សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ក្រុមហ៊ុនរបស់កូរ៉េខាងត្បូង Samsung Electronics បានវ៉ាដាច់ក្រុមហ៊ុនអាម៉េរិក Micron Technology ជាលើកដំបូងក្នុងនាមជាអ្នកផ្គត់ផ្គង់បន្ទះឈីបរថយន្តដ៏ធំបំផុតទី១ របស់ពិភពលោក នេះបើយោងតាមសេចក្ដីរាយការណ៍ពី Korea JoongAng Daily ។
បើទោះបីជាក្រុមហ៊ុន Samsung កំពុងជួបការប្រកួតប្រជែងខ្លាំងនៅក្នុងទីផ្សារបន្ទះឈីបប្រភេទ HBM ដែលជាឈីបល្បឿនលឿនសម្រាប់ប្រើក្នុងបច្ចេកវិទ្យា (AI) យ៉ាងណាក្ដី ប៉ុន្តែក្រុមហ៊ុននេះបានឈានមុខគេនៅក្នុងទីផ្សារឈីបសម្រាប់រថយន្ត។ ជាក់ស្ដែង យោងតាមក្រុមហ៊ុនស្រាវជ្រាវរថយន្ត S&P Global Mobility បានឱ្យដឹងថា ក្រុមហ៊ុន Samsung Electronics មានចំណែករហូតដល់ប្រមាណ ៤០ ភាគរយនៃទីផ្សារឈីបរថយន្តសរុបរបស់ពិភពលោកកាលពី២០២៥ ដែលបានកើនឡើងពី ៣៥ ភាគរយនៅក្នុងឆ្នាំ២០២៤។ ក្នុងពេលជាមួយគ្នានេះដែរ ចំណែកទីផ្សាររបស់ក្រុមហ៊ុនអាម៉េរិក Micron បែរជាធ្លាក់ចុះពី ៤០ ភាគរយមកនៅត្រឹម ៣៥ ភាគរយ និងថយមកនៅចំណាត់ថ្នាក់ទី២ ។ ការកើនឡើងនៃចំណែកទីផ្សាររបស់ក្រុមហ៊ុន Samsung Electronics ដោយសារកំណើនអតិថិជនភាគច្រើនមកពីប្រទេសចិន ដែលមានតម្រូវការឈីបដែលមានសមត្ថភាពខ្ពស់សម្រាប់បំពាក់ក្នុងដំណើរការរថយន្តកាន់តែកើនឡើង ស្របពេលដែលក្រុមហ៊ុនផលិតរថយន្តបានបន្ថែមមុខងារជំនួយអ្នកបើកបរ និងប្រព័ន្ធព័ត៌មានឲ្យកាន់តែទំនើប។ ស្រដៀងគ្នានេះ ក្រុមហ៊ុនស្រាវជ្រាវឧស្សាហកម្ម Markets and Markets បានព្យាករណ៍ថា ទីផ្សារឈីបរថយន្តរបស់ពិភពលោកនឹងកើនឡើងពី ៧៧,៤ ពាន់លានដុល្លារនៅឆ្នាំនេះ ឈានដល់ ១៣៣ ពាន់លានដុល្លារនៅត្រឹមឆ្នាំ២០៣០។
កាលពីមុន គេចាត់ទុកទីផ្សារឈីបរថយន្តជាទីផ្សារមិនសូវមានភាពរីកចម្រើនដូចទីផ្សារឈីបឧបករណ៍អេឡិចត្រូនិចនោះទេ ដោយសារតែរថយន្តមួយគ្រឿងៗមានអាយុកាលប្រើប្រាស់ក្នុងរយៈពេលយូរទម្រាំតែប្តូរថ្មី។ ប៉ុន្តែ បច្ចុប្បន្ននេះ ការផលិតរថយន្តកាន់តែមានភាពច្នៃប្រឌិត អាចបើកបរដោយស្វ័យប្រវត្តិ និងការងាកមកប្រើប្រាស់ថាមពលអគ្គិសនី ដែលជាមូលហេតុធ្វើឲ្យតម្រូវការឈីបរថយន្តកាន់តែកើនឡើងខ្ពស់។ ទីផ្សារឈីបរថយន្តបានក្លាយជាទីផ្សារមានសក្តានុពលទី២ បន្ទាប់ពីឈីបកម្រិតខ្ពស់ HBM ដែលគេប្រើជាមួយបច្ចេកវិទ្យាបញ្ញាសិប្បនិម្មិត AI ។ សូមជម្រាបថា ក្រុមហ៊ុនបច្ចេកវិទ្យារបស់ប្រទេសកូរ៉េខាងត្បូង Samsung មួយនេះ បានចូលខ្លួនក្នុងទីផ្សារបន្ទះឈីបរថយន្តតាំងពីឆ្នាំ២០១៥ មកម្ល៉េះ ដោយលក់ឈីប្រភេទ LPDDR និង UFS ហើយបន្តភាពរីកចម្រើនបន្តិចម្តងៗចាប់តាំងពីពេលនោះមកដល់ពេលបច្ចុប្បន្ន៕
Account
Security
Favourite Content