សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ដោយមើលឃើញពីទិន្នផលផ្លែស្វាយតែងប្រមូលផលលើសតម្រូវការទីផ្សារដែលធ្វើឱ្យតម្លៃផ្លែស្វាយធ្លាក់ចុះស្ទើររាល់ឆ្នាំនោះ អ្នកកែច្នៃកសិផលក្នុងស្រុកម្នាក់បានប្រមូលទិញស្វាយមកធ្វើការដាក់បន្ទុំ ផ្អាប់ កែច្នៃផលិតឱ្យទៅជាស្រាស្វាយដែលមានរសជាតិឆ្ងាញ់ គុណភាពល្អ និងត្រៀមចេញលក់នៅលើទីផ្សារក្នុងស្រុកនាពេលដ៏ខ្លីខាងមុខនេះជាមួយតម្លៃសមរម្យ ដែលស្របទៅនឹងគោលនយោបាយរបស់រាជរដ្ឋាភិបាលក្នុងការពង្រីកការកែច្នៃ និងជំរុញការនាំចេញនៅនឹងកន្លែង។
លោក វួច ធុច ជាម្ចាស់សិប្បកម្ម SKH Natural Plus ដែលភាពច្រើនគេស្គាល់តាមរយៈផលិតផលស្រាមៀនប៉ៃលិន បានមានប្រសាសន៍ទាក់ទងនឹងផលិតផលថ្មីនេះថា៖
«យើងមានផលិតថ្មី ជាប្រភេទស្រាស្វាយប៉ៃលិន ឬ Pailin Mango Wine ដោយយើងបានសម្រិតសម្រាំងនិងធ្វើការពិសោធប្រហាក់ប្រហែលនឹងស្រាមៀនដែរ ហើយណាមួយដោយសារមើលឃើញពីទីផ្សារ និងចង់គាំទ្រផ្លែស្វាយក្នុងស្រុកផង យើងក៏បានផលិត និងត្រៀមចេញលក់ផលិតផលនេះប្រមាណ ៥ពាន់ដបនៅចន្លោះខែសីហា ទៅខែតុលាខាងមុខនេះ»។
លោកបន្តថា៖
«សម្រាប់ការផលិតដំបូងនេះ យើងបានទិញផ្លែស្វាយកែវរមៀតពីកសិករក្នុងខេត្តប៉ៃលិនផ្ទាល់ប្រមាណ ៥តោន ដើម្បីមកកែច្នៃឱ្យទៅជាស្រាស្វាយដោយត្រូវការរយៈពេលប្រមាណ ៥ខែក្នុងការផ្អាប់ទុកដើម្បីឱ្យស្រាមានគុណភាព និងរសជាតិល្អមិនចាញ់ស្រាមៀននោះទេ»។
ចំពោះការផលិតវិញ លោកបញ្ជាក់ថា ផ្លែស្វាយមានកម្រិតអាស៊ីតខ្ពស់ជាងផ្លែមៀន ដែលធ្វើឱ្យកាផលិតស្រាក៏ខុសគ្នាតាមនោះដែរ ជាពិសេសការផ្អាប់ទុកស្វាយត្រូវចំណាយពេលខ្លីជាង ដោយសារវាកាច់លឿនជាងមៀន តែក៏ត្រូវការពេលរៀបចំ និងវេចខ្ចប់ឱ្យបានសមរម្យជាមុនសិនទើបអាចយកចេញលក់បាន។
ដោយឡែកសម្រាប់តម្លៃវិញ ស្រាស្វាយប៉ៃលិន មានតម្លៃចន្លោះពី ៨-១២ដុល្លារ ដែលក្នុងការផ្សព្វផ្សាយនេះឃើញថាមានអតិថិជនចាប់អារម្មណ៍ច្រើន ជាពិសេសបងប្អូនអ្នករស់នៅរាជធានីភ្នំពេញដែលនិយមគាំទ្រផលិតកែច្នៃក្នុងស្រុកផ្ទាល់តែម្ដង។
ជាចុងក្រោយ លោក វួច ធុច ក៏រំពឹងទុកថា ការដាក់ចេញនូវផលិតផលថ្មីនេះនឹងទទួលបានការគាំទ្របន្តទៀតពីអតិថិជនដោយសារផលិតផលនេះជាការកែច្នៃថ្មីមួយដែលបានរួមចំណែកជួយដល់កសិករក្នុងស្រុក ហើយបើមានការគាំទ្របន្ថែមទៀត លោកក៏មានគម្រោងផលិតនូវភេសជ្ជៈដូចជាទឹកមៀន ឬទឹកស្វាយបន្ថែមពីលើប្រភេទស្រា ដែលអាចជួយរកទីផ្សារកសិផលក្នុងតំបន់បានកាន់តែច្រើន៕
Account
Security
Favourite Content