សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បឹងទន្លេសាបរបស់កម្ពុជាបានផ្ដល់អត្ថយោជន៍ដ៏មហាសាលដល់សេដ្ឋកិច្ច ដោយក្នុងមួយឆ្នាំៗ កម្ពុជាអាចទាញប្រយោជន៍ពីបឹងទន្លេសាបក្នុងទំហំទឹកប្រាក់ប្រមាណ ២ពាន់លានដុល្លារអាមេរិក តាមរយៈផលត្រី ការដឹកជញ្ជូន និងទេសចរណ៍ជាដើម ។ ដោយសារតែបែបនេះហើយ ទើបរាជរដ្ឋាភិបាលត្រូវតែការពារឱ្យបាននូវនិរន្តរភាពរបស់បឹងទន្លេសាបឱ្យខាងតែបាន។
យោងតាមប្រសាសន៍ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីនៃក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ទន្លេសាប បានផ្តល់ជាថវិកាដល់កម្ពុជាប្រមាណ ២ ពាន់ លានដុល្លារអាមេរិកក្នុងមួយឆ្នាំ តាមរយៈផលត្រី និងការដឹកជញ្ជូនតាមផ្លូវទឹក ដូច្នេះហើយ ទើបរាជរដ្ឋាភិបាលត្រូវប្ដេជ្ញាថែរក្សាអាយុជីវិតបឹងទន្លេសាបឱ្យបាន ។
ឯកឧត្តមបានមានប្រសាសន៍បន្តថា
«រដ្ឋាភិបាលនឹងមិនអនុញ្ញាតឱ្យដីបឹងទន្លេសាបសម្រាប់បង្កបង្កើនផលស្រូវបន្ថែមទៀតទេ គឺឱ្យធ្វើស្រែលើដីដែលបានកំណត់រួចប៉ុណ្ណោះ ហើយបើកាលណាធ្វើស្រែលើដីបឹងទន្លេសាបបន្ថែមទៀត នឹងធ្វើឱ្យបាត់បង់ព្រៃលិចទឹកដែលជាជម្រករបស់សត្វត្រី ។ ម្យ៉ាងវិញទៀត បើសិនជាកាលណាពលរដ្ឋចេះតែធ្វើស្រែលើតំបន់ព្រៃលិចទឹក នឹងធ្វើឱ្យដីភក់របស់បឹងទន្លេសាបក្លាយជាដីខ្សាច់ ហើយនឹងធ្វើឱ្យបឹងទន្លេសាបខ្សោះជីវជាតិលែងមានដីភក់មានតែដីខ្សាច់ ។ ដូច្នេះ យើងទាំងអស់គ្នាត្រូវថ្នមបឹងទន្លេសាបឱ្យនៅគង់វង្សជានិរន្តរ៍ »។
ឯកឧត្តមឧបនាយកនាយករដ្ឋមន្ត្រី បានបញ្ជាក់ថា បឹងទន្លេសាបចាត់ទុកជាអរិយធម៌របស់ខ្មែរមួយ ហើយបើសិនជាបាត់បង់បឹងទន្លេសាប ឬធ្វើឱ្យបឹងទន្លេសាបក្លាយជាបឹងគ្មានជីវជាតិ គឺដូចទៅនឹងការបាត់បង់អរិយធម៌របស់ខ្មែរមួយផងដែរ ដូច្នេះហើយទើបក្រសួងបានដោះស្រាយបញ្ចប់បញ្ហាបឹងទន្លេសាប ដោយបានចុះបញ្ជីដីបឹងទន្លេសាប ការពារការវាទទី ឬឈ្លានពានយកដីបឹងទន្លេសាបបន្តទៀត ។
យោងតាមបទអន្តរាគមន៍ស្ដីពីការគ្រប់គ្រងធនធានធម្មជាតិនៅតំបន់បឹងទន្លេសាបរបស់ឯកឧត្តម ឡោ ដាវុធ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បាឱ្យដឹងថា បឹងទន្លេសាប គឺជាបឹងធម្មជាតិធំជាងគេនៅអាស៊ីអាគ្នេយ៍ ហើយមានប្រព័ន្ធអេកូឡូស៊ីច្រើនប្រភេទ ដូចជាតំបន់វាលលំហទឹកសាប វាលភក់ ព្រៃលិចទឹក វាលស្មៅលិចទឹក និងតំបន់ទំនាបទឹកនៅជុំវិញ ។
បឹងនេះ ដើរតួនាទីយ៉ាងសំខាន់ក្នុងការរក្សារបបទឹក លំនឹងអាកាសធាតុក្នុងតំបន់ ទប់ស្កាត់ និងកាត់បន្ថយគ្រោះទឹកជំនន់ សម្បូរណ៍ទៅដោយជីវចម្រុះ និងធនធានធម្មជាតិសម្បូរបែប ជាពិសេសព្រៃលិចទឹក ដែលជាជម្រកត្រីពង ព្រមទាំងផ្ដល់នូវតម្លៃសេដ្ឋកិច្ចប្រមាណ២០០០លានដុល្លារអាមេរិកក្នុងមួយឆ្នាំ ។
បើតាមបទអន្តរាគមន៍នេះ តំបន់ទន្លេសាបចាប់គិតពីផ្លូវជាតិលេខ៥ និងលេខ៦ ចុះទៅបឹងទន្លេសាប ស្ថិតនៅក្នុងភូមិសាស្ត្រខេត្តចំនួន៦ រួមមានខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ ខេត្តសៀមរាប និងខេត្តកំពង់ធំ ហើយត្រូវបែងចែកជា ៣តំបន់ ។ តំបន់១ ជាតំបន់ភូមិដ្ឋានរបស់ប្រជាពលរដ្ឋ ដែលអាចមានសិទ្ធិជាកម្មសិទ្ធិជូនប្រជាពលរដ្ឋបាន ។ តំបន់២ ជាតំបន់ទ្រនាប់ ដែលស្ថិតនៅចន្លោះរវាងតំបន់១ និងតំបន់៣ ដោយតំបន់នេះអាចផ្ដល់សិទ្ធិប្រើប្រាស់ និងអាស្រ័យផលជូនពលរដ្ឋដែលបានបង្កបង្កើនផលជាលក្ខណៈគ្រួសារយូរយារមកហើយ ។ ចំណែកតំបន់៣ ជាតំបន់ព្រៃលិចទឹក ដែលត្រូវធ្វើការអភិរក្ស ហាមប៉ះពាល់ដាច់ខាត ។ តំបន់៣ មានទំហំជាង៦៤ម៉ឺនហិចតា ត្រូវបានកំណត់ដោយអនុក្រឹត្យលេខ ១៩៧ អនក្រ.បក ចុះថ្ងៃទី២៩ ខែសីហា ឆ្នាំ ២០១១ ។ ដោយឡែកតំបន់១ មានទំហំ ៣៩ម៉ឺនហិចតា និងតំបន់២ មានទំហំប្រមាណ៣៧ម៉ឺនហិចតា ៕
Account
Security
Favourite Content