សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតត្រឹមឆ្នាំ២០២៥នេះ នៅទូទាំងប្រទេសកម្ពុជា មានសំណង់អគារខ្ពស់ចាប់ពី៥ជាន់ឡើងចំនួន ៣ ២៥៤អគារ ដោយក្នុងនោះឃើញថារាជធានីភ្នំពេញ ខេត្តព្រះសីហនុ និងខេត្តបន្ទាយមានជ័យ មានសំណង់អគារខ្ពស់ជាច្រើនជាងគេ ដែលមានសរុបរហូតដល់ ៣ ១២៧អគារ ។ នេះ បើតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ ។
របាយការណ៍ដដែលបានបង្ហាញថា រាជធានីភ្នំពេញ នៅតែបន្តជាប់លេខ១ ដែលមានសំណង់អគារខ្ពស់ច្រើនជាងគេ ចំនួន ១៩៥៤អគារ បន្ទាប់មកគឺខេត្តព្រះសីហនុ មានសំណង់អគារខ្ពស់ ចំនួន ៧៧៣ អគារ និងខេត្តបន្ទាយមានជ័យ មានសំណង់អគារខ្ពស់ចាប់ពី៥ជាន់ឡើងទៅចំនួន ៤០០អគារ។
ដោយឡែក ចំនួនអគារខ្ពស់ៗចាប់ពី៥ជាន់ ដល់ ៩ជាន់នៅទូទាំងប្រទេសមានចំនួន ១ ៩០៥អគារ ហើយអគារខ្ពស់ចាប់ពី ១០ជាន់ដល់១៩ជាន់មានចំនួន ៨៥១អគារ និងអគារខ្ពស់ចាប់ពី២០ជាន់ដល់ ២៩ជាន់ មានចំនួន ២៧៧អគារ ។ អគារខ្ពស់ចាប់ពី៣០ជាន់ដល់៣៩ជាន់ចំនួន ១៥៩អគារ និងអគារខ្ពស់ៗដែលមានកម្ពស់ចាប់ពី៤០ជាន់ឡើងទៅ មានចំនួនរហូតដល់៦៥អគារ ។
ក្រៅពីអគារខ្ពស់ៗទាំងនេះ ការអភិវឌ្ឍសំណង់ក៏មានដូចជាបុរីលំនៅឋាន អគារផ្ទះល្វែង អគារស្នាក់នៅរួម និងអគារផ្សេងៗទៀត ដោយក្នុងនោះ គម្រោងអភិវឌ្ឍន៍បុរីលំនៅឋាន គិតចុងឆ្នាំ ២០២៥ មានចំនួន ៦៩៨គម្រោង អគារលំនៅឋានមានចំនួន ១២១ ០៨៨ខ្នង អគារស្នាក់នៅរួម ឬខុនដូ មានចំនួន ៧៨៧គម្រោង សំណង់លំនៅឋានមានចំនួន ៤២ ៩១៣គម្រោង សំណង់សណ្ឋាគារចំនួន១៦៦គម្រោង សំណង់អគារពាណិជ្ជកម្មមានចំនួន ៣ ៧៥៣គម្រោង សំណង់អគាររោងចក្រមានចំនួន ១១ ១៨១គម្រោង និងសំណង់អគារពហុមុខងារមានចំនួន ៤១៦គម្រោង ។
គួររម្លឹកថា វិស័យសំណង់ដើរតួនាទីយ៉ាងសំខាន់ក្នុងការស្ដារ និងអភិវឌ្ឍសង្គមជាតិ និងជំរុញកំណើនសេដ្ឋកិច្ចគ្រួសារ ក៏ដូចជាសេដ្ឋកិច្ចសង្គមជាតិដែរ ដោយពីមួយអាណត្តិទៅមួយអាណត្តិ រាជរដ្ឋាភិបាលកម្ពុជា បានដាក់ចេញនូវគោលនយោបាយពង្រឹងការគ្រប់គ្រង និងការអភិវឌ្ឍវិស័យសំណង់ ដែលជាសរសរស្ដម្ភមួយនៃកំណើនសេដ្ឋកិច្ច ដោយផ្ដោតលើការជំរុញការវិនិយោគក្នុងវិស័យសំណង់ ការកសាងច្បាប់ ការដាក់ចេញបទប្បញ្ញត្តិបច្ចេកទេស និងការកែលម្អសេវាសាធារណៈជូនប្រជាពលរដ្ឋ ។
ក្រសួងរៀបចំដែនដី នគរូបនីយកម្ម និងសំណង់ ក៏បានពង្រឹងការត្រួតពិនិត្យ និងទប់ស្កាត់ការសាងសង់រំលោភដីសាធារណៈរបស់រដ្ឋ ការសាងសង់គ្មានលិខិតអនុញ្ញាត ការសាងសង់ខុសលិខិតអនុញ្ញាតសាងសង់ និងបានតម្រូវឱ្យម្ចាស់ការដ្ឋានរៀបចំឱ្យមានអាងប្រព្រឹត្តិកម្មទឹកកខ្វក់មុនបង្ហូរចូលលូសាធារណៈ ដើម្បីចៀសវាងការប៉ះពាល់ដល់សោភ័ណភាព សុវត្ថិភាព សណ្ដាប់ធ្នាប់សាធារណៈ និងបរិស្ថាន ៕
Account
Security
Favourite Content