បរទេស៖​ យោងតាមប្រភពពី Inclusivebusiness.Net បានលើកឡើងថា ក្រុមហ៊ុនអង្ករ និងអាហារសរីរាង្គដ៏ធំបំផុតរបស់ថៃ Urmatt បានអនុវត្តគំរូអាជីវកម្មបរិយាបន្ន ក្នុងគោលបំណងជួយដល់សហគមន៍កសិកម្មដែលមានបញ្ហាប្រឈមផ្នែកសេដ្ឋកិច្ច និងបង្កើតឱកាសសម្រាប់កសិករដែលមានជីវភាពលំបាក។

បច្ចុប្បន្ននេះ ថៃ គឺ​ជា​ប្រទេស​នាំ​ចេញ​អង្ករ​ដ៏ធំ​មួយ​របស់​ពិភពលោក ដែលការនាំចេញអង្ករត្រូវបានប៉ាន់ស្មានថា លើសពី ៨,៥​ លាន​តោនកាលពី​ឆ្នាំ​២០២៣។  ទន្ទឹមនឹងនេះ ក្រុមហ៊ុន Urmatt គឺជាក្រុមហ៊ុនកសិកម្មសរីរាង្គដ៏ធំបំផុតមួយនៅក្នុងប្រទេសថៃដែលបានបង្កើតឡើងក្នុងឆ្នាំ១៩៨២ ដោយស្ថាបនិក Arvin Narula។ នៅទសវត្សរ៍ឆ្នាំ១៩៩០ Urmatt បានផ្លាស់ប្តូរទៅធ្វើកសិកម្មដែលមានកិច្ចសន្យាជាមួយកសិករ និងការអនុវត្តកសិកម្មសរីរាង្គ ហើយបានចាប់​ផ្តើ​ម​ផ្គត់​ផ្គង់​ផលិត​ផល​កសិកម្ម​សរីរាង្គ​​ទៅកាន់​គ្រប់​តំបន់​សំខាន់​ៗរបស់​ពិភព​លោក​។ មិនត្រឹមតែប៉ុណ្ណោះ ប្រតិបត្តិការរបស់ពួកគេបានក្លាយជាអាជីកម្មបរិយាបន្នមានលក្ខណៈរួមបញ្ចូលយ៉ាងពេញលេញផងដែរ ដោយសារពួកគេអាចផ្តល់គ្រាប់ពូជ,​ ជីកសិកម្ម, ការបណ្តុះបណ្តាល, និងជំនួយផ្សេងៗទៅកាន់កសិករ។​ បន្ថែមពីនេះ ផលិតផលកសិកម្មរបស់ Urmatt ត្រូវបានទទួលស្គាល់ដោយស្ថាប័នជាច្រើនដូចជា ស្ថាប័នវាយតម្លៃស្តង់ដារសរីរាង្គអន្តរជាតិ ECOCERT ជាដើម។ ទន្ទឹមនឹងនេះ អង្ករសរីរាង្គគឺជាលិតផលចម្បងរបស់ Urmatt ខណៈដែលពួកគេក៏កំពុងផលិត​ផល ដំណាំ​កសិកម្ម​មួយ​ចំនួន​ផ្សេងទៀត​ផង​ដែរ។

នៅក្រោមគំរូកសិកម្មជាមួយកសិករជាប់កិច្ចសន្យាជាមួយនឹងក្រុមហ៊ុន Urmatt បានធ្វើការជាមួយកសិករខ្នាតតូចជាង ៣ ០០០ នាក់នៅភាគខាងជើងប្រទេសថៃ ដែលក្នុងនោះមានសហគមន៍កុលសម្ព័ន្ធជនជាតិភាគតិចផងដែរ។ នៅក្រោមកិច្ចសន្យាជាមួយនឹង​ Urmatt កសិករត្រូវបានធានានូវប្រាក់ចំណូលខ្ពស់ជាងអ្វីដែលពួកគេនឹងទទួលបានពីពាណិជ្ជករផ្សេងទៀតដោយធានាថា ពួកគេចំណេញបន្ថែមពី ២០ ទៅ ៤០ ភាគរយថែមទៀតទាក់ទងទៅនឹងតម្លៃទំនិញ។ ជាងនេះទៅទៀត Urmatt ក៏ធ្វើការជាមួយកសិករស្ត្រីនៅក្នុងសហគមន៍ផងដែរ ដោយ ១ ភាគ ៣ នៃកសិករទាំងអស់គឺជាស្ត្រី។ Urmatt បានប្តេជ្ញាចិត្តយ៉ាងមុតមាំក្នុងការជួយដល់កសិករជាស្ត្រី ដោយស្ត្រីទាំងនោះត្រូវបានលើកទឹកចិត្ត និងផ្តល់ជូនមូលនិធិសម្រាប់គ្រាប់ពូជក៏ត្រូវបានផ្តល់ជូនផងដែរ ដើម្បីគាំទ្រដល់អាជីវកម្មដែលដឹកនាំដោយស្ត្រី។

