ភ្នំពេញ ៖ ការបង្កើតតំបន់សហគ្រាសធុនតូច និងមធ្យមពិសេសស សម្រាប់ការកែច្នៃផលិតផលក្នុងស្រុកនឹងជួយជំរុញការអភិវឌ្ឍវិស័យនេះឱ្យកាន់តែប្រសើរ និងមានសារៈសំខាន់សម្រាប់ការពង្រីកទីផ្សារក្នុងស្រុក និងឈានដល់ការនាំចេញ ជាពិសេស អាចធានាចីរភាពនៃផលិតកម្ម និងរួមចំណែកដល់កំណើនសេដ្ឋកិច្ចរបស់កម្ពុជា។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ ដើម្បីអាចរក្សាចីរភាពនៃការផ្គត់ផ្គង់ក្នុងស្រុក និងការនាំចេញ គឺត្រូវ​បង្កើត​តំបន់​សហគ្រាស​ធុន​តូច និង​មធ្យម​ពិសេស ដែល​ផ្តោត​លើ​ការ​កែច្នៃ​ផលិតផល ហើយក្រោយពេលមានតំបន់​សហគ្រាស​ធុន​តូច និង​មធ្យម​ពិសេសរួចហើយ វានឹងអំណោយផល និងជួយលើកកម្ពស់វិស័យមួយនេះឱ្យកាន់តែរឹងមាំបន្ថែមទៀតជាមិនខាន​។

អ្នកឧកញ៉ា បានបន្ត​ថា ៖

«គោលដៅ​យើងគឺ​ជំរុញ​ឧស្សាហកម្ម​កែច្នៃ​នៅ​ថ្នាក់​ខេត្ត និង​ស្រុក ដោយ​អនុ​ញ្ញាត​ឱ្យ​វត្ថុ​ធាតុ​ដើម​ហូរ​ចូល​តំបន់​ទាំងនេះ​ដោយ​ផ្ទាល់ ។ ជាមួយនឹងការកើនឡើងនៃកិច្ចព្រមព្រៀងពាណិជ្ជកម្មសេរីរបស់កម្ពុជា ជាមួយប្រទេសដៃគូ តំបន់កែច្នៃពិសេសបែបនេះគឺជាគន្លឹះដ៏សំខាន់មួយក្នុងការជំរុញការនាំចេញ និងធានាថាផលិតផលកសិកម្មកម្ពុជាត្រូវបានកែច្នៃ១០០ ភាគរយ។ យើងមានសហគមន៍កសិកម្មទំនើបដែលបង្កើតឡើងដោយក្រសួងកសិកម្ម រុក្ខាប្រមាញ់ និងនេសាទរួចហើយ ប៉ុន្តែកម្ពុជាក៏ត្រូវការសហគមន៍ឧស្សាហកម្មដែលផ្តោតលើការកែច្នៃវត្ថុធាតុដើមដែលតម្រូវឱ្យមាននៅក្នុងតំបន់ ឬរាជធានីខេត្តទាំងអស់ផងដែរ»។

​ផលប្រយោជន៍ដែលបានពីតំបន់សហគ្រាសធុនតូច និងមធ្យមពិសេសស នឹងដើរតួនាទីយ៉ាងសំខាន់ក្នុងការប្រមូលទិញផលិតផលកសិកម្ម ដែលកសិករផលិតបានយកទៅកែច្នៃ ដែលនឹងធ្វើឱ្យឧស្សាហកម្មកែច្នែផលិតផលរបស់កម្ពុជាកាន់តែរីកចម្រើន ព្រមទាំងអាចបង្កើតការងារយ៉ាងច្រើនដល់ប្រជាពលរដ្ឋក្នុងតំបន់ទៀតផង។ ជាមួយគ្នានេះ នឹងធ្វើឱ្យបណ្តាធនាគារផ្សេងៗ មានទំនុកចិត្តក្នុងការផ្តល់ទុនដល់ផលិតករ​ផងដែរ។

អ្នកឧកញ៉ា លឹម ហេង បានបញ្ជាក់ថា ៖

«​​ខ្ញុំគិតថា វានឹងមានប្រតិបត្តិការ និងសង្វាក់ផលិតកម្មបានប្រសើរ ដោយសារមានទីតាំងពិតប្រាកដ មានរដ្ឋាភិបាលជួយគាំទ្រ ហើយធនាគារពាណិជ្ជផ្សេងៗនឹងជួយគាំទ្រដែរ ដែលកត្តានេះជាកម្លាំងចលករជួយជំរុញឱ្យមានការប្រើប្រាស់វត្ថុធាតុដើមក្នុងឧស្សាហកម្មកែច្នៃផលិតផលកសិកម្មក្នុងស្រុក​មានភាពសកម្មជាងមុន ។ ដូច្នេះហើយ ខ្ញុំជឿជាក់ថា ការបង្កើតតំបន់សហគ្រាសធុនតូច និងមធ្យមពិសេស សម្រាប់កែច្នៃផលិតផល នឹងជំរុញឱ្យវិស័យកែច្នៃផលិតផលរបស់កម្ពុជាកាន់តែរីកចម្រើន ជាការរួមចំណែកខ្លាំងជួយធ្វើឱ្យសេដ្ឋកិច្ចកាន់តែរីកចម្រើន»​។