សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រជាពលរដ្ឋជាច្រើនដែលមានបំណងចង់ផ្ទេរឈ្មោះឬផ្ទេរកម្មសិទ្ធិដីធ្លីពីឪពុកម្ដាយទៅកូន ឬពីយាយតាទៅចៅ និយាយឱ្យចំគឺផ្ទេរកម្មសិទ្ធិក្នុងរង្វង់សាច់ញាតិ ប៉ុន្តែមិនទាន់ដឹងពីការត្រៀមឯកសារ និងនីតិវិធី ។ នៅថ្ងៃនេះ សារព័ត៌មាន AMS ECONOMY នឹងលើកបង្ហាញពី ឯកសារត្រៀម និងនីតិវិធីនៃការកាត់ប្លង់ឬផ្ទេរកម្មសិទ្ធិដីធ្លីពីឪពុកម្ដាយទៅកូន ឬពីយាយទៅចៅ ។
នីតិវិធីនៃការកាត់ឈ្មោះ ឬផ្ទេរកម្មសិទ្ធិពីឪពុកម្ដាយទៅកូន ឬពីយាយតាទៅចៅ ត្រូវបានបែកចែកជាពីរផ្សេងគ្នា ដោយមួយជាប្រភេទដីធ្លីដែលមានប្លង់រឹងត្រឹមត្រូវ និងមួយទៀត គឺដីធ្លីដែលមានត្រឹមតែប្លង់ទន់ ។ ប៉ុន្តែពេលនេះ សារព័ត៌មាន AMS នឹងលើកយកពីរបៀបនិងនីតិវិធីនៃការកាត់ឈ្មោះ ឬផ្ទេរកម្មសិទ្ធិដីធ្លីប្លង់រឹង ។
សម្រាប់ដីធ្លីដែលមានវិញ្ញាបនបត្រសម្គាល់ម្ចាស់អចលនវត្ថុចេញដោយសុរិយោដី ឬប្លង់រឹង នីតិវិធីមានដូចតទៅ ៖ ដំបូងត្រូវដាក់ពាក្យស្នើសុំចុះបញ្ជីអំពីការផ្ទេរកម្មសិទ្ធិ ទៅសាលាស្រុក ឬសាលាខណ្ឌដែលទីតាំងដីនោះតាំងនៅ ។ដើម្បីដាក់ស្នើសុំបញ្ជីអំពីការផ្ទេរកម្មសិទ្ធិនេះ ត្រូវភ្ជាប់មកជាមួយ ១.បណ្ណកម្មសិទ្ធិដីធ្លីច្បាប់ដើម ២.អត្តសញ្ញាណបណ្ណអ្នកឱ្យអំណោយ និងអ្នកទទួលអំណោយចំនួន១ច្បាប់ ( ថតចម្លងត្រឹមតាមច្បាប់ដើម )៣. សេចក្ដីចម្លងសំបុត្រអាពាហ៍ពិពាហ៍( ករណីរៀបអាពាហ៍ពិពាហ៍ )ចំនួន២ច្បាប់ ៤. សេចក្ដីចម្លងសំបុត្រកំណើត សៀវភៅគ្រួសារ ចំនួន២ច្បាប់ និង៥. លិខិតអំណោយផ្ដាច់ចំនួន០១ច្បាប់ ។
បន្ទាប់ពីបានដាក់ពាក្យស្នើសុំ នៅការិយាល័យច្រកចេញ-ចូលតែមួយនៃសាលាស្រុក/ខណ្ឌនៃទីតាំងដីនោះ រួចហើយ មន្ត្រីច្រកចេញ-ចូលតែមួយនឹងចេញបង្កាន់ដៃមួយបញ្ជាក់ថាបានដាក់ពាក្យស្នើសុំចុះបញ្ជីអំពីការផ្ទេរកម្មសិទ្ធិនេះគ្រប់ចំនួននិងត្រឹមត្រូវ និងបង្កាន់ដៃបង់ប្រាក់សម្រាប់ការស្នើសុំចុះបញ្ជីអំពីការផ្ទេរកម្មសិទ្ធិ ដោយតម្លៃសេវារដ្ឋបាលអាស្រ័យទៅលើដីទំហំដី និងទីតាំង ( ក្រុងឬជនបទ) ប៉ុន្តែមិនជាថ្លៃដូចការកាត់ប្លង់រឹងដោយការទិញលក់នោះទេ ។
បន្ទាប់ពីបានដាក់ពាក្យនិងអនុវត្តតាមនីតិវិធីខាងលើរួចហើយ ម្ចាស់កម្មសិទ្ធិដីធ្លី ត្រូវរង់ចាំរយៈពេល១៥ថ្ងៃ ដើម្បីឱ្យខាងការិយាល័យច្រកចេញ-ចូលតែមួយធ្វើការ នៅពេលធ្វើការរួចរាល់ ខាងការិយាល័យច្រកចេញចូលតែមួយ នឹងទាក់ទងមកកាន់អ្នកដាក់ស្នើ ដើម្បីឱ្យទៅទទួលយកសំណុំឯកសារទៅបោះត្រាបង់ពន្ធនៅសាខាពន្ធដារខេត្ត ប៉ុន្តែការបោះត្រា លើការផ្ទេរកម្មសិទ្ធិដីធ្លីពីឪពុកម្ដាយ ទៅកូន ឬពីយាយតាទៅចៅ ក្នុងរង្វង់សាច់ញាតិ មិនមានការបង់ប្រាក់ឬបង់ពន្ធ៤ភាគរយនោះទេ ( បោះត្រាឥតគិតថ្លៃ ) ។
ក្រោយពីបានប្រថាប់ត្រាលើសំណុំឯកសារផ្ទេរកម្មសិទ្ធិរួចហើយ ត្រូវយកសំណុំឯកសារនោះ ទៅដាក់នៅមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ដើម្បីឱ្យមន្ទីរដែនដី រៀបចំចេញបណ្ណថ្មីដែលមានម្ចាស់កម្មសិទ្ធិដែលជាកូនឬចៅជាអ្នកទទួលអំណោយដីធ្លីនោះ ។ សម្រាប់រយៈពេលនៃការរង់ចាំការចេញបណ្ណកម្មសិទ្ធិដីធ្លីនោះ ក្នុងរង្វង់៣ទៅ៤ខែ ។ ត្រូវចងចាំថា បើទោះបីជាការផ្ទេរកម្មសិទ្ធិពីឪពុកម្ដាយទៅកូន ពីយាយតាទៅចៅ ឬការផ្ទេរកម្មសិទ្ធិក្នុងរង្វង់សាច់ញាតិមិនបង់ពន្ធប្រថាប់ត្រាក៏ដោយ ក៏ត្រូវយកឯកសារដើម្បីឱ្យពន្ធដារប្រថាប់ត្រានិងចេញបង្កាន់ដៃប្រថាប់ត្រា ស្មើសូន្យ ៕
Account
Security
Favourite Content