ជាឧទាហរណ៍ Urmatt បានបង្កើតវិធីសាស្រ្តច្នៃប្រឌិតថ្មីមួយដែលបំបែកកម្ទេចផ្សិត pulp ចេញពីចំបើង ដែលជាធម្មតាត្រូវបានចាត់ទុកថាជាកាកសំណល់កសិកម្ម។ Pulp ត្រូវបានប្រើជាសម្ភារៈសម្រាប់ធ្វើការវេចខ្ចប់ដោយគ្មានសារធាតុគីមី។ ដើម្បីចូលរួមជាមួយកសិករស្ត្រីក្នុងការបណ្តាក់ទុនថ្មីនេះ Urmatt បានចុះកិច្ចសន្យាផ្តាច់មុខជាមួយស្រ្តីទាំងនោះសម្រាប់ទទួលការផ្គត់ផ្គង់ចំបើងពីពួកគេ ផ្តដែលជាប្រភពចំណូលមួយសម្រាប់ពួកគេផងដែរ។

មិនត្រឹមតែប៉ុណ្ណោះ ស្ថាបនិករបស់ Urmatt ក៏បានពង្រីកសហគ្រាសតូចៗចំនួនពីរដែលផលិតស៊ុតសរីរាង្គ និងគុយទាវ។ Hilltribe Organics បានចាប់ផ្តើមដំណើរការនៅឆ្នាំ ២០១៤ ហើយកំពុងធ្វើការជាមួយកសិករជាង ២០០ នាក់ដែលផ្គត់ផ្គង់ស៊ុតសរីរាង្គដំបូងគេនៅក្នុងប្រទេសថៃ។ លើសពីនេះ Perfect Earth Foods បានចាប់ផ្តើមដំណើរការនៅឆ្នាំ ២០១៥ ដែលផលិតអង្ករសរីរាង្គ និងគុយទាវគ្មានជាតិស្ករ ដោយផលិតចេញពីស្រូវរបស់កសិករជាប់កិច្ចសន្យារបស់ Urmatt។

ស្របពេលដែល​ពួក​គេ​បាន​គាំទ្រដល់​កសិកម្ម​សរីរាង្គ​អស់​រយៈពេល​ជាង​ពីរ​ទសវត្សរ៍​មក​ហើយ Urmatt ក៏កំពុងយកចិត្តទុកដាក់លើផលប៉ះពាល់បរិស្ថានដ៏ផងដែរ ដោយផ្ទៃដីជាង ២៥ ០០០ ហិកតា ត្រូវបានរក្សា​ដោយ​គ្មាន​ជាតិ​គីមី ដើម្បីរក្សា​ជីជាតិ​ដី។ ទន្ទឹមនឹងនោះ ពួកគេក៏បានផ្តោតលើការកាត់បន្ថយកាកសំណល់ និងការវេចខ្ចប់ផងដែរ ដោយ Hilltribe Organics កំពុងខិតខំប្រឹងប្រែងក្នុងការប្រើប្រាស់ធនធានដូចជា ឥន្ធនៈ និងថាមពល ប្រកបដោយប្រសិទ្ធភាពតាមដែលអាចធ្វើទៅបាន។ ដំណោះស្រាយនេះកាត់បន្ថយការចំណាយ និងការបំភាយនៃឧស្ម័នផ្ទះកញ្ចក់។

ទោះជាយ៉ាងណាក្តី Urmatt ក៏បានបញ្ហាប្រឈមសំខាន់ៗផងដែរ ដោយកាលពីដំបូង Urmatt បានជួបប្រទះបញ្ហាប្រឈមក្នុងការធានាថាកសិករជាប់កិច្ចសន្យាផ្តល់ទិន្នផលដែលស្របតាមតម្រូវការរបស់ក្រុមហ៊ុន។ ដើម្បីដោះស្រាយហានិភ័យនេះ ក្រុមហ៊ុនបានវិនិយោគលើការបណ្តុះបណ្តាល និងត្រួតពិនិត្យកសិករជាប់កិច្ចសន្យា ដើម្បីធានាបាននូវផលិតផលដែលមានគុណភាពជាប់លាប់។ ដូចទៅនឹងបទពិសោធន៍នៃអាជីវកម្មជាច្រើន Urmatt បានប្រឈមនឹងតម្លៃដឹកជញ្ជូនថ្លៃ ដែលកើនឡើងដោយសារការរាតត្បាត ការប្រែប្រួលអាកាសធាតុ និងវិបត្តិសេដ្ឋកិច្ចសកល។ ទោះបីជាទីផ្សារសម្រាប់ផលិតផលសរីរាង្គអាចមានភាពយឺតយ៉ាវក្នុងអំឡុងពេលទាំងនោះ ប៉ុន្តែ Urmatt នៅតែប្តេជ្ញាចិត្តក្នុងការធានាថាទំនិញរបស់ពួកគេបន្តបំពេញតម្រូវការអតិថិជន និងស្របតាមគំរូអាជីវកម្មស្នូលរបស់ពួកគេ៕