ភ្នំពេញ  ៖ ស្របតាមការណែនាំរបស់​ធនាគារ​ជាតិនៃកម្ពុជា ធនាគារ​អេស៊ីលីដា ភីអិលស៊ី ដែលជាធនាគារ​ខ្មែរ​ធំជាង​គេ​មួយបាន​ត្រៀមលុប​បំណុល​ និងពន្យារការសង​ជូន​អតិថិជន​ដែលផលប៉ះពាល់​ដោយ​សា​រការ​ឈ្លានពានពីសំណាក់​យោធាថៃនៅតាមបណ្ដោយព្រំដែន កម្ពុជា-ថៃ គិតជាទឹកប្រាក់ប្រមាណ១០០លានដុល្លារអាម៉េរិក ។ នេះបើតាមលោ​ក​បណ្ឌិត អ៊ិន ចាន់​នី ប្រធាននាយកប្រតិបត្តិធនាគារ​អេស៊ីលីដា ភីអិលស៊ី ក្នុងសន្និសីទ​សារព័ត៌​មាន​មួយកាលពី​រសៀលថ្ងៃទី​១៦ ខែធ្នូ ឆ្នាំ២០២៥ ។​

លោកបណ្ឌិត អ៊ិន ចាន់​នី ​បានមានប្រសាសន៍ថា កាលពី​ក្នុងអំឡុងខែកក្កដា ឆ្នាំ២០២៥ ដែល​យោធាថៃ​បានចូលឈ្លានពាន​កម្ពុជា ធនាគារ​អេស៊ីលីដា បានលុប​បំណុល​ម្ដងរួចហើយជូន​អតិថិជនដែលជា​យោធិនពលី ពិការ និងអ្នករួម​ខ្ចី​ ក្នុង​ទំហំទឹកប្រាក់​សរុប​ជាង ​៤លាន ២សែនដុល្លារ​អាម៉េរិក ។ ដោយឡែក ថ្មីៗនេះដែរ ការ​បំពាន​ពី​សំណាក់​ប្រទេសថៃមកលើ​កម្ពុជា​បានកើតឡើងម្ដងទៀត​ ធ្វើ​ឱ្យ​ធនាគារត្រូវ​សិក្សា​បន្ទាន់ និង​បានត្រៀមលុប​បំណុលប្រមាណ៣០លានដុល្លារអាម៉េរិកជូន​អតិថិជន​ដែលជា​យោធិនពលី ឬពិការ​ក្នុង​សមរភូមិ និងអ្នក​រួមខ្ចី និង​ពន្យារការ​សង​ប្រាក់គិតជាទឹកប្រាក់​ប្រមាណ៧០លានដុល្លារអាម៉េរិកជូនដល់អតិថិជនដែលជា​ជនភៀសសឹក  ។ ការអនុវត្ត​នេះ គឺស្របទៅតាម​ការ​ណែនាំ​របស់ធនាគារ​ជាតិនៃកម្ពុជា ដែលបានចេញប្រកាស​កាលពីថ្ងៃទី១០ ខែធ្នូ ឆ្នាំ ២០២៥ ។

លោកបណ្ឌិត​ បានមានប្រសាសន៍ថា​ សង្គ្រាមដែលបង្កឡើង​ដោយ​ការ​ឈ្លានពាន​ពីប្រទេស​ថៃមកលើកម្ពុជា​តាមព្រំដែន បានធ្វើឱ្យសាខា​ធនាគាររបស់​​អេស៊ីលីដា​ចំនួន២៥ រងផលប៉ះពាល់​ ដោយមានសាខាខ្លះត្រូវ​ផ្អាក​ប្រតិបត្តិការ ហើយសាខាខ្លះទៀតដែល​នៅឆ្ងាយ​ពីតំបន់សមរភូមិក្ដៅធ្វើប្រតិបត្តិការ​ដោយប្រុងប្រយ័ត្ន ។ សម្រាប់​សាខាធនាគារ​ទាំង ​២៥នោះ​ មាន​ទំហំឥណទាន​សរុបប្រមាណ ៧០០លានដុល្លារអាម៉េរិក ដែលមានអតិថិជនជាង​ ៥ម៉ឺន ២ពាន់នាក់ ខណៈអតិថិជនដែលផ្ញើ​ប្រាក់​នៅ​សាខាទាំង​២៥ នៅតាមបណ្ដោយព្រំដែនមានចំនួន ៣២ម៉ឺននាក់ បើគិតជាទំហំទឹកប្រាក់​មានចំនួន ៥០០លានដុល្លារអាម៉េរិក ។

