បរទេស ៖ ទោះបីជាស្ថានភាពជម្លោះរវាងអ៊ុយក្រែន និងរុស្ស៊ី មិនទាន់ត្រឡប់មកជាសះស្បើយក្តី ប៉ុន្តែបើយើងក្រឡេកទៅមើលទំនាក់ទំនងរវាងរុស្ស៊ី និងអាម៉េរិកវិញ ហាក់ដូចជាបានធូរស្រាលខ្លាំងឡើង ជាពិសេសក្នុងអាណត្តិដឹកនាំថ្មីដោយលោក Donald Trump។

ក្នុងដំណាក់កាលធូរស្រាលរវាងក្រុងវ៉ាស៊ិនតោន និងក្រុងមូស្គូ វាបានជះឥទ្ធិពលយ៉ាងខ្លាំងទៅដល់តម្លៃរូបិយបណ្ណរបស់ប្រទេសរុស្ស៊ី គឺលុយរូបល (ruble) ឲ្យហក់ឡើងទៅដល់កម្រិតមួយដែលខ្ពស់បំផុតមិនធ្លាប់មានក្នុងរយៈពេល២ឆ្នាំចុងក្រោយនេះធៀបជាមួយនឹងលុយដុល្លារអាម៉េរិក (US Dollar)។

អ្នកជំនាញផ្នែកសេដ្ឋកិច្ចបានមើលឃើញថា ស្ថានភាពភូមិសាស្ត្រនយោបាយដែលល្អប្រសើរ និងក្តីសង្ឃឹមទៅលើដំណោះស្រាយនៅអ៊ុយក្រែនអាចនឹងកើតឡើងឆាប់ៗក្រោមកិច្ចខិតខំប្រឹងប្រែងសម្របសម្រួលដោយអាម៉េរិកផ្ទាល់ផងនោះគឺជាកត្តាដ៏សំខាន់ដែលបានជួយឲ្យលុយរូបលរុស្ស៊ីកើនឡើងតម្លៃប្រមាណជា១១ភាគរយគិតចាប់តាំងតែពីខែមីនាឆ្នាំនេះ។

បច្ចុប្បន្ន តម្លៃរបស់លុយរូបលបានកើនឡើងទៅដល់ ៧៨,៩ ក្នុងមួយដុល្លារអាម៉េរិកខណៈដែលស្ថានភាពសេដ្ឋកិច្ច និងទីផ្សាររបស់រុស្ស៊ីកំពុងទទួលបានទំនុកចិត្តត្រឡប់មកវិញដោយសារការផ្សារភ្ជាប់ទៅនឹងសញ្ញានៃការធ្វើឱ្យមានលក្ខណៈធម្មតាមកវិញនៅក្នុងទំនាក់ទំនងជាមួយសហរដ្ឋអាម៉េរិក និងការសន្ទនាជាមួយអ៊ុយក្រែនលើដំណោះស្រាយនយោបាយ។

អ្នកវិភាគជាច្រើនបានមើលឃើញថា ការកើនឡើងនៃតម្លៃលុយរូបលនេះក៏ត្រូវបានគាំទ្រដោយប្រតិបត្តិការទិញ-លក់កាន់តែច្រើននៃប្រាក់ចំណូលរូបិយប័ណ្ណបរទេសដោយអ្នកនាំចេញតាមរយៈការបង់ពន្ធ និងភាគលាភ និងការធ្លាក់ចុះតម្រូវការពីអ្នកនាំចូលជាដើម។ អ្នកចូលរួមទីផ្សារត្រូវបានគេរាយការណ៍ថាបាននាំគ្នាតាមដានយ់ាងជិតស្និទ្ធទៅលើការវិលត្រឡប់របស់ក្រុមហ៊ុនបរទេសទៅកាន់ទីផ្សាររុស្ស៊ី និងការបន្ធូរបន្ថយទណ្ឌកម្មដែលអាចកើតមានពីសំណាក់អាម៉េរិក និងលោកខាងលិចផងដែរចំពោះទីផ្សាររុស្ស៊ី។

គួរឲ្យដឹងដែរថា មកដល់បច្ចុប្បន្ននេះ រដ្ឋាភិបាលទីក្រុងមូស្គូ និងទីក្រុងវ៉ាស៊ីនតោន បានចាប់ផ្តើមតភ្ជាប់ទំនាក់ទំនងការទូតកម្រិតខ្ពស់ឡើងវិញជាបន្តបន្ទាប់ចាប់តាំងពីប្រធានាធិបតីអាមេរិក លោក Donald Trump បានឡើងចូលកាន់តំណែង ហើយលោក Trump បាន​អំពាវនាវ​ម្តង​ហើយ​ម្តង​ទៀត​ឱ្យ​មានដំណោះស្រាយ​យ៉ាង​ឆាប់រហ័ស​ចំពោះ​ជម្លោះ និង​ការ​កំណត់​ឡើងវិញ​នូវ​ទំនាក់ទំនង​ទ្វេភាគី​រវាង​រុស្ស៊ី និង​អាម៉េរិក។ បន្ថែមពីនេះផងដែរ កាលពីសប្តាហ៍កន្លងទៅ ប្រធានាធិបតីរុស្ស៊ី លោក Vladimir Putin ជាមួយនឹងលោក Trump បានជជែកគ្នាតាមទូរស័ព្ទរយៈពេល ២ម៉ោងកន្លះ ហើយមេដឹកនាំទាំង២ បានអះអាងដូចគ្នាថា វាគឺជាកិច្ចសន្ទនាដ៏មានផ្លែផ្កា និងផលិតភាពបំផុតមួយ៕