ភ្នំពេញ ៖ ធនាគារជាតិនៃកម្ពុជា នៅថ្ងៃទី១១ ខែកក្កដា ឆ្នាំ២០២៣ បានចុះហត្ថលេខាលើអនុស្សរណៈយោគយល់ជាមួយអាជ្ញាធររូបិយវត្ថុសិង្ហបុរី ដើម្បីអភិវឌ្ឍគម្រោង Financial Trarsparency Corridor (FTC) ក្នុងគោលបំណងបង្កើតហេដ្ឋារចនាសម្ព័ន្ធឌីជីថល ដើម្បីសម្រួលដល់ពាណិជ្ជកម្ម និងសេវាហិរញ្ញវត្ថុឆ្លងដែនសម្រាប់សហគ្រាសធុនតូច និងមធ្យម (SME) រវាងប្រទេសសិង្ហបុរី និងប្រទេសកម្ពុជា។

ក្រោមការអភិវឌ្ឍគម្រោង FTC គ្រឹះស្ថានធនាគារ និងហិរញ្ញវត្ថុនៅសិង្ហបុរីអាចធ្វើការវាយតម្លៃហិរញ្ញប្បទានលើអាជីវកម្មឆ្លងដែនរបស់សហគ្រាសធុនតូច និងមធ្យមនៃប្រទេសសិង្ហបុរី ជាមួយសហគ្រាស ធុនតូច និងមធ្យមនៃប្រទេសកម្ពុជា ដោយប្រើប្រាស់ព័ត៌មានទទួលបានពីគ្រឹះស្ថានហិរញ្ញវត្ថុនៅកម្ពុជា តាមរយៈផ្លេតហ្វម FTC។

ទន្ទឹមនឹងនេះ គ្រឹះស្ថានធនាគារនិងហិរញ្ញវត្ថុដែលផ្តល់សេវាដល់សហគ្រាស ធុនតូច និងមធ្យមនៅកម្ពុជាក៏អាចធ្វើការវាយតម្លៃហិរញ្ញប្បទាន ដោយប្រើប្រាស់ព័ត៌មានទទួលបាន ពីគ្រឹះស្ថានធនាគារនិងហិរញ្ញវត្ថុនៅសិង្ហបុរីតាមរយៈផ្លេតហ្វម FTC ផងដែរ។ ការប្រើប្រាស់ផ្លេតហ្វម FTC នេះនឹងជួយសម្រួលដល់សហគ្រាសធុនតូច និងមធ្យមនៅប្រទេសសិង្ហបុរី និងប្រទេសកម្ពុជា ពង្រីកបណ្តាញពាណិជ្ជកម្មឌីជីថលកាន់តែទូលំទូលាយតួយ៉ាងតាមរយៈបណ្ដាញ Bisness Sars Border Proxtera និងផ្ដល់ឱកាសដល់ការភ្ជាប់ទំនាក់ទំនងពាណិជ្ជកម្មកាន់តែប្រសើរក្នុងតំបន់អាស៊ាន និង តំបន់ផ្សេងៗទៀត។

ការអភិវឌ្ឍផ្លេតហ្វម FTC មានគោលបំណងបង្កើតហេដ្ឋារចនាសម្ព័ន្ធឌីធីថលសម្រាប់ផ្តល់ការព្រមព្រៀងជាមុន (consent-based) ដើម្បី សម្រួលដល់ការដោះដូរព័ត៌មានរវាងគ្រឹះស្ថានធនាគារនិងហិរញ្ញវត្ថុដែលចូលរួមក្នុងផ្លេតហ្វម នៅក្នុងប្រទេសសិង្ហបុរី និងប្រទេសកម្ពុជា លើការផ្តល់សេវាហិរញ្ញវត្ថុឆ្លងដែនដល់សហគ្រាស ធុនតូច និងមធ្យម និងគាំទ្រការវាយតម្លៃឥណទានរបស់គ្រឹះស្ថានហិរញ្ញវត្ថុលើការផ្តល់ហិរញ្ញប្បទានពាណិជ្ជកម្ម និង ការអនុលោមតាមបទប្បញ្ញត្តិស្តីពី ការប្រឆាំងការសម្អាតប្រាក់ ដើម្បីកាត់បន្ថយវិវាទពាណិជ្ជកម្ម និងហានិភ័យ។

លោកជំទាវបណ្ឌិត ជា សិរី ទេសាភិបាលរង ធនាគារជាតិនៃកម្ពុជា បានមានប្រសាសន៍ថា កាលពី ខែមីនា ប្រទេសសិង្ហបុរី និងប្រទេសកម្ពុជាបានសហការលើការចែករំលែកព័ត៌មានឥណទានរបស់អតិថិជនឆ្លងដែន ដែលធ្វើឱ្យប្រជាជននៃប្រទេសទាំងពីរកាន់តែមានភាពងាយស្រួលក្នុងការទទួល បានសេវាហិរញ្ញវត្ថុពីប្រទេសនីមួយៗ។

លោកជំទាវ បានថ្លែងបន្តថា ៖

“យើងក៏មានសេចក្តីសោមនស្សក្នុងការចូលរួមអភិវឌ្ឍគម្រោង FTC ដែលធ្វើឱ្យការចែករំលែកព័ត៌មានឆ្លងដែនរបស់ប្រទេសទាំងពីរកាន់តែមានភាពទូលំទូលាយ សម្រាប់ពាណិជ្ជកម្ម និងសហគ្រាសធុនតូច និងមធ្យម។ សហគ្រាសធុនតូច និងមធ្យម ជាឆ្អឹងខ្នងនៃសេដ្ឋកិច្ចកម្ពុជា និងសិង្ហបុរី ហើយលទ្ធភាពក្នុងការទទួលបានហិរញ្ញប្បទានឆ្លងដែនរបស់សហគ្រាស នឹងជួយដល់ប្រតិបត្តិការរបស់អាជីវកម្ម និងរួមចំណែកក្នុងការអភិវឌ្ឍសេដ្ឋកិច្ចរបស់ប្រទេសទាំងពីរឱ្យកាន់តែរីកចម្រើន។”

លោក Sopnendu Mohanty អគ្គនាយកប្រតិបត្តិបច្ចេកវិទ្យាហិរញ្ញវត្ថុនៃអាជ្ញាធររូបិយវត្ថុសិង្ហបុរី បានលើកឡើងថា ការសហការជាមួយធនាគារជាតិនៃកម្ពុជាលើការអភិវឌ្ឍគម្រោង FTC គឺជាគំនិតផ្តួចផ្តើមថ្មីនៅតំបន់អាស៊ី។ គម្រោង FTC នឹងគាំទ្រដល់លំហូរពាណិជ្ជកម្មបើកចំហសម្រាប់អាជីវកម្មជា ពិសេសសហគ្រាសធុនតូច និងមធ្យមតាមរយៈការពង្រឹង គុណភាពទិន្នន័យសម្រាប់ការផ្តល់សេវាហិរញ្ញវត្ថុរវាងប្រទេសសិង្ហបុរី និងប្រទេសកម្ពុជា។ ការណ៍នេះ នឹងនាំឱ្យមានភាពជាដៃគូកាន់តែជិតស្និទ្ធរវាងគ្រឹះស្ថានហិរញ្ញវត្ថុរបស់ប្រទេសយើងលើការអភិវឌ្ឍផលិតផល និងសេវាប្រកបដោយនវានុវត្តន៍ និងការអភិវឌ្ឍសេដ្ឋកិច្ចឱ្យកាន់តែរឹងមាំក្នុងសកលភាវូបនីយកម្មសេដ្ឋកិច្ចឌីជីថល៕