គម ហើយនេះគឺជាជោគជ័យដ៏សំខាន់មួយសម្រាប់រាជរដ្ឋាភិបាល៕
Account
Security
Favourite Content