កោះកុង ៖ តាសក់ផ្អែម ជាដំណាំវល្លិ៍មួយប្រភេទដែលប្រជាជនខ្មែរនិយមចូលចិត្តទទួលទានដោយសារតែរសជាតិផ្អែម ស្រួយឆ្ងាញ់ ទើបធ្វើឱ្យតាសក់ប្រភេទនេះមានទីផ្សារល្អ។ ដើម្បីជាជំនួយដល់កសិករដែលចង់ដាំតាសក់ផ្អែម ហើយអាចទទួលបានទិន្នផលល្អ និងច្រើនលក់បានតម្លៃថ្លៃ ប្រជាកសិកម្មម្នាក់ដែលមានបទពិសោធន៍ក្នុងដាំដុះ ថែទាំ ដែលទទួលផលល្អ បានចែករំលែកនូវបច្ចេកទេសសំខាន់ៗមួយចំនួន។

លោក នី ប៊ុនថា មានទីលំនៅស្រុកស្រែអំបិល ខេត្តកោះកុង និងជាស្ថាបនិក «រៀនដាំ» មានជំនាញផ្នែកកសិកម្ម និងជាអ្នកចូលចិត្តធ្វើវីដេអូផ្តល់ចំណេះដឹងកសិកម្មផងដែរនោះ បានមានប្រសាសន៍ឱ្យដឹងថា ដំណាំតាសក់ផ្អែមជាដំណាំងាយស្រួលដាំ ដែលអាចដាំដុះបានទាំងលក្ខណៈអាជីវកម្ម ឬក៏លក្ខណៈគ្រួសារខ្នាតតូច ហើយថែមទាំងមានទីផ្សារខ្ពស់ លក់បានតម្លៃថ្លៃគួរសមផងដែរ។

លោកបន្តថា ៖

“តម្លៃតាសក់ផ្អែមយើងគេអាចលក់បានចន្លោះពី ៥ ០០0  ទៅដល់ ១២ ០០០រៀលក្នុងមួយគីឡូក្រាម ហើយចំពោះការលក់បោះដុំ ឬបងប្អូនខ្លះអាចលក់ជាផ្លែចន្លោះពី ២-៥ ដុល្លារក្នុងមួយផ្លែផងដែរ ហើយយើងអាចដាំជាលក្ខណៈគ្រួសារក្នុងសួនបន្លែក៏អាចដាំបាន ដោយពុំចាំបាច់ត្រូវការដីចំការធំៗនោះទេ ម៉្យាងទៀតយើងក៏អាចដាំបានទាំងលើដីរាបស្មើធម្មតា ដីលើកជាថ្នាល ក៏ដូចជាក្នុងផើងផងដែរ”

លោកបន្ថែមថា ៖

“សម្រាប់ការដាំតាសក់ផ្អែម អ្វីដែលយើងគួរយកចិត្តទុកដាក់គឺការជ្រើសរើសពូជ ដែលយើងត្រូវជ្រើសរើសគ្រាប់ពូជណាដែលមានក្រុមហ៊ុនចុះបញ្ជីក្រសួងពាណិជ្ជកម្មច្បាស់លាស់ និងធានាគុណភាពគ្រាប់ពូជនៅពេលដាំ។ ក្រៅពីនេះ យើងត្រូវគិតទៅលើដីសម្រាប់បណ្ដុះកូន និងការដាក់ជី ជាពិសេសដំណាំតាសក់ត្រូវការចាំបាច់នូវនូវជីកំប៉ុសគោកដើម្បីបំប៉នដំណាំឱ្យបានល្អ”

ចំពោះបច្ចេកទេសនៃការដាំដុះត្រូវបានបែងចែកដាច់ដោយឡែកពីគ្នា។ សម្រាប់ការដាំជាលក្ខណៈអាជីវកម្ម គេអាចលើកជារង ក្រាលផ្ទាំងកៅស៊ូ និងប្រព័ន្ធដំណក់ទឹក ឬហៅថាទ្រីប ក៏ប៉ុន្តែគេក៏អាចដាំជាលក្ខណៈគ្រួសារ ដាំខ្នាតតូចអាចដាំក្នុងផើង ការ៉ុង ឬថង់ប្លាស្ទិកក៏បាន។

