បរទេស ៖ ឱនភាពពាណិជ្ជកម្មរបស់សហភាពអឺរ៉ុបជាមួយប្រទេសចិនបានឈានដល់កំណត់ត្រា ១ ពាន់លានអឺរ៉ូមួយថ្ងៃ ដែលជំរុញឱ្យមានក្ដីព្រួយបារម្ភពីអនាគតនៃឧស្សាហកម្មរបស់សហភាពអឺរ៉ុបទាំងមូល នេះបើយោងតាមសេចក្ដីរាយការណ៍ពី The Guardian កាលពីថ្ងៃដើមសប្ដាហ៍នេះ។

យោងតាមទិន្នន័យពាណិជ្ជកម្មផ្លូវការពី EU Eurostat បានឱ្យដឹងថា គម្លាតពាណិជ្ជកម្មដែលសហភាពអឺរ៉ុបទិញទំនិញពីចិនច្រើនជាងលក់ទៅឱ្យចិនវិញ មានទំហំរហូតដល់ ៣១,៩ ពាន់លានអឺរ៉ូ (៣៦,៩ ពាន់លានដុល្លារអាម៉េរិក) ក្នុងខែមេសា​ កន្លងទៅនេះ។ បើគិតជាមធ្យម ឱនភាពពាណិជ្ជកម្មបានឈានដល់ ១ ពាន់លានអឺរ៉ូ (១,១៥ ពាន់លានដុល្លារអាម៉េរិក) ក្នុងមួយថ្ងៃ។ ទិន្នន័យនេះត្រូវបានចេញផ្សាយនៅពេលដែលមេដឹកនាំអឺរ៉ុបត្រៀមជួបប្រជុំគ្នានៅថ្ងៃព្រហស្បតិ៍ខាងមុខនេះ ដើម្បីពិភាក្សាអំពីវិធានការដោះស្រាយអតុល្យភាពពាណិជ្ជកម្មដែលកំពុងកើនឡើង រួមមាន ការកើនឡើងនៃចំនួនរថយន្តអគ្គិសនីរបស់ចិននៅទូទាំងប្លុកអឺរ៉ុប និងការពឹងផ្អែកលើគ្រឿងបង្គុំរបស់ចិន។

លោក Rafael Jimenez Buendía អ្នកជំនាញពាណិជ្ជកម្មបានលើកឡើងថា បើតាមការកត់សម្គាល់កាលពីពេលកន្លងទៅនវ ទំហំនៃឱនភាពពាណិជ្ជកម្មសម្រាប់ខែឧសភា និងខែមិថុនា ទំនងជាកើនឡើងបន្ថែមទៀត។ ការនាំចេញត្រូវបានកត់ត្រាដោយគយចិនរួចហើយ ប៉ុន្តែដោយសារការដឹកជញ្ជូនតាមកប៉ាល់សមុទ្រត្រូវចំណាយពេលរាប់សប្តាហ៍ទើបមកដល់អឺរ៉ុប ដូច្នេះ ទំនិញទាំងនោះមិនទាន់ត្រូវបានកត់ត្រាក្នុងប្រព័ន្ធគយរបស់អឺរ៉ុបនៅឡើយទេ។ មានន័យថា ឱនភាពពាណិជ្ជកម្ម ១ ពាន់លានអឺរ៉ូក្នុងមួយថ្ងៃ ទំនងជានឹងកើនឡើងបន្ថែមនៅខែឧសភា និងមិថុនា ។

លោក Alexander Julius ប្រធានសមាគម Eurometal តំណាងឱ្យអ្នកទិញផលិតផលដែក បានព្រមានថា ចិនកំពុងតែបំផ្លាញវិស័យឧស្សាហកម្មរបស់អឺរ៉ុប និងបានអំពាវនាវឱ្យមេដឹកនាំសហភាពអឺរ៉ុបយកចិត្តទុកដាក់ខ្ពស់ចំពោះហានិភ័យដែលងាយនឹងកើតឡើងដល់រោងចក្រនៅទូទាំងអឺរ៉ុប។

លោក Alexander Julius និយាយថា ៖

«យើងពិតជារងទុក្ខវេទនាខ្លាំងណាស់ ហើយអ្នកនយោបាយកំពុងដើរក្នុងទិសដៅខុសទាំងស្រុង ដោយពួកគេមិនដឹងថា ចិនកំពុងបំផ្លាញឆ្អឹងខ្នងឧស្សាហកម្មរបស់អឺរ៉ុបប៉ុណ្ណានោះទេ។ ប្រសិនបើយើងកាន់តែពឹងផ្អែកលើចិនទាំងស្រុង នោះចិននឹងកំណត់ថាត្រូវផ្តល់ផ្នែកណាខ្លះឱ្យយើង ដែលយើងមិនផលិតទៀត ប៉ុន្តែពួកគេនឹងកំណត់បរិមាណ និងតម្លៃ»។

