សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ សមតុល្យឥណទានលក្ខណៈក្រុមហ៊ុន ឬសហគ្រាសនៅកម្ពុជា បានកើនឡើង ៧,១ ភាគរយ ដល់ ៨,៧៩ ប៊ី (ពាន់) លានដុល្លារអាមេរិក គិតត្រឹមត្រីមាសទី២ ឆ្នាំ២០២៦ បើធៀបនឹងត្រីមាសមុន ខណៈចំនួនពាក្យស្នើសុំឥណទានកើនឡើង ១០,១ ភាគរយ។
យោងតាមរបាយការណ៍ត្រីមាសទី២ ឆ្នាំ២០២៦ របស់ក្រុមហ៊ុនក្រេឌីត ប្សរ៉ូ ខេមបូឌា ខូ អិលធីឌី (CBC) នៅថ្ងៃទី១០ ខែសីហា ឆ្នាំ២០២៦ ចំនួនពាក្យស្នើសុំឥណទានលក្ខណៈក្រុមហ៊ុន ឬសហគ្រាសបានកើនឡើងជារួម ១០,១ ភាគរយ ក្នុងត្រីមាសទី២ បើធៀបនឹងត្រីមាសមុន ដែលបង្ហាញពីតម្រូវការកាន់តែខ្ពស់របស់សហគ្រាសក្នុងការទទួលបានហិរញ្ញប្បទានសម្រាប់អាជីវកម្ម។
ក្នុងចំណោមប្រភេទឥណទានទាំង៦ ពាក្យស្នើសុំកម្ចីវិបារូបន៍ និងឥណទានបង្វិល (Overdraft and Revolving) កើនឡើងខ្ពស់ជាងគេ ៣៥,៦ ភាគរយ ខណៈពាក្យស្នើសុំកម្ចីផ្សេងៗកើន ២១,៤ ភាគរយ។ ពាក្យស្នើសុំកម្ចីមូលធន (Working Capital Loan) កើន ៤,៥ ភាគរយ កម្ចីសម្រាប់ស្ថាប័ន (Institutional Loan) កើន ៥ ភាគរយ និងកម្ចីសម្រាប់ហិរញ្ញប្បទានទ្រព្យសកម្ម និងហិរញ្ញប្បទានពាណិជ្ជកម្ម (Trade and Asset Finance) កើន ១,១ ភាគរយ។
ការកើនឡើងនៃពាក្យស្នើសុំឥណទានក៏ត្រូវបានឆ្លុះបញ្ចាំងតាមទំហំទឹកប្រាក់ដែលបានស្នើសុំផងដែរ ដោយទំហំទឹកប្រាក់ស្នើសុំសរុបក្នុងឥណទានទាំង៦ប្រភេទបានកើនឡើង ៤០,៦ ភាគរយ។ ក្នុងនោះ កម្ចីផ្សេងៗកើនឡើង ១៦២,៥ ភាគរយ កម្ចីហិរញ្ញប្បទានទ្រព្យសកម្ម និងហិរញ្ញប្បទានពាណិជ្ជកម្មកើន ១០៩,១ ភាគរយ កម្ចីសម្រាប់ស្ថាប័នកើន ៥៧,៥ ភាគរយ និងកម្ចីវិបារូបន៍ និងឥណទានបង្វិលកើន ៤៦,៤ ភាគរយ។ ចំណែកកម្ចីមូលធនកើន ៩,៥ ភាគរយ។
ទោះបីតម្រូវការឥណទានកើនឡើងក៏ដោយ ចំនួនគណនីឥណទានលក្ខណៈក្រុមហ៊ុន ឬសហគ្រាសសរុបបានថយចុះ ២ ភាគរយ បើធៀបនឹងត្រីមាសមុន ដោយនៅសល់ប្រមាណ ៦,៨១ ពាន់គណនី គិតត្រឹមខែមិថុនា ឆ្នាំ២០២៦។
តាមរបាយការណ៍ ក្នុងចំណោមគណនីឥណទានទាំងនេះ កម្ចីមូលធនមានចំណែក ៣២,៥១ ភាគរយ ខណៈកម្ចីវិបារូបន៍ និងឥណទានបង្វិលមាន ២៧,០៤ ភាគរយ។ កម្ចីប្រភេទផ្សេងៗមាន ២៤,៥៤ ភាគរយ កម្ចីសម្រាប់ហិរញ្ញប្បទានទ្រព្យសកម្ម និងហិរញ្ញប្បទានពាណិជ្ជកម្មមាន ១៣,៤៤ ភាគរយ និងកម្ចីសម្រាប់ស្ថាប័នមាន ២,៤៧ ភាគរយ។
ទន្ទឹមនឹងការថយចុះនៃចំនួនគណនី សមតុល្យឥណទានសហគ្រាសបានកើនឡើង ៧,១ ភាគរយ ដល់ ៨,៧៩ ប៊ីលានដុល្លារអាមេរិក។ កម្ចីមូលធនដែលមានចំនួនគណនី ៣២,៥១ ភាគរយ បានកាន់កាប់សមតុល្យប្រមាណ ៤៧,៧៨ ភាគរយនៃសំពៀតឥណទានសរុប។
