សៀមរាប ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងក្នុងពិធីសំណេះ​សំណាលជាមួយប្រជាពលរដ្ឋនៅរុនតាឯកាលពីថ្ងៃចុងសប្ដាហ៍កន្លងទៅនេះ ដោយបង្ហាញឱ្យឃើញពីការប្តេជ្ញាចិត្តរបស់រាជរដ្ឋាភិបាល ដែលបាន និងកំពុងបន្តស្មារតីអភិវឌ្ឍន៍តំបន់រុនតាឯកឱ្យកាន់តែល្អប្រសើរសម្រាប់ការរស់នៅរបស់ប្រជាពលរដ្ឋឱ្យកាន់តែមានភាពងាយស្រួល ដែលកំពុងតែទទួលបាននូវការកសាងហេដ្ឋារចនាសម្ព័ន្ធជាបន្តបន្ទាប់។

សម្តេចធិបតី ហ៊ុន ម៉ាណែត បានសម្តែងពីក្ដីរំភើបរីករាយ ពេលបានជួបជាមួយបងប្អូនប្រជាពលរដ្ឋរស់នៅភូមិធម្មជាតិរុនតាឯក និងតំបន់ពាក់ស្នែង បើទោះជាមិនអាចជប់ឱ្យចេញសមិទ្ធផលទាំងអស់បានភ្លាមៗក៏ពិតមែន បុន្តែសម្ដេចប្ដេជ្ញាខិតខំកសាងហេដ្ឋារចនាសម្ព័ន្ធឱ្យបានកាន់តែច្រើន ដើម្បីផ្ដល់ផលប្រយោជន៍ជូនប្រជាពលរដ្ឋ។

សូមរម្លឹកថា បងប្អូនប្រជាពលរដ្ឋដែលស្ម័គ្រចិត្តមករស់នៅតំបន់រុនតាឯក និងពាក់ស្នែង ត្រូវបានសម្តេចអគ្គមហាសេនាបតីតេជោ ហ៊ុន សែន ធ្លាប់អញ្ជើញសំណេះសំណាល៤លើករួចមកហើយ ដោយពួកគាត់ទទួលបានកម្មសិទ្ធិលើដីធ្លី និងលំនៅឋានស្របច្បាប់ ព្រមទាំងទទួលបាននូវហេដ្ឋារចនាសម្ព័ន្ធរូបវន្ត និងសេវាចាំបាច់ផ្សេងៗសម្រាប់ការរស់នៅផ្តល់ដោយរដ្ឋ និងមានការត្រួតពិនិត្យ សម្របសម្រួលពីក្រុមការងារចម្រុះរបស់រាជរដ្ឋាភិបាល ដែលនឹងធ្វើឱ្យជីវភាពបងប្អូនប្រជាពលរដ្ឋក្នុងតំបន់ ពីមួយថ្ងៃទៅមួយថ្ងៃកាន់តែប្រសើរឡើង ។

គិតមកទល់ពេលនេះ ការដោះស្រាយបញ្ហាសំណង់លំនៅឋានមិនរៀបរយក្នុងតំបន់រមណីយដ្ឋានអង្គរ និងការស្ថាបនាហេដ្ឋារចនាសម្ព័ន្ធ និងសំណង់អគារនៅតំបន់អភិវឌ្ឍន៍ទាំង២នេះ បាន និងកំពុងដំណើរការល្អប្រសើរ និងទាន់ពេលវេលា ដោយសម្រេចបានលទ្ធផលដូចខាងក្រោម៖ ផ្ទៃដីសម្រាប់ធ្វើប្រទានកម្មជូនប្រជាពលរដ្ឋ ដែលបំពេញគ្រប់លក្ខខណ្ឌ និងស្ម័គ្រចិត្តប្ដូរទីលំនៅចេញពីរមណីយដ្ឋានអង្គរ មានទំហំសរុប ២.៤៥៦ហិកតា ស្មើ ២០.៩៥២ឡូត៍ ។ ក្នុងនោះផ្ទៃដី នៅតំបន់អភិវឌ្ឍន៍រុនតាឯកទំហំ ១.០៤៦ហិកតា ស្មើ ៦.៩៩៤ឡូត៍ និងនៅតំបន់ពាក់ស្នែងទំហំ ១. ៤១០ហិកតា ស្មើ ១៤.៩៤៧ឡូត៍ប្រជាពលរដ្ឋស្ម័គ្រចិត្តប្តូរទីលំនៅចេញពីតំបន់រមណីយដ្ឋានអង្គរ តំបន់១ មានចំនួន៤៥៤៥ក្បាលដី និងតំបន់២ មានចំនួន១ ៨៦៥ក្បាលដី ។

