សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ស្របពេលដែលពលរដ្ឋខ្មែរ ងាកមកគាំទ្រផលិតផលក្នុងស្រុក ចលនានេះ បានក្លាយជាចលករដ៏សំខាន់ក្នុងការបង្កើតឱកាសដល់សហគ្រាសក្នុងស្រុក ដើម្បីពង្រីក និងពង្រឹងអាជីវកម្មឱ្យឈររឹងមាំនៅលើទីផ្សារ ប៉ុន្តែទន្ទឹមនឹងនោះ ក៏នៅមានបញ្ហាប្រឈមជាច្រើនដែលត្រូវដោះស្រាយ ផងដែរ។
លោកស្រី នុត សម្ជស្ស អគ្គនាយិកាក្រុមហ៊ុន អិល អេស វី (LSV) ដែលជាក្រុមហ៊ុនផលិតសាប៊ូស្ពៃ (Empress) បានថ្លែងថា ក្រោយពលរដ្ឋកម្ពុជាធ្វើពហិការផលិតផលនាំចូលពីប្រទេសថៃ និងងាកមកគាំទ្រផលិតផលកម្ពុជាវិញនោះ បានក្លាយជាចលករយ៉ាងសំខាន់ ក្នុងការជំរុញទៅដល់សហគ្រាសក្នុងស្រុកដើម្បីពង្រីកអាជីវកម្មខ្លួន ឱ្យឈរជើងកាន់តែរឹងមាំនៅលើទីផ្សារ។
លោកស្រី បានបន្តថា នេះគឺជាការរួមចំណែកយ៉ាងសំខាន់ក្នុងការផ្តល់ការងារដល់ពលរដ្ឋ គាំទ្រផលិតផលកសិកម្មរបស់កសិករក្នុងស្រុក ក៍ដូចជាការចូលរួមលើកកម្ពស់សេដ្ឋកិច្ចឱ្យកាន់តែរឹងមាំ។
តែយ៉ាងណាក៏ដោយ លោកស្រី នុត សម្ជស្ស បានឱ្យដឹងទៀតថា ទោះជាដូច្នេះក្តីប៉ុន្តែថ្មីៗនេះមានការក្លែងបន្លំម៉ាកសញ្ញាសាប៊ូ (Empress) នៃសហគ្រាសរបស់លោកស្រី ដែលត្រូវបានមន្ត្រីជំនាញនៃអគ្គនាយកដ្ឋានកិច្ចការពារអ្នកប្រើប្រាស់ និងការប្រកួតប្រជែង(ក.ប.ប) បានធ្វើការអន្តរាគមន៍ចាប់ខ្លួនជនក្លែងបន្លំម៉ាកសញ្ញាឱ្យទទួលទោសតាមច្បាប់។
លោកស្រីបញ្ជាក់ថា ការក្លែងម៉ាកសញ្ញានេះ បានបង្កផលប៉ះពាល់ធ្ងន់ធ្ងរទៅដល់សហគ្រាសដែលកំពុងលូតលាស់ថ្មីមួយនេះ ខណៈដែលផលិតផលក្លែងបន្លំម៉ាកសញ្ញា ត្រូវបានចរាចរណ៍ព្រោងព្រាតលើទីផ្សារកម្ពុជា។
លោកស្រី បាននិយាយថា៖
“ក្រៅពីខ្ញុំជាម្ចាស់សហគ្រាស នៅមានបងប្អូនអាជីវករលក់ដូរ និងអ្នកប្រើប្រាស់ជាជនរងគ្រោះត្រូវរងផលប៉ះពាល់ ពិសេសប៉ះពាល់ទៅដល់កសិករផ្គត់ផ្គង់ស្ពៃ និងបុគ្គលិកដែលធ្វើការនៅក្នុងសហគ្រាសនេះផ្ទាល់តែម្តង។”
ករណីនេះលោកស្រី ក៏បានអំពាវនាវ ទៅដល់មន្ត្រីជំនាញសមត្ថកិច្ច ត្រូវបោសសម្អាតក្រុមឈ្មួញខិលខូចនេះឱ្យអស់ពីកម្ពុជាជៀសវាងការក្លែងបន្លំម៉ាកសញ្ញា ធ្វើឱ្យប៉ះពាល់កេរ្តិ៍ឈ្មោះកិត្តិយស នៃផលិតផលក្នុងស្រុកដូច្នេះទៀត។