ចំណែកកម្ចីសម្រាប់ស្ថាប័ន ដែលមានគណនី ២,៤៧ ភាគរយ មានសមតុល្យ ៨,៨១ ភាគរយ។ កម្ចីហិរញ្ញប្បទានទ្រព្យសកម្ម និងហិរញ្ញប្បទានពាណិជ្ជកម្ម មានចំណែក ១៣,៤៤ ភាគរយនៃគណនី និង ៨,៨១ ភាគរយនៃសមតុល្យ។ កម្ចីផ្សេងៗមានចំណែក ២៤,៥៤ ភាគរយនៃគណនី និង ១៧,៥៩ ភាគរយនៃសមតុល្យ ខណៈកម្ចីវិបារូបន៍ និងឥណទានបង្វិលមាន ២៧,០៤ ភាគរយនៃគណនី និង ១៦,៩២ ភាគរយនៃសមតុល្យឥណទាន។
តាមតំបន់ សមតុល្យឥណទានមានការកើនឡើងនៅតំបន់ទន្លេសាប ២,៩ ភាគរយ និងតំបន់ខ្ពង់រាប ១៤,៨ ភាគរយ ខណៈមានការថយចុះនៅតំបន់ឆ្នេរ ១ ភាគរយ និងតំបន់ទំនាប ៧,៣ ភាគរយ បើធៀបនឹងត្រីមាសមុន។
ជាមួយគ្នានេះ គុណភាពឥណទានសហគ្រាសបានបង្ហាញពីសម្ពាធកើនឡើង ដោយអនុបាតឥណទានដែលមានការសងយឺតលើសពី ៩០ ថ្ងៃ ឬ 90+ DPD បានកើនឡើងដល់ ៦,៩ ភាគរយ ក្នុងត្រីមាសទី២ ពី ៥,៤ ភាគរយក្នុងត្រីមាសមុន។
ក្នុងចំណោមផលិតផលឥណទានទាំង៦ កម្ចីមូលធនមានអនុបាត 90+ DPD ខ្ពស់ជាងគេ ១១,៧៣ ភាគរយ។ ការកើនឡើងនៃចំនួនទឹកប្រាក់ឥណទានដែលមានការសងយឺតលើសពី ៩០ ថ្ងៃ ត្រូវបានកត់សម្គាល់ខ្ពស់នៅតំបន់ខ្ពង់រាប ៣៨,៩៣ ភាគរយ តំបន់ឆ្នេរ ១១,១៦ ភាគរយ តំបន់ទន្លេសាប ៨,៤២ ភាគរយ និងតំបន់ទំនាប ៥,៦០ ភាគរយ។
ទាក់ទងនឹងការប្រើប្រាស់ឥណទាន សហគ្រាសភាគច្រើននៅតែប្រើប្រាស់កម្ចីពីស្ថាប័នតែមួយ ដោយមានចំនួន ៨០,៩៧ ភាគរយ ខណៈសហគ្រាសដែលមានកម្ចីពីស្ថាប័នច្រើនមាន ១៩,០៣ ភាគរយ។
ចំពោះចំនួនគណនីឥណទាន សហគ្រាសដែលមានគណនីឥណទានតែមួយមាន ៤៩,៩៥ ភាគរយ ខណៈសហគ្រាសដែលមានគណនីចំនួនពីរមាន ១៩,៣៨ ភាគរយ។ សហគ្រាសដែលមានគណនីឥណទានចំនួនបីមាន ១០,២១ ភាគរយ ខណៈសហគ្រាសដែលមានគណនីច្រើនជាងបីមាន ១០,២១ ភាគរយ។
លោក អឿ សុធារ័ត្ន ប្រធាននាយកប្រតិបត្តិនៃក្រុមហ៊ុនក្រេឌីត ប្សរ៉ូ ខេមបូឌា ខូ អិលធីឌី បានមានប្រសាសន៍ថា ចំនួនពាក្យស្នើសុំឥណទានលក្ខណៈក្រុមហ៊ុន ឬសហគ្រាសបានកើនឡើងក្នុងត្រីមាសនេះ បើធៀបនឹងត្រីមាសមុន។
លោកបានបញ្ជាក់ថា ដំណើរការឥណទានលក្ខណៈក្រុមហ៊ុន ឬសហគ្រាសមានភាពអវិជ្ជមានចំពោះចំនួនគណនី ដែលបានធ្លាក់ចុះ ២ ភាគរយ ខណៈសមតុល្យឥណទាននៅតែរក្សាបានកំណើន ៧,១ ភាគរយ។
លោកបានបន្ថែមថា គុណភាពឥណទានធៀបនឹងត្រីមាសមុនបានធ្លាក់ចុះ ដោយអនុបាតគណនីប្រាក់កម្ចីដែលមានការសងយឺតលើសពី ៩០ ថ្ងៃបានកើនឡើងដល់ ៦,៩ ភាគរយក្នុងត្រីមាសទី២ ឆ្នាំ២០២៦ ពី ៥,៤ ភាគរយក្នុងត្រីមាសមុន៕
Account
Security
Favourite Content