ចំពោះ ប្រជាពលរដ្ឋទៅរស់នៅតំបន់អភិវឌ្ឍន៍រុនតាឯកចំនួន ៥ ៨៦៥ គ្រួសារ និងតំបន់អភិវឌ្ឍន៍ពាក់ស្នែងចំនួន ៤០៣២គ្រួសារ សរុបចំនួន ៩ ៨៩៧គ្រួសារ និងគ្រួសារប្រជាពលរដ្ឋបានចាកចេញទៅរស់នៅតំបន់អភិវឌ្ឍន៍រុនតាឯក ចំនួន៤៧៣០ខ្នងផ្ទះ ស្មើនឹង ៤៧,៧៩% នៃចំនួនគ្រួសារ ដែលបានចាប់ឆ្នោតសរុប និងបានរៀបចំរួចរាល់នូវបណ្ណកម្មសិទ្ធិចំនួន៤ ៥៥៤បណ្ណ ។

ក្នុងឱកាសអញ្ជើញសំណេះសំណាលជាមួយប្រជាពលរដ្ឋរស់នៅភូមិធម្មជាតិរុនតាឯក និងតំបន់ពាក់ស្នែង នេះ  សម្ដេចធិបតី ហ៊ុន ម៉ាណែត បានថ្លែងថា ការរៀបចំហេដ្ឋារចនាសម្ព័ន្ធ និងប្រព័ន្ធរដ្ឋបាលនៅរុនតាឯក ជាទិសដៅប្រែក្លាយតំបន់នេះទៅជាក្រុងគំរូ ។ ដូច្នេះប្រជាពលរដ្ឋនៅទីនេះជិតក្លាយជាអ្នកទីក្រុងហើយ ដោយសម្ដេចធិបតី បានស្នើក្រសួង​មហាផ្ទៃឱ្យរៀបចំភូមិធម្មជាតិរុនតាឯកឱ្យក្លាយជាក្រុងគំរូនៅខេត្តសៀមរាប។ យ៉ាងណាក៏ បើទោះបីជាក្រុងរុនតាឯក កើតក្រោយគេ ប៉ុន្តែការអភិវឌ្ឍមិនដើរក្រោយគេទេ ។ នេះតាមបើតាមប្រសាសន៍សម្ដេចធិបតី ហ៊ុន ម៉ាណែត។

សូមបញ្ជាក់ថា នៅតំបន់អភិវឌ្ឍន៍រុនតាឯក ការស្ថាបនាហេដ្ឋារចនាសម្ព័ន្ធ និងសំណង់អគារចាំបាច់នានា បាន និងកំពុងដំណើរការជាមួយនឹងលទ្ធផលល្អប្រសើរ និងបានសម្រេចតាមផែនការ ១០០% លើការងារជាអាទិ៍។ ការតភ្ជាប់បំពង់មេបញ្ជូនទឹកស្អាតចំនួន២ខ្សែ  ការតភ្ជាប់បណ្ដាញមេផ្គត់ផ្គង់អគ្គិសនី  ការស្ថាបនាផ្លូវក្រួសក្រហម​នៅតំបន់អភិវឌ្ឍន៍រុនតាឯកប្រវែង ១៦៥គីឡូម៉ែត្រ ការកសាងសាលារៀនលើផ្ទៃដី ៥,១២ហិកតា មាន៣អគារ ក្នុងនោះអគារទី១ សម្រាប់អនុវិទ្យាល័យ មាន១ខ្នង ២ជាន់ ១២បន្ទប់, អគារទី២ សម្រាប់វិទ្យាល័យ មាន១ខ្នង ២ ជាន់ ១២បន្ទប់ និងអគារទី៣ សម្រាប់ទីចាត់ការ និងបណ្ណាល័យ ១ខ្នង មាន៣បន្ទប់  ការសាងសង់មណ្ឌលសុខភាព ប៊ុន រ៉ានី ហ៊ុនសែន រុនតាឯក លើផ្ទៃដី ៣,៧៣ហិកតា រួមមាន អគារជំងឺទូទៅ ១ខ្នង, អគារសម្ភព១ខ្នង និងអគារស្នាក់នៅគ្រូពេទ្យ១ខ្នង ២ជាន់ ២០បន្ទប់  និងការដំឡើងបង្គោលអង់តែនទូរស័ព្ទចំនួន ២កន្លែង នៃផែន​ការជំហាន១។

បន្ថែមពីនេះទៀតបាននឹងងកំពុងបន្តអនុវត្តតាមផែនការនូវការងារចម្បងៗមួយចំនួនទៀត ជាអាទិ៍សាងសង់ផ្លូវបេតុងលើផ្លូវក្រួសក្រហមសម្រេចបាន ៧៤,៣៦%  ការសាងសង់ផ្សារ ៨ខ្នង លើផ្ទៃដី ៤,២៤ហិកតា សម្រេចបាន ៨០%ការកសាងវត្តរុនតាឯក លើផ្ទៃដី ៣ហិកតា សម្រេចបាន ៩៥% រួមមាន ព្រះវិហារ, ឧបដ្ឋានសាលា និងកុដិ  ការសាងសង់មណ្ឌលរដ្ឋបាលស្រុកបន្ទាយស្រី លើផ្ទៃដី៤,៣៨ហិកតា សម្រេចបាន ៨៥%  ការតភ្ជាប់បណ្តាញអគ្គិសនីតាមផ្ទះជូនប្រជាពលរដ្ឋ ចំនួន ៤ ៤៤២ គ្រួសារស្មើ ៧៥,៧៣% ៕