មួយវិញទៀត ឧកញ៉ាបណ្ឌិត កែវ មុំ ប្រធានសមាគមសហគ្រិនស្ត្រីកម្ពុជា បានថ្លែងឱ្យដឹងដែរថា ក្រោយពីកម្ពុជាផ្អាកការនាំចូលផលិតផលពីប្រទេសថៃ មានផលិតផលចំណីអាហារផ្សេងៗជាច្រើន ដែលអាចប្រកួតប្រជែង ជាមួយផលិតផលនាំចូលបាន ទាំងគុណភាព និងរសជាតិ ប៉ុន្តែអ្វីដែលមិនអាចប្រកួតប្រជែងបាននោះគឺតម្លៃ។
ឧកញ៉ាបណ្ឌិត បញ្ជាក់ថា ជាធម្មតានៅពេលដែលការផលិតមានចំនួនតិចសហគ្រាសត្រូវចំណាយថ្លៃដើមខ្ពស់ នៅពេលសហគ្រាសផលិតបានច្រើនសហគ្រាសត្រូវចំណាយថ្លៃដើមទាប។ ឧកញ៉ាបណ្ឌិត បានបញ្ជាក់ដូច្នេះថា៖
”អ្វីដែលមិនអាចប្រកួតប្រជែងបាននោះគឺទៅលើតម្លៃ តម្លៃថ្លៃដើមនឹងយើងផលិតបានតិច ថ្លៃដើមយើងខ្ពស់ ហើយគេផលិតបានច្រើនថ្លៃដើមផលិតគេទាប ហើយនាំចូលមកបង់ពន្ធមិនពេញលក្ខណៈទៀត ចឹងធ្វើឱ្យតម្លៃលក់នៅលើទីផ្សារទាបជាងផលិតផលរបស់ខ្មែរយើង ដែលធ្វើឱ្យផលិតផលរបស់ខ្មែរមិនអាចប្រកួតប្រជែង នៅលើទីផ្សាររបស់ខ្លួនបាន។”
ករណីនេះ លោកស្រីទទូចស្នើសុំទៅដល់រដ្ឋាភិបាលត្រូវគ្រប់គ្រងឱ្យបាននូវបរិមាណនាំចូលពិតប្រាកដ បង់ពន្ឋឱ្យបានពេញលេញ ដើម្បីជួយដល់ឧស្សាហកម្មក្នុងស្រុកបានដំណើរការល្អនិងជោគជ័យ ដើម្បីឱ្យចរន្តសេដ្ឋកិច្ចកម្ពុជាមានសន្ទុះកាន់តែខ្លាំងឡើង។
លោកបណ្ឌិត ញិល រដ្ឋា អ្នកជំនាញភូមិសាស្រ្តនយោបាយ និងសេដ្ឋកិច្ចអន្តរជាតិ បានថ្លែងថា ផ្អែកលើទិន្នន័យសេដ្ឋកិច្ច និងបរិបទម៉ាក្រូសេដ្ឋកិច្ចពីឆ្នាំ ២០២២ ដល់ ២០២៥ (រួមទាំងផលទុន GDP Nominal ៥១.២៧ ប៊ីលានដុល្លារ និងកំណើន HDI ដល់ ០.៦០៦) SME ពិតជា «សរសរស្តម្ភ» នៃភាពធន់សេដ្ឋកិច្ចជាតិកម្ពុជាយ៉ាងពិតប្រាកដ។
លោកបណ្ឌិត បន្តថា ថ្វីបើវិស័យនេះបានជួបប្រទះនូវបញ្ហាប្រឈមជាច្រើន ដូចជា ការបិទទ្វារសហគ្រាសមួយចំនួនដោយសារថ្លៃដើមផលិតកម្មខ្ពស់ អត្រាបដិសេធឥណទាន ពីធនាគារ ការប្រកួតប្រជែងទំនិញនាំចូលពីប្រទេសជិតខាង (ដូចជាថៃ) និងសម្ពាធភូមិសាស្ត្រនយោបាយសកល ក៏វិស័យ SME ជួយទ្រទ្រង់កម្លាំងពលកម្មផ្លូវការជិត ៥០ ម៉ឺននាក់ និងរុញច្រានអាជីវកម្មក្រៅប្រព័ន្ធរាប់សែនឱ្យចូលក្នុងប្រព័ន្ធផ្លូវការ។
លោកបណ្ឌិត ញិល រដ្ឋា បានឱ្យដឹងទៀតថា ការប្រកាសកែទម្រង់ជាប្រវត្តិសាស្ត្ររបស់រាជរដ្ឋាភិបាលក្នុងខែកក្កដា ឆ្នាំ ២០២៦ លើការលុបបំបាត់រនាំងរដ្ឋបាលស្មុគស្មាញ និងការដាក់ឱ្យប្រើប្រាស់ «ប្រព័ន្ធចុះបញ្ជីតាមច្រកឌីជីថលតែមួយ (Single-Window Online Registration)» ព្រមទាំងការទម្លាក់កញ្ចប់ហិរញ្ញវត្ថុ ការការពារទីផ្សារពីទំនិញគេចពន្ធ និងការរៀបចំយុទ្ធសាស្ត្រ AI ជាតិ គឺជាកាតាលីករដ៏សំខាន់។
