សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជិះកង់ដឹកកញ្ច្រែងដាក់ធុងបាយដំណើប មានកំប៉ុងស្ករលាយល្ង និងសាច់ដូងកោសរួចដាក់ក្នុងកន្ត្រក អមជាមួយនឹងកូនឆ័ត្រត្រដាងពីលើ ស្ត្រីវ័យចំណាស់ម្នាក់លក់នំសូយ និងពោតកំបោរ បានតស៊ូជិះក្រោមកម្ដៅថ្ងៃ លក់ពីមួយកន្លែងទៅមួយកន្លែង ហើយអាចរកចំណូលបានជាង១០ម៉ឺនរៀលក្នុងមួយថ្ងៃ។
ដៃកោសដូងបណ្ដើរ អ្នកស្រី យ៉ាត់ រីន ជាអ្នកលក់នំសូយ និងពោតកំបោរតាមកង់ចល័តនៅម្ដុំព្រែកលៀប និងជ្រោយចង្វារបានប្រាប់ AMS ឱ្យដឹង ៖
« រាល់ថ្ងៃនេះខ្ញុំលក់មានច្រើនមុខ ដូចជា សូយ ពោតកំបោរ ពោតបុក ត្រប៉ែ ធ្វើខ្លួនឯង ក្រៅពីនេះក៏មានអន្សមចេក អន្សមផ្អែម នំចាក់ចាន់ ទទួលមកលក់បន្តផងដែរ។ ខ្ញុំចេញលក់ចាប់ពីម៉ោង ៧ព្រឹក រហូតដល់ល្ងាចហើយអាចរកបាន ១៣-១៤ម៉ឺនរៀលក្នុងមួយថ្ងៃ ដោយផាត់ទូទាត់ថ្លៃដើមហើយនៅសល់លុយចំណេញខ្លះ តែស្រួលចិត្តជាងធ្វើការរោងចក្រមិនបាច់មានគេថា ស្ដីបន្ទោសឱ្យច្រើន»។
ដោយសារតែត្រូវចម្អិនភ្លាមៗ ស្ត្រីវ័យចំណាស់រូបនេះ ត្រូវងើបពីព្រឹកម៉ោង ៣ទាបភ្លឺ ដើម្បីរៀបចំចំហុយបាយដំណើប ត្រៀមគ្រឿងផ្សំ និងសម្ភារផ្សេងៗ មុននឹងចាក់ចេញពីផ្ទះនៅម្ដុំស្ពានព្រែកតាម៉ាក់ មករៀបដាក់លើកង់ ហើយចេញលក់ចាប់ពីម៉ោង ៧ព្រឹក។ ចំណែកវត្ថុធាតុដើមដូចជាអង្ករដំណើប ពោត ដូងជាដើម សុទ្ធសឹងជាកសិផលធម្មជាតិដែលទិញកសិករនៅក្នុងស្រុកស្រីសន្ធរ ខេត្តកំពង់ចាមផ្ទាល់តែម្ដង។
ចំពោះការលក់នេះផងដែរ អ្នកស្រីបានបញ្ជាក់ឱ្យដឹងថា ជារៀងរាល់ថ្ងៃ ភាគច្រើនអ្នកស្រីឈប់លក់នៅមុខសាលារៀន ធនាគារ ផ្សារទំនើប និងមុខកន្លែងទីប្រជុំជនផ្សេងទៀត ដែលមានមនុស្សចេញចូលច្រើន ដោយនំសូយមួយដុំ និងនំផ្សេងទៀតមានតម្លៃចាប់ពី ១០០០រៀលឡើងទៅ អាស្រ័យតាមចង់ការបានរបស់អតិថិជនកម្ម៉ង់។
យ៉ាងណាក៏ដោយ សម្រាប់អាជីវកម្មខ្នាតតូចលក់នំចល័តមួយនេះក៏ជួបប្រទះនូវផលលំបាកផងដែរទាក់ទងនឹងអាកាសធាតុ ដូចជា ត្រូវប្រឈមជាមួយនឹងកម្តៅថ្ងៃ មានថ្ងៃខ្លះភ្លៀងខ្លាំង ដែលអ្នកស្រីត្រូវមានឆ័ត្រ ឬពាក់អាវភ្លៀង និងទុកដាក់នំឱ្យបានល្អ ចៀសវាងចូលទឹកខូចអស់។ ក្នុងករណីលក់មិនអស់ គឺមានតែចែកបងប្អូន និងអ្នកជិតខាងហូបជាបង្អែមបន្ទាប់ពីហូបបាយហើយតែប៉ុណ្ណោះ៕
Account
Security
Favourite Content