សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ហូលទំនើប ជាប្រភេទហូលដែលកែច្នៃ និងត្បាញចេញពីអំបោះធម្មតា ដែលមានតម្លៃសមរម្យ(តម្លៃទាប)ជាងហូលដែលផលិតពីសូត្រ និងកំពុងមានដំណើរការត្បាញនៅក្នុងសិប្បកម្មក្នុងស្រុកមួយកន្លែង មានឈ្មោះថា «កេរបុរាណ » បច្ចុប្បន្នមានទីតាំងស្ថិតម្ដុំវត្ដថាន់ ខណ្ឌបឹងកេងកង រាជធានីភ្នំពេញ ហើយថែមទាំងបានជួយបណ្តុះបណ្តាលជំនាញដល់ជនមានពិការភាព និងស្ត្រីតម្បាញប្រមាណ ២០០នាក់។
លោក ទ្រី សុភារៈ ជាម្ចាស់សិប្បកម្ម កេរបុរាណ ដែលកំពុងផលិតហូលទំនើប និងសម្ភារប្រើប្រាស់ដទៃទៀតនោះបានមានប្រសាសន៍ប្រាប់ AMS ថា ៖
«យើងមានផលិតផលច្រើនប្រភេទ តែផ្ដោតភាគច្រើនទៅលើការត្បាញហូលទំនើប ដោយយើងបានជួយភាគច្រើនទៅលើជនមានពិការភាព និងស្ត្រីតម្បាញតាមភូមិ ដែលអាចត្បាញយកចំណូលបន្ទាប់ពីការងារធ្វើស្រែចំការ ហើយក្រុមផលិតយើងខ្លះទៀតស្ថិតនៅតាមតំបន់ផ្សេងៗ កំពុងផលិត និងផ្គត់ផ្គង់ឱ្យយើងជាប្រចាំ មានប្រមាណ ៥០-២០០នាក់ អាស្រ័យទៅលើតម្រូវការទីផ្សារ ក៏ដូចជាការបញ្ជាទិញ»។
លោកបានបន្ថែមថា ៖
«ផលិតផលសំខាន់របស់សិប្បកម្ម គឺប្រភេទហូល ប៉ុន្តែយើងផលិតពីអំបោះ ដោយសារហូលនេះជាបច្ចេកទេសត្បាញម្យ៉ាងដែលយើងចងគាធ និងជ្រលក់ ទើបត្បាញចេញជាគោមបុរាណ ដោយពីមុនមកយើងចំណាំធ្វើហូលពីសូត្រ តែសិបុ្បកម្មយើងច្នៃធ្វើហូលពីអំបោះ ដែលមានគោមធំៗ ច្រើនពណ៌ អាចយកមកកាត់ជាសម្លៀកបំពាក់ក៏បាន ធ្វើជាផាហ៊ុម ឬច្នៃជាសម្ភារប្រើប្រាស់ក៏បាន និងមានតម្លៃសមរម្យ ថែមទាំងងាយស្រួលផលិតជាងហូលសរសៃសូត្រ»។
ពាក់ព័ន្ធទៅនឹងប្រភេទហូលទំនើបរបស់សិប្បកម្មកេរបុរាណ គឺមានចំណុចពិសេសមួយចំនួនដូចជា មានពណ៌ មានគោមស្អាត តម្លៃសមរម្យ ដោយផាហ៊ុមទំហំ ១ x ២ម៉ែត្រ តម្លៃ ១២-១៥ម៉ឺនរៀល ចំណែកឯកំណាត់ទំហំ ១ x ៤ម៉ែត្រ ដែលគេអាចអាចយកទៅកាត់ជាឈុតសម្លៀកបំពាក់បានអាវមួយ សំពត់មួយ មានតម្លៃត្រឹមតែ ១៥-២០ម៉ឺនរៀលប៉ុណ្ណោះ ដែលជាតម្លៃមួយសមរម្យជាងហូលដែលផលិតពីសរសៃសូត្រ។ ក្រៅពៅនេះ សិប្បកម្មក៏មានលក់ផលិតផលប្រើប្រាស់ និងដាក់តាំងលម្អរផ្សេងៗជាច្រើនទៀតដែលមានតម្លៃចាប់ពី ១ដុល្លារឡើងទៅដល់ ២០-៣០ដុល្លារអាស្រ័យលើប្រភេទផលិតផល។
បច្ចុប្បន្ន សម្រាប់សិប្បកម្ម កេរបុរាណ ក្រៅពីផលិត និងត្បាញហូលទំនើបចេញពីអំបោះធម្មតាដែលមានច្រើនពណ៌ ច្រើនជម្រើស ក៏មានការកែច្នៃ និងកាត់ជាសម្លៀកបំពាក់ផងដែរ ដូចជាប្រភេទអាវរលុងៗសម្រាប់ភ្ញៀវទេសចរ ងាយស្រួលពាក់ , ផលិតជាកូនកាបូបដៃ និងគ្រឿងវត្ថុអនុស្សាវរីយ៍តូចៗ សម្រាប់ដាក់តាំងលម្អផងដែរ។ ដោយឡែកចំពោះអតិថិជនរបស់កេរបុរាណ ភាគច្រើនជាអ្នកធ្វើការ និងជាអ្នកស្រឡាញ់សម្លៀកបំពាក់បែបខ្មែរលាយជាមួយនឹងភាពស៊ីវីល័យ ។
គួររំឭកដែរថា កេរបុរាណ ដំបូងឡើយជាផ្នែកមួយរបស់អង្គការកាតូលិកមួយកន្លែង ដែលជួយគាំទ្រដល់ជនមានពិការភាព មានបង្រៀនជំនាញជាអ្នកតម្បាញ និងជាងចម្លាក់។ ក្រោយមក បន្ទាប់ពីគម្រោងជំនួយត្រូវបានបញ្ចប់ លោកក៏បានប្រមូលផ្ដុំគ្នាជាក្រុមអ្នកផលិតបន្តទៀតដោយមានឈ្មោះថា សិប្បកម្ម វត្តថាន់ កម្ពុជា ហើយក្រោយមកទៀតក៏បានប្ដូរឈ្មោះ និងចុះបញ្ជីរក្រោមឈ្មោះ កេរបុរាណ ដូចសព្វថ្ងៃ។ នេះជាអ្វីដែល លោក សុភារៈ បានបញ្ជាក់ប្រាប់។
ក្រៅពីក្រុមសិប្បករដែលមានពិការភាព និងស្ត្រីមេផ្ទះ សិប្បកម្មមួយនេះក៏មានផ្ដល់ជាការងារក្រៅម៉ោងសម្រាប់និស្សិតមកពីបណ្តាខេត្តដែលខ្វះខាតដើម្បីទទួលបានចំណូលខ្លះសម្រាប់ផ្គត់ផ្គង់ការរៀនសូត្រនៅទីក្រុងភ្នំពេញផងដែរ ជាមួយនឹងការទទួលបង្រៀនជំនាញ និងផ្ដល់នូវទីកន្លែងស្នាក់នៅបណ្តោះអាសន្ន ផ្តល់ការហូបចុក តាមលទ្ធភាពដែលសិប្បកម្មមាន។ សម្រាប់គោលបំណងទៅថ្ងអនាគត លោក សុភារៈ ចង់ពង្រឹងគុណភាពកំណាត់ឱ្យកាន់តែល្អ មានសោភ័ណភាព និងពណ៌កាន់តែស្រស់ស្អាត ដែលអាចផ្គត់ផ្គង់នៅក្នុងស្រុកជំនួសការនាំចូលមកពីប្រទេសជិតខាង៕
Account
Security
Favourite Content