ភ្នំពេញ ៖ ដូងគឺជាដំណាំមួយប្រភេទដែលផ្ដល់នូវអត្ថប្រយោជន៍ច្រើន ដោយគ្រាន់តែផ្លែដូងមួយផ្នែកអាចឱ្យកសិករទាញយកផលទាំងសាច់ដូង ទឹកដូង ក្រឡោកដូង និងស្រកីដូង។ ក្នុងនោះ មានសិប្បកម្មក្នុងស្រុកមូយបានកែច្នៃប្រេងចម្រាញ់ចេញពីផ្លែដូង ទៅជាផលិតផលប្រើប្រាស់ រួមជាមួយនឹងការវេចខ្ចប់គិតគូរពីបរិស្ថាន។

ដៃ ខ្មែរ ជាយីហោរបស់សិប្បកម្មក្នុងស្រុកមួយ ដែលមានផ្គត់ផ្គង់នូវផលិតផលច្នៃពីប្រេងដូងធម្មជាតិទៅជាផលិតផលច្រើនមុខ រាប់ចាប់ពីថែរក្សាសម្រស់តាមបែបធម្មជាតិផង ផលិផលប្រើប្រាស់ជាទូទៅផង ប្រកបដោយគុណភាព និងសុវត្ថិភាពសម្រាប់អ្នកប្រើប្រាស់។

អ្នកស្រី វត្ថា វិច្ឆិកា ស្ថាបនិកក្រុមហ៊ុន ដៃ ខ្មែរ នេត្រជ្រល ប្រដាក់ ឯ.ក បានថ្លែងប្រាប់ថា ៖

“ផលិតផលរបស់ដៃ ខ្មែរ ជាផលិតផលដែលប្លែកពីគេ គឺពួកយើងផលិតផ្ទាល់នូវវត្ថុធាតុដើមក្នុងស្រុកដល់ទៅ ៨០ ភាគរយ ក្នុងការផលិត  បូករួមទាំងការវេចខ្ចប់ ដោយប្រើក្រដាស់ដើមចេក ដើម្បីខ្ចប់សាប៊ូ ក៏ដូចជាការច្នៃដូងទំាងត្រឡោកជាផលិតផលថ្មីៗ សម្រាប់បំពេញតម្រូវការទីផ្សារ”

អ្នកស្រី បានបន្តថា ក្រុមហ៊ុនរបស់ពួកយើងផ្តោតទៅលើការកែច្នៃផ្លែដូងទៅជាប្រេង រួចយកមកបង្កើតផលិតផលជាច្រើនមុខដូចជា ប្រេងដូងត្រជាក់ សាប៊ូ ក្រេមលាបបបូរមាត់ ក្រមួនលាបមុខ ឡេលាបប្រអប់ដៃ ម៉ាស់បិទមុខ ម្សៅធ្យូងដុសធ្មេញ ប្រេងព្យាបាលសង្វារ សេរ៉ូមលាបមុខ ស្ព្រៃបាញ់ព្យាបាលស្បែកជាដើម។

សម្រាប់តម្លៃវិញ ផលិតផលរបស់ក្រុមហ៊ុននេះមានតម្លៃចន្លោះពី ៣-២២ដុល្លារ ហើយផលិតផលដែលទទួលការគាំទ្រ ទាំងអតិថិជនបរទេស និងអតិថិជនខ្មែរ ទាំងក្នុងរាជធានី និងតាមបណ្ដាខេត្តគឺ សាប៊ូមុនខ្នង (សាប៊ូធ្យូង ឯកទេសព្យាបាលមុនខ្នង) ដែលភាគច្រើនអតិថិជនប្រើហើយ បានផលដល់ទៅ ៨០-៩០ភាគរយ។ ចំពោះបរិមាណផលិត ក្រុមហ៊ុនអាចមានលទ្ធភាពផលិតប្រចាំខែបានក្រោម ៥០០០ ឯកតា ដែលអាចផ្គត់ផ្គង់ត្រឹមតែ ០.០៣ភាគរយ នៃប្រជាជនកម្ពុជាលើទីផ្សារតែប៉ុណ្ណោះ។

គួរបញ្ជាក់ដែរថា អ្នកស្រី វត្ថា វិច្ឆិកា បានចាប់ផ្ដើមអាជីវកម្មនេះនៅឆ្នាំ ២០១៤ ដោយពេលនោះ ស្ថាបនិករូបនេះបានធ្វើដំណើរទៅថតម៉ូតសំលៀកបំពាក់អ្នកច្នៃម៉ូតរបស់អាមេរិចម្នាក់ និងបានជួបជាមួយនឹងអតីតដៃគូរសហការ ដែលគាត់បានចាប់ផ្តើមផលិតប្រេងដូងមួយរយៈមកហើយ កំឡុងពេលនោះ។ ពួកគាត់បានពិភាក្សាអំពីការងារ ដែលអាចជាផ្នែកមួយជួយដល់សង្គម ពិសេសស្ត្រី និងបរិស្ថាន ទើបគាត់បានចាប់ផ្ដើមអាជីវកម្មនេះដោយប្រកាន់ភ្ជាប់នូវទស្សនវិស័យលើកស្ទួយអំណាចស្រ្តីក្នុងប្រទេសកម្ពុជាផ្ទាល់តែម្ដង។

ដោយឡែក សម្រាប់ការចាប់ផ្ដើនៅក្នុងអាជីវកម្មដៃ ខ្មែរ អ្នកស្រីបានឱ្យដឹងថា យើងប្រើដើមទុនដំបូងប្រមាណ ៨០០ ដុល្លារ ដោយបានចំណាយទៅលើបុគ្គលិក វត្ថុធាតុដើម សំបកវេចខ្ចប់ និងការបង្កើតវេបសាយជាដើម។ ចំណែកផលលំបាកវិញ ភាគច្រើនទាក់ទងនឹងការធ្វើទីផ្សារដោយខ្លួនឯងផ្ទាល់ ការគ្រប់គ្រងបុគ្គលិក ហើយការផលិតក៏នៅមានទំហំតូចនៅឡើយ។

ទន្ទឹមនេះ ស្ថាបនិក ដៃ ខ្មែរ ក៏សូមថ្លែងអំណរគុណដល់អតិថិជនដែលតែងតែគាំទ្រផលិតនានារបស់ ដៃ ខ្មែរ កន្លងមក ហើយអ្នកស្រីក៏មានគម្រោងថា នឹងធ្វើការជ្រៀតចូលទីផ្សារក្នុងស្រុកឱ្យកាន់តែទូលំទូលាយ ពិសេសវាជាផ្នែកមួយក្នុងការផ្តល់ការងារ និងលើកកម្ពស់ជីវភាពស្រ្តីឱ្យបានកាន់តែច្រើននៅតាមបណ្តាខេត្ត៕