បរទេស ៖ កាលពីល្ងាចថ្ងៃសុក្រ សប្ដាហ៍កន្លងទៅនេះ ឯកសារសំងាត់ទ្រង់ទ្រាយធំ និងសំខាន់បំផុតរបស់មន្ទីរប៉ង់តាហ្គោនត្រូវបានបែកធ្លាយនិងបានចេញផ្សាយជាបន្តបន្ទាប់នៅតាមបណ្តាញសារព័ត៌មាន និងបណ្តាញសង្គមចាប់តាំងពី Twitter, Telegram និងវេបសាយជាច្រើនទៀត។ តាមរយៈព្រឹត្តិការណ៍នេះ ត្រូវបានគេមើលឃើញថា ជាហេតុការណ៍បែកធ្លាយឯកសារដ៏អាក្រក់បំផុតរបស់រដ្ឋាភិបាលអាមេរិកគិតចាប់តាំងតែពីពេលដែលបុរសជនជាតិអាមេរិក លោក Edward Snowden បានបើកកកាយឯកសារសំងាត់ប្រហែលពី ៩ ០០០ទៅ ១០ ០០០ឯកសារកាលពីឆ្នាំ២០១៣។

នៅ BBC ក្រុមការងារបានទាញយកឯកសារសំងាត់ត្រឹមតែ២០ឯកសារប៉ុណ្ណោះ ខណៈដែលមានការអះអាងជាច្រើនបានបង្ហាញថាឯកសារសំងាត់ទាំងជាង១០០ឯកសារនោះគឺជាបណ្តុំព័ត៌មានដ៏សំងាត់ទៅលើបញ្ហាជាច្រើនបូករួមទាំងចិន និងតៃវ៉ាន់ រុស្ស៊ី និងអ៊ុយក្រែន ព្រមទាំងបញ្ហាផ្សេងទៀដូចជាអ៊ីស្រាអ៊ែល និងកូរ៉េខាងត្បូងផងដែរ។

ព័ត៌មានសំងាត់ត្រឹមតែជាង២០ភាគរយដែល BBC បានទទួលត្រូវបានយកមកចេញផ្សាយដោយទូរទស្សន៍របស់អង់គ្លេសថា ជាបណ្តុំឯកសារដែលលំអិតទៅលើព័ត៌មាន និងផែនការជាច្រើននៅក្នុងកិច្ចខិតខំប្រឹងប្រែងរបស់រដ្ឋាភិបាលវ៉ាស៊ីនតោនក្នុងការជួយដល់រដ្ឋាភិបាលអ៊ុយក្រែនដើម្បីប្រយុទ្ធប្រឆាំងទៅនឹងប្រទេសរុស្ស៊ីដោយក្នុងនោះមានទាំងតួលេខនៃការបាត់បង់ជីវិត និងទំហំខូចខាតទាំងសងខាងផងដែរ។

តួលេខដែលមាននៅក្នុងឯកសារសំងាត់ដែលទទួលបានដោយ BBC បានបង្ហាញថា សហរដ្ឋអាមេរិកបានធ្វើការព្យាករណ៍ថាអ្នកបាត់បង់ជីវិតនៅភាគិខាងរុស្ស៊ីប្រមាណជា ១៨៩ ៥០០នាក់ និងរបួស ២២៣ ០០០នាក់ ខណៈដែលអ៊ុយក្រែនមានអ្នកបាត់បង់ជីវិតប្រហាក់ប្រហែលគ្នា១២៤ ៥០០នាក់ និងរបួស ១៣១ ០០០នាក់។

ក្រៅពីនោះគេសង្កេតឃើញមានព័ត៌មានសំងាត់របស់អ៊ីស្រាអ៊ែលផងដែរ ដែលក្រោយមកបន្តិចនាយករដ្ឋមន្ត្រីអ៊ីស្រាអ៊ែល លោក Benjamin Netayahu បានចេញមកធ្វើការបដិសេធរបាយការណ៍សំងាត់ដែលបានចេញផ្សាយថា ភ្នាក់ងារសំងាត់អ៊ីស្រាអ៊ែលគឺជាអ្នកបានជួយជំរុញពីក្រោយឲ្យទាំងបុគ្គលិក​ និងពលរដ្ឋក្នុងការចូលរួមបាតុកម្មដ៏ធំកាលពីខែមិនាកន្លងមកក្នុងការតវ៉ាប្រឆាំងទៅនឹងរដ្ឋាភិបាលអ៊ីស្រាអ៊ែល។

ដោយឡែក មន្ត្រីរដ្ឋាភិបាលកូរ៉េខាងត្បូងដែលក្រោយទទួលបានព័ត៌មានសំងាត់បែកធ្លាយទាំងនោះ ក៏បានបញ្ជាក់ថា ជួបពិភាក្សាជាមួយនឹងភាគីអាមេរិកដើម្បីពិនិត្យថា វាជាការពិតដែរឬទេដែលឯកសារបានសរសេរថាអាមេរិកកំពុងលួចតាមដានលើសម្ព័ន្ធមិត្តរបស់កូរ៉េខាងត្បូងទាំងអស់នោះ។ ឯកសារលេចធ្លាយផ្សេងទៀតបានបង្ហាញអំពីមហិច្ឆិតា និងផែនការរបស់ក្រុមទាហានស៊ីឈ្នួលក្នុងប្រតិបត្តិការនៅក្នុងរដ្ឋជាច្រើននៅតំបន់អាហ្វ្រិក និងក៏ដូចជាប្រទេសហៃទីផងដែរបានអះអាងថា អាមេរិកបានបំផ្លាញគម្រោងផ្គត់ផ្គង់អាវុធដោយសម្ងាត់ជាច្រើនពីសមាជិកអង្គការណាតូរួមទាំងប្រទេសតួកគីផងដែរ៕