លោកបណ្ឌិត ថា៖
“ប្រសិនបើកម្ពុជាបន្តអនុវត្ត ជម្រើសយុទ្ធសាស្ត្រទាំង ៤ (ការចុះបញ្ជីលឿន + មជ្ឈមណ្ឌលគាំទ្រ AI/ពន្ធ + ឥណទានគ្មានទ្រព្យបញ្ចាំ + ការពារទីផ្សារក្នុងស្រុក) នោះ SME កម្ពុជានឹងមិនត្រឹមតែមានភាពធន់ប៉ុណ្ណោះទេ ប៉ុន្តែនឹងក្លាយជាម៉ាស៊ីនបូមកំណើនសេដ្ឋកិច្ចប្រកបដោយចីរភាព និងបរិយាបន្នជាប្រវត្តិសាស្ត្រ។”
លោកបណ្ឌិត បានបន្តថា ការកែទម្រង់នីតិវិធីរដ្ឋបាលជាជំហានដំបូងដ៏ល្អ ប៉ុន្តែការផ្គូរផ្គងរវាង «បច្ចេកវិទ្យា + ការផ្លាស់ប្តូរឥរិយាបថមន្ត្រី + កញ្ចប់ហិរញ្ញវត្ថុ» ទើបជាសោរគ្រឹះរុញច្រាន SME កម្ពុជាឱ្យរីកចម្រើនមាំមួន។
ឆ្នាំ ២០២៥ (ទិន្នន័យវិស័យ SME និងសិប្បកម្ម)៖ វិស័យ SME និងសិប្បកម្មបានពង្រីកខ្លួនរហូតដល់ ៤៤,៧៩៥ គ្រឹះស្ថានផ្លូវការសកម្ម នៅទូទាំងប្រទេស។ ក្នុងឆ្នាំ ២០២៥ មានការចុះបញ្ជីអាជីវកម្មថ្មីចំនួន ១,២៦២ គ្រឹះស្ថាន ដែលបង្កើតការងារថ្មីបានចំនួន ២៣,៥៩៧ កន្លែង។ ក្នុងនោះ សហគ្រាសចំនួន ៨,៦៧០ ត្រូវបានគ្រប់គ្រង ឬដឹកនាំដោយស្ត្រី ខណៈកម្លាំងពលកម្មសរុបដែលទ្រទ្រង់ដោយវិស័យ SME និងសិប្បកម្មផ្លូវការមានរហូតដល់ ៤៩២,១៣១ នាក់។
សូមបញ្ជាក់ថា កាលពីថ្ងៃទី១៩ ខែកក្កដា ឆ្នាំ២០២៦ កន្លងទៅថ្មីៗសម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានប្រកាសតាមបណ្តាញសង្គមហ្វេសប៊ុកផ្លូវការ ដោយទទួលស្វាគមន៍មតិយោបល់ពលរដ្ឋ ក្នុងស្មារតី រួមគិត រួមធ្វើ ដើម្បីបានជាធាតុចូលបន្ថែម សម្រាប់ដោះស្រាយបញ្ហាប្រឈមរបស់សហគ្រាសធុនតូច និងមធ្យម(SME) ដោយប្រគល់ភារកិច្ចនេះជូនឯកឧត្តមអគ្គបណ្ឌិតសភាចារ្យ អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងនាមជាប្រធានគណៈកម្មការនយោបាយសេដ្ឋកិច្ច ដឹកនាំ រៀបចំ គិតគូរ អំពីការដាក់ចេញវិធានការចាំបាច់ និងជាបន្ទាន់មួយចំនួនបន្ថែមដើម្បីដោះស្រាយបញ្ហាប្រឈម ក៏ដូចជាជំរុញលើកទឹកចិត្តដល់សហគ្រាសធុនតូច និងមធ្យម (SME) ដែលជាចលករយ៉ាងសំខាន់ក្នុងការជំរុញកំណើនសេដ្ឋកិច្ចជាតិ និងបង្កើតការងារសម្រាប់ប្រជាពលរដ្ឋ៕
Account
Security
Favourite Content