ភ្នំពេញ៖  សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រ​កម្ពុជា នៅព្រឹកថ្ងៃទី៧ ខែឧសភា ឆ្នាំ២០២៤ បានអញ្ជើញជាអធិបតីប្រកាសដាក់ឱ្យអនុវត្តជាផ្លូវការនូវ «ប្រព័ន្ធបញ្ជរតែមួយជាតិ» ដែលជាសមិ​ទ្ធផលថ្មីមួយទៀតរបស់រាជរដ្ឋាភិបាលក្នុងកិច្ច​ប្រឹង​ប្រែង​​ធ្វើឱ្យប្រសើរឡើងនូវបរិយាកាសធុរកិច្ច ជំរុញការធ្វើពាណិជ្ជកម្ម និងលើកកម្ពស់​កំណើន​សេដ្ឋកិច្ចនៅកម្ពុជា។

«ប្រព័ន្ធបញ្ជរតែមួយជាតិ» គឺជាប្រព័ន្ធថ្មីមួយទៀតរបស់អគ្គនាយកដ្ឋានគយ និងរដ្ឋាករ​កម្ពុជា ដែលបំពេញបន្ថែម និងធ្វើការជាមួយប្រព័ន្ធដែលមានស្រាប់ ដូចជា E-cus​tom​s, ASYCUDA, Pre-Arrival Manifest System ជាដើម ។ ប្រព័ន្ធនេះនឹងអនុញ្ញាតឱ្យអ្នកនាំចេញ-នាំចូលទំនិញ អាចដាក់ស្នើសុំអាជ្ញាបណ្ណ លិខិតអនុញ្ញាតវិញ្ញាប​ន​បត្រ និងឯកសារតម្រូវផ្សេងទៀតពាក់ព័ន្ធការនាំចេញ-នាំចូលទំនិញ ទៅគ្រប់ក្រសួង-ស្ថាប័នមានសមត្ថកិច្ចតែមួយលើករួមគ្នា ដើម្បី​ទទួល​បានការអនុញ្ញាតសម្រាប់យកទៅប្រើប្រាស់ក្នុងការបំពេញបែប​បទបញ្ចេញ​ទំនិញ​ពីគយតាមមធ្យោបាយអេឡិចត្រូនិក។

ជាមួយគ្នានេះដែរ សម្តេចធិបតី ហ៊ុន ម៉ាណែត បានណែនាំដល់គណៈកម្មាធិការដឹកនាំគម្រោងបញ្ជរតែមួយជាតិត្រូវតាមដាន និងវាយតម្លៃការអនុវត្ត ព្រមទាំងបន្តកែលម្អ និងពង្រីកមុខងារប្រព័ន្ធ ក៏ដូចជាពង្រីកការតភ្ជាប់ទៅប្រព័ន្ធបច្ចេកវិទ្យាព័ត៌មានផ្សេងទៀត ដែលពាក់ព័ន្ធការធ្វើធុរកិច្ច និងពាណិជ្ជកម្ម ដើម្បីបន្តឆ្លើយតបតម្រូវការជាក់ស្ដែងរបស់ធុរជន។

សម្តេចធិបតិ ហ៊ុន ម៉ាណែត បានលើកឡើងថា ៖

«សូមវិស័យឯកជនចូលរួមប្រើប្រាស់ និងទាញយកអត្ថប្រយោ​ជន៍ឱ្យបានជាអតិបរមាពីប្រព័ន្ធបញ្ជរតែមួយជាតិនេះ និងចូលរួមផ្តល់មតិយោបល់សម្រាប់ការកែលម្អឱ្យកាន់តែប្រ​សើរ។ នេះជាកិច្ចការធំដែលហៅថាភាពជាដៃគូរវាងរដ្ឋ និងឯកជន ជួយគិតគូរ ជួយធ្វើ និងជួយទទួលខុសត្រូវ​។ ចំណុចនេះ នៅពេលដែលរាជរដ្ឋាភិបាលចេញគោលការណ៍រួចហើយ សូមវិស័យឯកជនចូលរួមប្រើប្រាស់ផង។ បញ្ជរតែមួយជាតិនឹងមិនដើរនោះទេ ប្រសិនបើមិនមានអ្នកចូលរួមប្រើប្រាស់។ ធ្វើល្អយ៉ាងណាក៏ដោយបើសិនជាគ្មានអតិថិជនប្រើប្រាស់ក៏មិនអាចដើរទៅមុខរួចនោះទេ»។

