បរទេស ៖ យោងតាមប្រភពពី FX Street បានបង្ហាញថា​ តម្លៃមាសនៅក្នុងសប្ដាហ៍នេះនៅតែស្ថិតនៅកម្រិតមួយដែលរឹងមាំបើទោះបីជាធនាគារកណ្តាលអាមេរិមិនទាន់មានវិធានការច្បាស់លាស់លើអត្រាការប្រាក់ថ្មីក៏ដោយ។

នៅក្នុងសប្ដាហ៍នេះ ទីផ្សារតម្លៃមាសបានបន្តឡើងថ្លៃបន្តិចប្រមាណ ០,១០ ភាគរយ​ ឬ ១ ៩១៥ ដុល្លារក្នុងមួយអោន ប៉ុន្តែនៅតែទាបជាងការឡើងថ្លៃដល់កម្រិតខ្ពស់រយៈពេល ២ សប្តាហ៍មុនៗ។ ទន្ទឹមនឹងនេះ សន្ទស្សន៍ប្រាក់ដុល្លារអាមេរិក (DXY) វាស់ស្ទង់ឃើញថា តម្លៃប្រាក់ដុល្លារទាបជាងរូបិយប័ណ្ណសំខាន់ៗចំនួន ៦ ។ លើសពីនេះ ប្រាក់ដុល្លារអាមេរិកចុះខ្សោយពីកម្រិតខ្ពស់បំផុតរបស់ខ្លួនចាប់តាំងពីដើមខែមិថុនា ដែលជាទូទៅត្រូវបានគេមើលឃើញថា ប្រាក់ដុល្លារគឺជាកត្តាសំខាន់ដែលមានឥទ្ធិពលដល់តម្លៃមាស។ ជាលទ្ធផល វិនិយោគិនកំពុងព្រួយបារម្ភអំពីគោលនយោបាយរូបិយវត្ថុ និងអត្រាការប្រាក់នាពេលអនាគត។ ពួកគេយល់ឃើញថា ធនាគារកណ្តាលអាមេរិកអាចនឹងរឹតបន្តឹងគោលនយោបាយហិរញ្ញវត្ថុបន្ថែមទៀត ដែលអាចប៉ះពាល់ដល់តម្លៃមាស។

កាលពីថ្ងៃសុក្រចុងសប្ដាហ៍ន្លងទៅនេះ នៅក្នុងសុន្ទរកថានៃសន្និសីទ Jackson Hole ប្រធានធនាគារកណ្តាលលោក Jerome Powell បាននិយាយថា ធនាគារកណ្តាលអាមេរិកប្រហែលជាត្រូវដំឡើងអត្រាការប្រាក់បន្ថែមទៀត ដោយសារអត្រាអតិផរណានៅតែខ្ពស់។ លោកបានបន្ថែមថា អ្នកបង្កើតគោលនយោបាយនឹងចាត់វិធានការយ៉ាងប្រុងប្រយ័ត្ន នៅពេលសម្រេចចិត្តថាតើត្រូវរឹតបន្តឹងបន្ថែមទៀត ឬរក្សាអត្រាការប្រាក់ថេរ។

ក្នុងអំឡុងពេលនៃអតិផរណាខ្ពស់ និន្នាការនៃតម្រូវការមាសមានការកើនឡើង ដោយសារអ្នកវិនិយោគស្វែងរកទ្រព្យសម្បត្តិដែលមានសុវត្ថិភាពក្នុងការទប់ទល់នឹងអតិផរណា។ មិនត្រឹមតែប៉ុណ្ណោះ ​ការ​ដំឡើង​អត្រា​ការ​ប្រាក់ធ្វើឲ្យកំណើននៃតម្រូវការមាស​កើនឡើងផងដែរ ដោយសារមនុស្សទិញមាសដើម្បីបម្រុងទុកជាទ្រព្យសម្បត្តិដែលមានសុវត្ថិភាព។ បើទោះបីជា មាសត្រូវបានចាត់ទុកថាជាគ្រឿងមានតម្លៃសម្រាប់ទប់ទល់នឹងអតិផរណា ប៉ុន្តែវាមិនសូវទទួលបានការចាប់អារម្មណ៍នៅលើទីផ្សារបច្ចុប្បន្ននេះ ដែលអាចបង្ហាញថាជាសញ្ញាអវិជ្ជមាន។ តម្លៃមាសនៅទូទាំងពិភពលោកបានធ្លាក់ចុះជិតដល់កម្រិតទាបក្នុងរយៈពេល ៤ ខែកន្លងមកនេះ ខណៈដែលអ្នកវិនិយោគសង្ឃឹមថាតម្លៃនឹងធ្លាក់ចុះត្រឹម​កម្រិត ១, ៩០០ ដុល្លារក្នុងមួយអោន៕