ស្របពេលដែលអតិរេកពាណិជ្ជកម្មកំពុងកើនឡើង មានការព្រមានថា សហភាពអឺរ៉ុបអាចធ្លាក់ចូលវិបត្តិ “China Shock 2.0” ដែលជាបទពិសោធន៍របស់អាម៉េរិកធ្លាប់ជួបប្រទះកាលពី ២០ ឆ្នាំមុន នៅពេលដែលចិនចូលជាសមាជិកអង្គការពាណិជ្ជកម្មពិភពលោក (WTO) ដែលកាលនោះបានធ្វើឱ្យរោងចក្រអាម៉េរិកជាច្រើនត្រូវបិទទ្វារ។ កាលពីដើមខែមិថុនានេះ ស្នងការពាណិជ្ជកម្មអឺរ៉ុប លោក Maroš Šefčovič បញ្ជាក់ដែរថា ឱនភាពនេះត្រូវតែដោះស្រាយ។ អ្នកវិភាគបានព្យាករណ៍ថា គណៈកម្មការអឺរ៉ុបកំពុងពិភាក្សាលើជម្រើសដំណោះស្រាយជាច្រើន ប៉ុន្តែការដំឡើងពន្ធគយគឺជាជម្រើសដែលមានលទ្ធភាពតិចតួចបំផុត និង ស្មុគស្មាញខ្លាំង ដោយសារត្រូវទាមទារឱ្យមានកិច្ចព្រមព្រៀងផ្នែកនយោបាយពីសមាជិករបស់សហភាពអឺរ៉ុបទាំងអស់។ ជម្រើសមួយទៀតអាចសម្រេចបានជាងនេះ គឺការកំណត់កូតាដាក់លើការនាំចូលសារធាតុគីមី និងរថយន្តកូនកាត់ពីប្រទេសចិនតែម្ដង។

ទោះជាយ៉ាងណាក្ដី រដ្ឋាភិបាលទីក្រុងប៉េកាំងបានច្រានចោលជាច្រើនដងមកហើយ ពាក់ព័ន្ធនឹងការចោទប្រកាន់របស់លោកខាងលិចថា ក្រុមហ៊ុនចិនទទួលផលប្រយោជន៍ដោយអយុត្តិធម៌ពីការឧបត្ថម្ភធនរបស់រដ្ឋ។ កាលពីសប្តាហ៍មុន ចិនបញ្ជាក់ថា ខ្លួនមិនដែលបង្កើតយុទ្ធសាស្ត្រដេញជើងយកប្រៀបខាងពាណិជ្ជកម្មដោយចេតនានោះឡើយ ពោលគឺវាហូរទៅតាមយន្តការទីផ្សារសេរីតែប៉ុណ្ណោះ។ ចិនប្រកែកវិញដែរថា ទំហំពាណិជ្ជកម្មដែលអឺរ៉ុបខាតបង់យ៉ាងច្រើនសន្ធឹកសន្ធាប់នោះ គឺកើតចេញពីក្រុមហ៊ុនរបស់អឺរ៉ុបខ្លួនឯងដែលបានទៅបោះទុនបង្កើតរោងចក្រផលិតនៅប្រទេសចិន ដើម្បីកាត់បន្ថយថ្លៃដើម និងនាំចេញបន្តទៅកាន់តំបន់អឺរ៉ុប។ គួរកត់សម្គាល់ថា​ នៅក្នុងខែមិថុនានេះ ចិនបានលុបចោលកិច្ចប្រជុំការទូតភ្លាមៗចំនួន ២ លើកជាមួយសហភាពអឺរ៉ុប ដោយគ្មានការបកស្រាយពន្យល់ពីមូលហេតុនោះទេ។ នៅក្នុងន័យការទូត ការលុបចោលភ្លាមៗដោយគ្មានការពន្យល់ គឺជាការគំរាមបែបទន់ភ្លន់តែពោរពេញដោយអំណាច។ ចិនកំពុងបង្ហាញសញ្ញាថា ខ្លួនមិនពេញចិត្តនឹងគោលនយោបាយពាណិជ្ជកម្មរបស់សហភាពអឺរ៉ុប ប៉ុន្តែគេមិនចេញសេចក្ដីព្រមានជាផ្លូវការនោះទេ និងចង់ឲ្យសហភាពអឺរ៉ុបសម្រួលគោលនយោបាយរបស់ខ្លួនឡើងវិញ។ នេះគឺជាការដាក់សម្ពាធ​តាម​រយៈ​ការ​អវត្តមានជា​ជាង​ការ​ប្រឈម​មុខ​ដាក់​គ្នា។

ដោយឡែក នៅក្នុងកិច្ចប្រជុំក្រុមប្រទេស G7 ប្រធានាធិបតីបារាំង លោក Emmanuel Macron អាចនឹងយកឱកាសមួយនេះស្វែងរកវិធីសាស្ត្របែបសហប្រតិបត្តិការ ពោលគឺការចរចាគ្នាដោយសន្តិវិធី និងការយោគយល់គ្នាទៅវិញទៅមករវាងសហភាពអឺរ៉ុប និងចិន មុនពេលដែលតំបន់អឺរ៉ុបសម្រេចថា តើត្រូវពង្រឹងគោលនយោបាយពាណិជ្ជកម្មរបស់ខ្លួនចំពោះប្រទេសចិន ឬយ៉ាងណា? សុមជម្រាបដែរថា បើទោះជាចិនមិនមែនជាសមាជិក G7 និងគ្មានវត្តមាននៅក្នុងកិច្ចប្រជុំដ៏សំខាន់មួយនេះ ប៉ុន្តែមហាអំណាចយក្សចិនមួយនេះនៅតែជាប្រធានបទដ៏រសើបដែលកិច្ចប្រជុំ G7 នឹងលើកយកមកជជែកដេញដោលដែលមិនអាចរំលងបានឡើយ៕