ចំណែកការថែទាំ ក៏មិនខុសពីដំណាំដទៃទៀតដែរ ប្រសិនបើយើងដាំក្នុងផ្ទះសំណាញ់ គឺត្រូវធ្វើការបង្កាត់ពូជ ប៉ុន្តែបើដាំនៅក្រៅផ្ទះសំណាញ់ដែលមានសត្វល្អិតដូចជាឃ្មុំជាដើមនៅពេលតាសក់ចេញផ្កា វាអាចជួយបង្កាត់ពូជស្រាប់តែម្ដង។

ចំពោះទំហំផ្លែដែលត្រូវស្តង់ដារ ក្នុងមួយដើមគេទុកផ្លែតាសក់ផ្អែមតែមួយផ្លែប៉ុណ្ណោះ ដោយដំបូងគេអាចទុកចំនួន ៣ផ្លែសិន លុះធំបន្តិចទើបគេជ្រើសរើសយកមួយផ្លែណាដែលមានរាងធំទ្រវែង ក្រឡា និងទងស្អាត ហើយពីរផ្លែទៀតត្រូវកាត់ចោល។ ការទុកផ្លែតាសក់តែមួយផ្លែនេះ ដើម្បីឱ្យផ្លែមានជីជាតិគ្រប់គ្រាន់ ធំល្អ និងមានជាតិស្ករខ្ពស់តាមស្តង់ដារបច្ចេកទេស។ ប៉ុន្តែសម្រាប់ការដាំលក្ខណៈគ្រួសារ កសិករខ្លះស្ដាយ គេអាចទុកបាន ២ទៅ៣ តែផ្លែពុំសូវធំល្អឡើយ។

ដោយឡែក ការទុកតែមួយផ្លែនេះ តាមបច្ចេកទេសគេត្រូវទុកផ្លែនៅចន្លោះថ្នាំងទី៨-១៥ ទើបល្អ​ ដោយសារតាសក់ផ្អែមក៏មិនខុសពីតាសក់ធម្មតាដែរ ដោយវាចេញផ្លែនៅតាមខ្នែងនីមួយៗ តែមិនអាចទុកផ្លែបានគ្រប់ខ្នែងនោះទេ។ ចំពោះចន្លោះខ្នែងទី ៨-១៥ នេះ គេអាចទុកមួយផ្លែនៅចន្លោះនោះ បន្ទាប់ពីជ្រើសរើសហើយ ត្រូវកាត់ខ្នែងខាងលើចេញតែម្ដង។

ពាក់ព័ន្ធនឹងការប្រមូលផលតាសក់ផ្អែមខុសៗគ្នាទៅតាមពូជ ចន្លោះពី ៦៥-៧៥ ថ្ងៃ ដែលរាងយូរជាងតាសក់ធម្មតាបន្តិច អាស្រ័យលើការថែទាំ និងតាមលក្ខខណ្ឌទំហំចំការដោយការដាំលក្ខណៈអាជីវកម្មគេមានប្រើជីគីមីបន្ថែមទៀត តែសម្រាប់ទំហំតូចគេអាចប្រើជីកំប៉ុសដែលបានមកពីការកែច្នៃកាកសំណល់ផ្សេងៗកាន់តែប្រសើរ។

ទន្ទឹមគ្នានេះដែរ បញ្ហាប្រឈមគឺមិនខុសពីដំណាំទូទៅនោះដែរ ប្រសិនបើដាំនៅក្រៅផ្ទះសំណាញ់អាចជួបបញ្ហាសត្វល្អិតបំផ្លាញ ធ្វើឱ្យតាសក់ផ្តល់ផលមិនល្អ តែបើដាំក្នុងផ្ទះសំណាញ់គឺងាយស្រួលគ្រប់គ្រង និងមិនសូវចោទជាបញ្ហាអ្វីឡើយ។ នេះជាអ្វីដែលលោក នី ប៊ុនថា បានលើកឡើង។  ចំពោះបងប្អូនប្រជាកសិករដែលចាប់អារម្មណ៍ចង់ដាំ គឺគួរតែសាកល្បងដោយសារវាងាយស្រួលដាំ មានតម្រូវការទីផ្សារ និងលក់បានថ្លៃ តែបើដាំលក្ខណៈគ្រួសារក៏អាចទុកទទួលទានខ្លួនក៏បាន។ មួយវិញទៀត តាសក់ផ្អែមក៏ជាដំណាំវិលជុំដែលអាចដាំបន្តពីដំណាំផ្សេងៗតាមរដូវបានផងដែរ៕