សូមជម្រាបថា «ប្រព័ន្ធបញ្ជរតែមួយជាតិ» ក៏មានមុខងារដ៏សំខាន់ក្នុងការតភ្ជាប់ទៅកាន់ប្រព័ន្ធបញ្ជរ​តែ​មួយ​អាស៊ាន ដើម្បីផ្លាស់ប្តូរទិន្នន័យវិញ្ញាបនបត្របញ្ជាក់ដើមកំណើតទំនិញ ទិន្នន័យ​ឯក​សារ​​ប្រតិវេទ​ន៍គយ និងទិន្នន័យឯកសារពាណិជ្ជកម្មផ្សេងទៀត តាមទម្រង់អេឡិចត្រូនិក ជា​មួយបណ្តាប្រទេសជាសមាជិកអាស៊ានផងដែរ។

សម្រាប់វិស័យសាធារណៈ ប្រព័ន្ធបញ្ជរ​តែមួយ​ជាតិ មានតួនាទីសំខាន់ក្នុងការសម្របសម្រួល និងការពង្រឹងកិច្ចសហការ រវាង​ក្រសួង ស្ថាប័នជំនាញពាក់ព័ន្ធ សំដៅបង្កើនប្រសិទ្ធភាព និងស័ក្តិសិទ្ធភាពបន្ថែមទៀត នូវកិច្ចសម្រួលពាណិជ្ជកម្ម។ ជាពិសេសសម្រួលដល់ការបំពេញឱ្យបានឆាប់នូវបែប​ប​បទ​នាំចេញ-នាំចូលទំនិញ ស្របតាមយុទ្ធសាស្រ្ត និងគោលនយោបាយ របស់រាជ​រដ្ឋាភិបាល ។

ប្រព័ន្ធនេះ ក៏នឹងផ្តល់អត្ថប្រយោជន៍សំខាន់ដល់ក្រសួង-ស្ថាប័នជំនាញពាក់ព័ន្ធឱ្យទទួល​បាននូវព័ត៌មាន និងទិន្នន័យត្រឹមត្រូវ និងទាន់ពេលសម្រាប់ធ្វើការវិភាគវាយ​តម្លៃហានិ​ភ័យ និងសម្រាប់ប្រើប្រាស់តាមតម្រូវការផ្សេងទៀត។

សម្រាប់វិស័យឯកជន ក៏នឹងទទួលបានអត្ថប្រយោជន៍ជាច្រើន ដូចជា ចំណេញ​ពេល ព្រមទាំងការកាត់បន្ថយចំណាយ ជាពិសេស ការកាត់បន្ថយការិយាធិបតេយ្យក្នុង​ការរត់ការឆ្លងកាត់ពី​ក្រសួង-ស្ថាប័នមានសមត្ថកិច្ចមួយទៅមួយទៀត និងប្រតិបត្តិករនៃវិស័យឯកជន ក៏អាចប្រើប្រាស់ឡើង​វិញនូវទិន្នន័យក្នុងប្រព័ន្ធសម្រាប់ជាប្រយោ​ជន៍ក្នុងការគ្រប់គ្រងទិន្នន័យរបស់ខ្លួនឱ្យបាន​ទាន់ពេល មានសង្គតិភាព និងមានភាពច្បាស់លាស់ផងដែរ។