ព្រះសីហនុ ៖ ទំនប់រលក ជាតំបន់មានសក្ដានុពលផ្នែកធនធានពីផ្ទៃសមុទ្រដ៏ធំល្វឹងល្វើយ និងជាតំបន់ផ្គត់ផ្គង់គ្រឿងសមុទ្រចម្បងមួយក្នុងខេត្តព្រះសីហនុ ដែលទូកនេសាទទាំងធំ ទាំងតូចកំពុងមមាញឹកក្នុងការរៀបចំចេញទៅនេសាទ។ តាមរយៈការចេញនេសាទនេះជាចំណែកមួយ អាចដោះស្រាយជីវភាពប្រជានេសាទបានមួយផ្នែកធំផងដែរ។

លោក កាន់ ជឿន ហៅ ប្រុស វ័យ ៥០ឆ្នាំ ជាអ្នកស៊ីឈ្នួលចុះទូកនេសាទម្នាក់រស់នៅភូមិ៣ សង្កាត់១ ក្រុងព្រះសីហនុ ខេត្តព្រះសីហនុ ឬគេនិយមហៅតាមតំបន់ថា ទំនប់រលក បានប្រាប់ឱ្យដឹងថា លោកប្រកបរបរនេសាទរាប់ឆ្នាំមកហើយ។ បច្ចុប្បន្នទីផ្សារគ្រឿងសមុទ្រ គឺល្អជាងមុន។ ប៉ុន្តែពិបាករកជាងមុនផងដែរ ដោយសារតែមានអ្នកនេសាទកាន់តែច្រើនឡើង។
លោកបន្តថា ក្នុងការនេសាទលើផ្ទៃសមុទ្រនេះ លោកទទួលបានកម្រៃក្នុងមួយខែប្រមាណជាង ៣០០ដុល្លារក្នុងការដោះស្រាយជីវភាព បើគិតទៅបានប្រមាណ៧ម៉ឺនរៀលក្នុងមួយថ្ងៃ។ ត្បិតមិនមានទូកដោយខ្លួនឯងក្ដី តែការស៊ីឈ្នួលនេះ ក៏អាចរកចំណូលចិញ្ចឹមគ្រួសារដែលកំពុងរស់នៅក្នុងខេត្តកំពតបានផងដែរ។

ដោយឡែកការនេសាទវិញត្រូវបានអ្នកនេសាទរូបនេះរៀបរាប់ថា គេអាចចេញទៅនេសាទពេលណាក៏បានឱ្យតែអាកាសធាតុអំណោយផល ដែលភាគច្រើនអ្នកនេសាទ ចេញទៅឆ្ងាយៗ តាមកោះនានា ប្រមាណ ៧ ទៅ១០ថ្ងៃទើបត្រឡប់ចូលច្រាំងវិញ។ នៅពេលចេញនេសាទក្នុងមួយទូកអាចមានគ្នាពី  ៣ ឬ ៤នាក់ដើម្បីជួយគ្នា និងឆ្លាស់វេនគ្នា តែសម្រាប់រូបលោកផ្ទាល់លោកនេសាទតែពេលថ្ងៃប៉ុណ្ណោះ។
ចំពោះផលនេសាទដែលទទួលបានរួមមាន ក្ដាម បង្គារ ពិសេស គឺមឹកបំពង់ដែលគេអាចរកបានច្រើនជាងគេ ។ ពេលដែលចេញនេសាទម្ដងៗ គេក៏មានទឹកកកដើម្បីរក្សាទុកគ្រឿងសមុទ្រដែលរកបាន លុះពេលត្រឡប់ចូលច្រាំងវិញទើបលក់បន្តឱ្យឈ្មួញនានាដែលរងចាំទិញយកទៅលក់បន្ត។

គួរបញ្ជាក់ដែរថា លោក កាន់ ជឿន បានចាប់អាជីពជាអ្នកនេសាទនេះប្រមាណជាង ៣០ឆ្នាំមកហើយ ដោយសារតែលោកមានដើមកំណើតនៅខេត្តកំពត និងមានគ្រួសារជាអុ្នកនេសាទស្រាប់។ ទោះបីត្រូវចេញទៅ នេសាទ ចាកឆ្ងាយច្រាំងយូរថ្ងៃយ៉ាងណាក្ដី ក៏អ្នកនេសាទរូបនេះនៅតែរីករាយក្នុងការងារ ដែលជាប្រភពផ្ដល់ចំណូលដល់គ្រួសារ។
សូមបញ្ជាក់ផងដែរថា សង្កាត់ទំនប់រលកត្រូវបានប្ដូរទៅជាឃុំទំនប់រលក និងប្រកាសលេខ ៤៩៣ ប្រ.ក របស់ក្រសួងមហាផ្ទៃ។ ឃុំនេះស្ថិតនៅក្នុងស្រុកស្ទឹងហាវ ខេត្តព្រះសីហនុ ដែលមានភូមិចំណុះចំនួន ៤ គឺភូមិ១ ភូមិ២ ភូមិ៣ និងភូមិ៤។ តំបន់នេះក៏មានសហគមន៍នេសាទ តំបន់ការពារព្រៃលិចទឹក និងព្រៃកោងកាង ក៏ដូចជាសក្ដានុពលធនធានសមុទ្រជាច្រើនទៀតដែលបានចុះកិច្ចព្រមព្រៀង ទាំងកន្លែកនេសាទសហគមន៍ ការចូលរួមអភិរក្ស និងការពារធនធានសមុទ្រ ធ្វើយ៉ាងណាឱ្យតំបន់មានអាចអភិវឌ្ឍទៅបានប្រកបដោយនិរន្តរភាព៕

អត្ថបទដោយ ៖ នី ស្រីពៅ