ភ្នំពេញ ៖ ក្រសួងពាណិជ្ជកម្ម និងមូលនិធិអន្តរជាតិសម្រាប់ការអភិវឌ្ឍកសិកម្ម (IFAD) បានប្រកាសព័ត៌មានរួមមួយកាលពីថ្ងៃទី១៦ ខែធ្នូ ឆ្នាំ ២០២៥ ដោយបានបញ្ជាក់ពីការបញ្ចប់បេសកកម្មត្រួតពិនិត្យ និងវាយតម្លៃប្រចាំឆ្នាំលើការអនុវត្តគម្រោងជំរុញទីផ្សារសម្រាប់កសិកម្មខ្នាតតូច (អេមស៍) ដោយគម្រោងនេះបានចាប់ផ្តើមពីថ្ងៃទី១ ដល់ ១២ ខែធ្នូ ឆ្នាំ២០២៥។

គម្រោងជំរុញទីផ្សារកសិកម្មខ្នាតតូច(អេមស៍) បាន និងកំពុងជួយគាំទ្រដល់កសិករខ្នាតតូចចំនួន ៩៤ ៤៩៩ គ្រួសារ លើសពីគោលដៅដែលបានកំណត់ត្រឹមចំនួន ៨៨ ២០០ គ្រួសារតែប៉ុណ្ណោះសម្រាប់ការអនុវត្តគម្រោងរហូតដល់ឆ្នាំ២០២៧ ហើយនៅតែបន្តគាំទ្រកសិករខ្នាតតូចក្នុងការអនុវត្តបច្ចេកទេសផលិតកម្មដែលមានភាពប្រសើរ ជួយសម្របសម្រួលទីផ្សារឱ្យកាន់តែរឹងមាំ និងពង្រីកភាពជាដៃគូពាណិជ្ជកម្មឱ្យបានកាន់តែទូលំទូលាយផងដែរ។

ឯកឧត្តម អេង សុធីវ័ន្ត អគ្គនាយកនៃអគ្គនាយកដ្ឋានពាណិជ្ជកម្មក្នុងប្រទេស និងជានាយកគម្រោងអេមស៍ បានមានប្រសាសន៍ថា៖

«គម្រោង អេមស៍ កំពុងមានវឌ្ឍនភាពល្អមកដល់ពេលនេះ គឺដោយសារមានកិច្ចសហការយ៉ាងរឹងមាំពី​ក្រុមការងារនៅទូទាំងខេត្តគោលដៅ និងដៃគូវិស័យឯកជនរបស់យើង។ ជាមួយនឹងការទទួលបានហិរញ្ញប្បទានបន្ថែម យើងនឹងបន្តធ្វើការពង្រឹងចង្កោមអាជីវកម្ម និងការតភ្ជាប់ទីផ្សារ ដើម្បីផ្តល់អត្ថប្រយោជន៍ឱ្យបានកាន់តែច្រើនដល់កសិករខ្នាតតូចរបស់យើង។»

សូមជម្រាបថា ការកៀរគរកសិករខ្នាតតូចរបស់គម្រោងដើម្បីបង្កើតជាចង្កោមអាជីវកម្មនៅតែបន្តរីកចម្រើនទៅមុខ ដោយមានចង្កោមអាជីវកម្មចំនួន ៣៤៧ ត្រូវបានបង្កើតឡើង និងអត្រានៃការទទួលយកបច្ចេកវិទ្យាផលិតកម្មមានចំនួន ៨៤% នៃចំនួនកសិករដែលចូលរួមក្នុងគម្រោង។ ដោយឡែក គិតត្រឹមខែតុលា ឆ្នាំ២០២៥ អេមស៍ បានសម្របសម្រួលការចុះកិច្ចសន្យាទិញលក់បានសរុបចំនួន ៩០៥ កិច្ចសន្យា សម្រាប់ខ្សែច្រវាក់តម្លៃផលិតផលស្រូវប្រណីត បន្លែសុវត្ថិភាព គ្រឿងទេស មាន់ខ្មែរ និងដំឡូងមី ដែលមានតម្លៃសរុបប្រមាណ ២២៤ លានដុល្លារអាម៉េរិក។

ក្នុងអំឡុងពេលទស្សនកិច្ចនៅក្នុងខេត្តចំនួន៦ ក្រុមការងារបេសកកម្មរបស់ IFAD និងក្រុមកងារគម្រោង អេមស៍ បានជួបជាមួយក្រុមកសិករផលិតចង្កោមអាជីវកម្ម អ្នកទិញ និងមន្ទីរពាណិជ្ជកម្មខេត្ត ដើម្បីវាយតម្លៃលើការតភ្ជាប់ទីផ្សារ ការប្រើប្រាស់ហេដ្ឋារចនាសម្ព័ន្ធ បញ្ហាប្រឈមក្នុងផលិតកម្ម និងការទទួលបានសេវាកម្មបច្ចេកទេស និងហិរញ្ញប្បទានជាដើម។ ឱកាសដែលបានកំណត់សម្រាប់គម្រោង​ជាបន្តរួមមាន ការពង្រឹងផែនការអាជីវកម្ម និងការកំណត់ពេលវេលាផលិតកម្មសម្រាប់ចង្កោមអាជីវកម្មឱ្យស្របទៅតាមទីផ្សារ ជំរុញការប្រើប្រាស់ហេដ្ឋារចនាសម្ព័ន្ធទាក់ទងនឹងទីផ្សារក្រោមមូលនិធិសម្រាប់ការអភិវឌ្ឍតាមវិស័យឱ្យកាន់តែមានប្រសិទ្ធិភាព ពង្រីកការវិនិយោគវិស័យឯកជនតាមរយៈមូលនិធិនវានុវត្តន៍ខ្សែច្រវាក់តម្លៃ និងការដោះស្រាយបញ្ហាប្រឈមផ្នែកបច្ចេកទេស ដូចជា ការគ្រប់គ្រងជំងឺលើដំណាំម្ទេស ការចាក់វ៉ាក់សាំងមាន់ និងការពង្រឹងគុណភាពគ្រាប់ពូជជាដើម។

