ភ្នំពេញ ៖ ប្រភពពីក្រសួងទេសចរណ៍បានឱ្យដឹងថា វិស័យទេសចរណ៍ បានបង្កើតការងារផ្ទាល់ដល់យុវជនប្រមាណ៦៣ម៉ឺននាក់ឆ្នាំ២០១៩ និងថមថយមកត្រឹម៤៥ម៉ឺននាក់ នៅឆ្នាំ២០២៣ក្រោយការស្តារឡើងវិញនៃវិស័យទេសចរណ៍បន្ទាប់ពីវិបត្តិជំងឺកូវីដ-១៩។ តាមការព្យាករណ៍ កំណើនទេសចរនឹងត្រឡប់មកប្រក្រតីវិញប្រហាក់ប្រហែលទៅនឹងឆ្នាំ២០១៩ នៅត្រឹមបំណាច់ឆ្នាំ២០២៤ ឬ ឆ្នាំ២០២៥ខាងមុខ។ ដូច្នេះតម្រូវការកម្លាំង​ពលកម្មជំនាញមានតម្រូវការប្រមាណចំនួន១៨ម៉ឺននាក់ នៅពេលខាងមុខ ដែលត្រូវទាមទារឱ្យមានការបណ្តុះបណ្តាលអ្នកជំនាញថ្មី ព្រមទាំងពង្រឹងសមត្ថភាពបុគ្គលិកដែលកំពុងបម្រើការងារបច្ចុប្បន្នផងដែរ។

យោងតាមកម្មវិធី ហូកា នៃគម្រោងអភិវឌ្ឍន៍ជំនាញ បានបញ្ជាក់ថា យុវជនចំនួន ២០០នាក់ទៀត បានត្រៀមចាក់បញ្ចូលក្នុងទីផ្សារការងារទេសចរណ៍លើជំនាញការិយាល័យជួរមុខ គេហកិច្ច សេវាកម្មម្ហូអាហារ និងភេសជ្ជៈ និងជំនាញចុងភៅនៅខេត្តសៀមរាប។ យុវជនជាង២០០នាក់ដែលមកពីខេត្តសៀមរាប កំពង់ធំ បាត់ដំបង ព្រះវិហារ បន្ទាយមានជ័យ ក្រចេះ និងកំពង់ចាម បានចូលរូមវគ្គបណ្តុះបណ្តាលជំនាញបដិសណ្ឋារកិច្ចវគ្គទី២ នៅសាកលវិទ្យាល័យអង្គរ ខេត្តសៀមរាប នាដើមសប្តាហ៍នេះ។ វគ្គបណ្តុះបណ្តាលនេះរៀបចំឡើងដោយ ក្លឹបទេសចរណ៍ខេត្តសៀមរាប សហការជាមួយដៃគូពាក់ព័ន្ធ និងមូលនិធិអភិវឌ្ឍន៍ជំនាញ (SDF)។

ថ្លែងក្នុងពិធីបើកវគ្គបណ្តុះបណ្តាល ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ និងជាប្រធានគម្រោងហូកា បានមានប្រសាសន៍ថា៖ ក្រសួងទេសចរណ៍ បានកំណត់ចក្ខុវិស័យច្បាស់លាស់ដើម្បីរួមចំណែកលើកកម្ពស់កិត្យានុភាព និងភាពធន់នៃកម្ពុជា តាមរយៈការប្រែក្លាយកម្ពុជា ជាគោលដៅទេសចរណ៍ឈានមុខប្រកប​ដោយភាពសម្បូរបែបពោរពេញដោយកាលានុវត្តភាព និងភាពកក់ក្តៅ។ នេះជាការពង្រឹង និងពង្រីកមូលធនមនុស្សដែលអាចធានាដល់និរន្តរភាព និងចីរភាពនៃការបណ្តុះបណ្តាលជំនាញវិជ្ជាជីវៈទេសចរណ៍ ដែលស្របតាមតម្រូវការទីផ្សារការងារក្នុងវិស័យទេសចរណ៍។

ឯកឧត្តមបានបញ្ជាក់ថា៖ «ដើម្បីសម្រេចចក្ខុវិស័យ​នេះ ក្រសួងទេសចរណ៍ បានដាក់ចុះគំនិតផ្តួចផ្តើមយុទ្ធសាស្ត្រ “បង្កើន ៥ អភិវឌ្ឍ៣” ឬហៅកាត់ថា “BUILD +3Ds” ដែលកំពុងដើរតួរនាទីយ៉ាងសំខាន់ក្នុងការអភិវឌ្ឍនវិស័យទេសចរណ៍កម្ពុជាបច្ចុប្បន្ន។

