សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ អូស្ត្រាលី និងជប៉ុន កំពុងធ្វើការរួមគ្នាដើម្បីពង្រឹងវិស័យស្វាយចន្ទីរបស់កម្ពុជា តាមរយៈការគាំទ្រដែលបំពេញឲ្យគ្នាទៅវិញទៅមក អាចជួយបង្កើនសមត្ថភាពកែច្នៃ និងទទួលបានគ្រាប់ស្វាយចន្ទីកម្ពុជាដែលកាន់តែមានរសជាតិឆ្ងាញ់ និងគុណភាពខ្ពស់ទៅកាន់ទីផ្សារពិភពលោក។
ប្រភពពីស្ថានទូតអូស្ត្រាលីប្រចាំកម្ពុជា បានឱ្យដឹងថា៖ គ្រាប់ស្វាយចន្ទីប្រមាណ ៥ ភាគរយប៉ុណ្ណោះនៃគ្រាប់ស្វាយចន្ទីចំនួន ៨៤០ ០០០ តោន ដែលបានដាំដុះនៅក្នុងប្រទេសកម្ពុជា ត្រូវបានកែច្នៃនៅក្នុងប្រទេស។ ប្រសិនបើកម្ពុជាអាចបង្កើនការកែច្នៃក្នុងប្រទេសបានច្រើន កម្ពុជាអាចទទួលបានតម្លៃបន្ថែម បង្កើតការងារ និងបង្កើនប្រាក់ចំណូលកាន់តែច្រើន។
ស្ថានទូតអូស្ត្រាលីបានឱ្យដឹងទៀតថា៖ ដោយមានការគាំទ្រពីរដ្ឋាភិបាលទាំងពីរ ក្រុមហ៊ុនកែច្នៃគ្រាប់ស្វាយចន្ទី MIRARTH Agri Tech ដែលមានទីតាំងស្ថិតក្នុងខេត្តកំពង់ធំ កំពុងរួមចំណែកជំរុញការកែច្នៃនៅក្នុងប្រទេស បង្កើនវត្តមានគ្រាប់ស្វាយចន្ទីរបស់កម្ពុជាទៅកាន់ទីផ្សារពិភពលោក និងធានាឱ្យកសិករខ្នាតតូចដែលដាំស្វាយចន្ទីទាំងនេះទទួលបានតម្លៃសមរម្យ និងមានស្ថិរភាព។
ការគាំទ្ររបស់ជប៉ុនបានជួយក្រុមហ៊ុនMIRARTH ពង្រឹងខ្សែសង្វាក់ផ្គត់ផ្គង់ និងធ្វើការសិក្សាអំពីលទ្ធភាពកែច្នៃគ្រាប់ស្វាយចន្ទី និងការកាត់បន្ថយកាកសំណល់។ ចំណែកឯប្រទេសអូស្ត្រាលីវិញ បានជួយ MIRARTH បង្កើនការត្រៀមខ្លួននាំចេញ ដោយផ្តល់ជំនួយតាមរយៈការបណ្តុះបណ្តាល ការផ្គូផ្គងអាជីវកម្ម និងការចូលរួមក្នុងសន្និសីទគ្រាប់ស្វាយចន្ទីពិភពលោកឆ្នាំ២០២៥ ដោយនាំឱ្យមានកិច្ចព្រមព្រៀងដំបូងជាមួយក្រុមហ៊ុនមួយចំនួន។ ក្រុមហ៊ុន MIRARTH គ្រោងនឹងកែច្នៃគ្រាប់ស្វាយចន្ទីចំនួន ៣០០០ តោនក្នុងឆ្នាំ២០២៥។
លោក នាម កូពី ឧត្តមទីប្រឹក្សាក្រុមហ៊ុន MIRARTH Agri Tech បានឱ្យដឹងថា៖ កាលពីថ្ងៃទី២១ ខែវិច្ឆិកា ឆ្នាំ២០២៤ ក្រុមហ៊ុនបានប្រកាសនាំចេញគ្រាប់ស្វាយចន្ទីកែច្នៃរួចទៅសហគមន៍អឺរ៉ុបលើកដំបូងចំនួន ២៥០តោន ដែលតាមតម្លៃប៉ាន់ស្មានប្រមាណជាង ២០០លានដុល្លារអាមេរិក ហើយសម្រាប់ការនាំចេញដំណាក់កាលទី១មានចំនួន១៦តោន។
កិច្ចសហការរវាងអូស្ត្រាលី និងជប៉ុននេះ បានឆ្លុះបញ្ចាំងពីការប្តេជ្ញាចិត្តរួមគ្នារវាងប្រទេសទាំងពីរក្នុងការជំរុញវិស័យដែលមានសក្តានុពលខ្ពស់នៅកម្ពុជា ដើម្បីបង្កើនផលិតភាពនៃផលិតកម្ម ការងារ និងជីវភាពរស់នៅ ព្រមទាំងជំរុញកំណើនសេដ្ឋកិច្ចប្រកបដោយចីរភាព៕
Account
Security
Favourite Content