លោក Frew Behabtu នាយក និងជាតំណាង IFAD ប្រចាំប្រទេសកម្ពុជា បានគូសបញ្ជាក់យ៉ាងដូច្នេះថា៖ គម្រោង អេមស៍ បានធ្វើដំណើរឈ្ពោះទៅមុខប្រកបដោយស្ថិរភាព ក្នុងការពង្រឹងផលិតកម្មដែលបំពេញទៅតាមតម្រូវការរបស់ទីផ្សាររួមជាមួយនឹងចង្កោមអាជីវកម្ម ដែលបានតភ្ជាប់កសិករខ្នាតតូចទៅកាន់អ្នកទិញនៅក្នុងខ្សែច្រវាក់តម្លៃសំខាន់ៗបានកាន់តែច្រើនឡើងៗ។

លោកថា ៖

«បេសកកម្មត្រួតពិនិត្យ និងវាយតម្លៃការអនុវត្តគម្រោងនេះ បានបញ្ជាក់ឱ្យឃើញពីលទ្ធផលជាក់ស្តែង និងឱកាសច្បាស់លាស់ក្នុងការពង្រឹងបន្ថែមទៀតនូវការធ្វើផែនការអាជីវកម្ម ការប្រើប្រាស់ហេដ្ឋារចនាសម្ព័ន្ធ និងការចូលរួមរបស់វិស័យឯកជន។ ការអភិវឌ្ឍបន្ថែមដោយផ្អែកលើមេរៀនបទពិសោធទាំងនេះ គឺពិតជាមានសារៈសំខាន់ក្នុងការធ្វើឱ្យទំនាក់ទំនងផ្នែកពាណិជ្ជកម្មកាន់តែមានភាពស៊ីជម្រៅ និងអាចដោះស្រាយគម្លាតផលិតកម្ម និងសេវាកម្មដែលនៅសេសសល់បាន»។

ក្នុងបេសកកម្មខាងលើ អេមស៍ ក៏បានបន្តការប្តេជ្ញាចិត្តយ៉ាងមុតមាំក្នុងការរួមបញ្ចូលយេនឌ័រនៅរាល់សកម្មភាពរបស់គម្រោងផងដែរ ដោយក្នុងនោះស្ត្រីមានចំនួនដល់ទៅ ៦២% នៃអ្នកទទួលផលគម្រោងទាំងអស់ ហើយបេសកកម្មនេះ ក៏បានលើកទឹកចិត្តដល់ការវិនិយោគបន្ថែមទៀតលើតួនាទីស្ត្រីជាអ្នកដឹកនាំនៅក្នុងចង្កោមអាជីវកម្ម និងក្រុមអ្នកផលិត។

ក្រសួងពាណិជ្ជកម្ម និង IFAD នឹងបន្តធ្វើការយ៉ាងជិតស្និទ្ធ ដើម្បីជំរុញការអនុវត្តគម្រោង អេមស៍ ឱ្យកាន់តែមានប្រសិទ្ធភាព ហើយក្រុមការងារបេសកកម្មគ្រោងនឹងចុះគាំទ្រការអនុវត្តគម្រោងជាបន្តទៀត នៅក្នុងខែមេសា ឆ្នាំ២០២៦ ខាងមុខ។ បេសកកម្មត្រួតពិនិត្យ និងវាយតម្លៃគម្រោងប្រចាំឆ្នាំម្តងទៀត ក៏នឹងគ្រោងធ្វើឡើងក្នុងចន្លោះខែវិច្ឆិកា និងខែធ្នូ ឆ្នាំ២០២៦ ផងដែរ។

សូមបញ្ជាក់ថា ក្នុងឆ្នាំ២០២៤ IFAD បានអនុម័តហិរញ្ញប្បទានបន្ថែមចំនួន ២០លានដុល្លារអាម៉េរិក សម្រាប់អនុវត្តគម្រោងរយៈពេល ៣ឆ្នាំ បន្តទៀត ចាប់ផ្តើមពីខែតុលា ឆ្នាំ២០២៤ ហើយនឹងត្រូវបញ្ចប់ក្នុង ខែកញ្ញា ឆ្នាំ២០២៧ខាងមុខ៕