លោកបណ្ឌិត ​អ៊ិន​ ចាន់​នី បានបន្ថែមថា​ ក្រៅពីការត្រៀមលុប​បំណុល និង​ពន្យារការសងប្រាក់ជូនអតិថិជន​ដែល​រង​ផលប៉ះពាល់​ ធនាគារ​អេស៊ីលីដា ក៏បាន​ចូលរួម​ឧបត្ថម្ភ​ជាស្បៀង​ដល់កងទ័ព​ និងជន​ភៀសសឹក ក្នុងនោះរួមមាន​ការ​ផ្ដល់​អង្ករសរុប​​ ១៥០តោន ដល់​បណ្ដាខេត្ត​ចំនួន៩ ដែល​រងផលប៉ះពាល់​តាមរយៈសាលា​រាជធានីភ្នំពេញ ។ ចំពោះ មូលនិធិ​វិញ ធនាគារ​អេស៊ីលីដា ក៏បានចូលរួមជាទឹកប្រាក់​ចំនួន ២០០លានរៀល និង​ចូលរួមទៅសាលារៀន​​ដែលមានផល​ប៉ះពាល់​តាមរយៈក្រសួង​អប់រំយុវជន និងកីឡា ចំនួន​​១០០លានរៀលផងដែរ  ។​

លោកបណ្ឌិត​បញ្ជាក់ថា ការ​ចូលរួម​ឧបត្ថម្ភគាំទ្រទាំង​នេះ គឺដោយសារតែការលះបង់របស់ភាគហ៊ុនិក​ ថ្នាក់ដឹកនាំ កម្មករ​ និយោជិត ​ក៏ដូចជា​អតិថិជនរបស់ធនាគារ​អេស៊ីលីដា​ទាំងអស់​ ដែលបានរួមគ្នា​ចូលជាវិភាគទាន​ ក៏ដូចជា​បច្ច័យ ​និងស្បៀង​ ។​

យោងតាមសេចក្ដីណែនាំរបស់ធនាគារជាតិនៃកម្ពុជា ចុះថ្ងៃទី ១០ ខែធ្នូ ឆ្នាំ២០២៥ ស្ដីពី វិធានការជួយសម្រួលបន្ទុកដល់ប្រជាពលរដ្ឋដែលរងផលប៉ះពាល់ពីជម្លោះព្រំដែនកម្ពុជា-ថៃ បានណែនាំឱ្យគ្រឹះស្ថានធនាគារ និងហិរញ្ញវត្ថុ ផ្ដល់នូវការអនុគ្រោះដល់អតិថិជន ជាជនភៀសសឹក យោធិនពិកា និងយោធិនពលីនៅក្នុងជម្លោះព្រំដែនកម្ពុជា-ថៃ នាពេលថ្មីនេះ ដោយក្នុងនោះ សម្រាប់អតិថិជនដែលជាយោធិនពិកានៅក្នុងសមរភូមិបច្ចុប្បន្ន នឹងទទួលបានការលុបចោលបំណុលរហូតដល់ ១០លានរៀល។ ចំណែកឯអតិថិជន ឬអ្នករួមខ្ចី ជាយោធិនពលី នឹងទទួលបានការលុបចោលបំណុលរហូតដល់ ៨០លានរៀល ៕