សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ជាភេសជ្ជៈសុខភាព សំដៅលើប្រភេទភេសជ្ជៈទាំងឡាយណាដែលមានគុណប្រយោជន៍ចំពោះអ្នកទទួលទាន គ្មានសារធាតុគីមី ជាពិសេសគឺផលិតចេញពីវត្ថុធាតុដើមធម្មជាតិផ្ទាល់តែម្ដង។ ក្នុងនោះ មានអាជីវកម្មមួយកន្លែងដែលកំពុងផលិតទឹកសណ្ដែក ផលិតពីវត្ថុធាតុដើមក្នុងស្រុក មានទាំងគុណភាព សុវត្ថិភាព ជាពិសេសផ្តល់នូវគុណប្រយោជន៍យ៉ាងច្រើនចំពោះអ្នកទទួលទាន។
លោក បេ អ៊ិញហ៊ាន វ័យ ៣២ឆ្នាំ ជាម្ចាស់អាជីវកម្ម SouHean Food Safety និងជាអតីតនិស្សិតសាកលវិទ្យាល័យភូមិន្ទកសិកម្មមួយរូប បានមានប្រសាសន៍ទាក់ទងនឹងមូលហេតុនៃការបង្កើតអាជីវកម្មនេះថា ៖
“យើងបង្កើតអាជីវកម្មនេះឡើង ដោយសារចង់បង្កើតនូវផលិតផលដែលជាអាហារសុវត្ថិភាព ប្រើប្រាស់វត្ថុធាតុដើមក្នុងស្រុក និងផ្គត់ផ្គង់ឱ្យអតិថិជននូវរបបអាហារដែលល្អ និងគ្មានសារជាតិគីមី។”
ផលិតផលរបស់សិប្បកម្មនេះ ភាគច្រើនផ្ដោតលើប្រភេទភេសជ្ជៈសុខភាពរួមមាន ទឹកសណ្ដែកសៀង ទឹកសណ្ដែកខៀវ ទឹកល្ពៅ ហើយក្រៅពីនេះក៏មានតៅហ៊ូរសជាតិដើម តៅហ៊ូទឹកស្ករខ្ញី ដែលសុទ្ធសឹងជាផលិតផលដែលផលិតចេញពីវត្ថុធាតុដើមក្នុងស្រុក និងផលិតឡើងដោយខ្លួនឯង ធានាបានតាំងរសជាតិ គុណភាព និងសុវត្ថិភាព។
ដោយឡែក ចំណុចពិសេសរបស់ផលិតផលខាងលើនេះគឺគេសម្រិតសម្រាំងយកវត្ថុធាតុដើមណាដែលល្អ មានប្រភពច្បាស់លាស់ និងមិនដាក់នូវសារធាតុរក្សាទុកបានយូរ ឬសារធាតុណាដែលប៉ះពាល់ដល់សុខភាពអ្នកបរិភោគនោះទេ។ សម្រាប់បរិមាណផលិតវិញ SouHean Food Safety អាចផលិតបានប្រមាណ ៥០០ដបប្រចាំថ្ងៃ ដែលមានតម្លៃចាប់ពី ២០០០-៧០០០រៀលក្នុងមួយដប។
ចំពោះអតិថិជនវិញ ភាគច្រើនប្រមាណ ៩០ភាគរយគឺជាអ្នករស់នៅរាជធានីភ្នំពេញដែលនិយមទទួលទានភេសជ្ជៈសុខភាព ហើយការលក់របស់សិប្បកម្មនេះ គឺលក់រាយខ្លួនឯងដល់ទៅ ៩០ភាគរយ ចំណែក ១០ភាគរយទៀតមានអ្នកយកទៅលក់បន្ត។
គួរបញ្ជាក់ដែរថា SouHean Food Safety បានចាប់ផ្ដើមនៅឆ្នាំ២០២១ ចំណាយដើមទុនដំបូងប្រមាណ ៣០០០ដុល្លារ ទៅលើការទិញម៉ាស៊ីនផលិត ការរៀបចំទីតាំង និងដើមទុនមួយចំនួនទៀតដើម្បីឈរជើងបានរហូតដល់សព្វថ្ងៃ។
ទាក់ទងនឹងបញ្ហាដើមទុននេះដែរ គឺមិនអាចជៀសផុតនោះទេនូវបង្វិលទុន ជាពិសេសចំណាយទៅលើការទិញវត្ថុធាតុដើមស្តុកទុកក្នុងបរិមាណដ៏ច្រើន និងអាចជួយបន្ទាបតម្លៃថ្លៃដើម ហើយចំពោះម៉ាស៊ីនផលិតវិញក៏ត្រូវការម៉ាស៊ីនធំទើបអាចផលិតបានច្រើន។
យ៉ាងណាមិញ លោក បេ អ៊ិញហ៊ាន ក៏បានបង្ហើបពីគម្រោងនាពេលអនាគតដែរថា នៅឆ្នាំ២០២៤ខាងមុខនេះ លោកនឹងពង្រីកទីតាំងលក់ឱ្យបាន ២០កន្លែងដើម្បីលក់ផលិតផលរបស់ SouHean Food ហើយក៏កំពុងស្រាវជ្រាវបន្ថែមនូវវត្ថុធាតុដើមដែលអាចផលិតជាការ៉េមបានបន្ថែមទៀតផងដែរ៕
Account
Security
Favourite Content