លោក សែត កៅ​ ប្រធានក្លឹបទេសចរណ៍ខេត្តសៀមរាប បានឱ្យដឹងថា ៖ សិក្ខាកាមចូលរួមវគ្គបណ្តុះបណ្តាលនេះមានចំនួន ២០០នាក់ (ស្រី១០៩នាក់)។ សិក្ខាកាមទាំងអស់ទទួលបានការបណ្តុះបណ្តាល​​​​បដិសណ្ឋារកិច្ចដោយផ្ទាល់លើជំនាញការិយាល័យជួរមុខ គេហកិច្ច សេវាកម្មម្ហូបអាហារ និងភេសជ្ជៈ និងជំនាញចុងភៅ។

កិច្ចសហប្រតិបត្តិការរវាងក្រសួងទេសចរណ៍ និងមូលនិធិអភិវឌ្ឍន៍ជំនាញ នឹងអាចចូលរួមស្តារឡើងវិញនូវសម្បទាវិជ្ជាជីវៈទេសចរណ៍ និងការកសាងមូលធនមនុស្ស ដោយផ្តោតលើគោលបំណងសំខាន់ចំនួន ៣រួមមាន៖

(១) លើកកម្ពស់ការបណ្តុះបណ្តាលជំនាញវិជ្ជាជីវៈទេសចរណ៍ ទាំងក្នុងទម្រង់អភិវឌ្ឍន៍ជំនាញដល់សិក្ខាកាមមុនចូលបម្រើការងារ (Pre-employment Training) ការអភិវឌ្ឍជំនាញដល់និយោជិតរបស់រោងចក្រ-សហគ្រាស (Upskilling Training) ការអភិវឌ្ឍជំនាញដល់និយោជិតដែលប្ដូរជំនាញថ្មី (Reskilling Training) ទម្រង់បណ្តុះបណ្តាលថ្មីដូចជាកម្មវិធីហ្វឹកហាត់កូនជាង (Apprenticeship) ការបណ្តុះបណ្តាលនៅកន្លែងធ្វើការ  (Work Based Learning) និងការបណ្តុះបណ្តាលតាមប្រព័ន្ធអនឡាញ។

(២) លើកកម្ពស់ការអនុវត្តមូលនិធិអភិវឌ្ឍន៍ជំនាញ តាមរយៈការអនុវត្តកម្មវិធីបណ្តុះបណ្តាលបដិសណ្ឋារកិច្ចកម្ពុជា (ហូកា) ជាមួយសមាគមឧស្សាហកម្មទេសចរណ៍ និងប្រតិបត្តិករទេសចរណ៍ដើម្បីបណ្តុះបណ្តាលជំនាញវិជ្ជាជីវៈទេសចរណ៍ដែលស្របតាមតម្រូវការទីផ្សារការងារ និងការវិវត្តថ្មីៗក្នុងវិស័យទេសចរណ៍ក្រោម ការសម្របសម្រួលដោយ គ.គ.ហ.។

(៣) ពង្រឹងសមត្ថភាពគ្រូបង្គោលទាំងថ្នាក់ជាតិ និងថ្នាក់ក្រោមជាតិ ដើម្បីបង្កើនធនធានមនុស្សដែលអាចធានាដល់និរន្តរភាព និងចីរភាព នៃការបណ្តុះបណ្តាលជំនាញវិជ្ជាជីវៈទេសចរណ៍។

គួររំលឹកថា៖ សិក្ខាកាមចំនួន ៣០០នាក់ (ស្ត្រី ៦០%) ទទួលបានការបណ្តុះបណ្តាលជំនាញផ្នែកបដិសណ្ឋារកិច្ច វគ្គទី១ (Pre-employment) ក្នុងកម្មវិធីបណ្ដុះបណ្ដាលបដិសណ្ឋារកិច្ចហូកា (HoKa) កាលពីឆ្នាំ២០២៣ ក្រោមកញ្ចប់ថវិកាបដិភាគរបស់ SDF សហការជាមួយ សមាគមក្លឹបទេសចរណ៍សៀមរាប (STC)។ ក្រោយបញ្ចប់វគ្គបណ្តុះបណ្តាលនេះ សិក្ខាកាមរហូតដល់៩៧% ទទួលបានការងារធ្វើជាមួយនឹងប្រាក់ខែសមរម្យ ដែលអាចជួយទ្រទ្រង់ជីវភាពប្រចាំថ្ងៃ និងសម្រាលបន្ទុកគ្រួសារ។

គិតចាប់ពីឆ្នាំ២០១៨ ដល់ ពាក់កណ្តាលឆ្នាំ២០២៤ SDF  បានផ្តល់ថវិកាបដិភាគ ដើម្បីគាំទ្រដល់កម្មវិធីបណ្តុះបណ្តាលមូលធនមនុស្សក្នុងវិស័យទេសចរណ៍នេះ ក្នុងទឹកប្រាក់ចំនួន ៣,៤៥លាន ដុល្លារអាមេរិក ដែលមានសិក្ខាកាមសរុបចំនួន ៤ ៤៣៤នាក់ ក្នុងនោះស្រីចំនួន ១ ៨៧១នាក់ (៤២%)៕