សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រហូតមកដល់ឆ្នាំ២០២៥នេះ រាជរដ្ឋាភិបាលកម្ពុជា នៅតែមិនទាន់យកពន្ធលើដីស្រែ ចម្ការ ដែលជាប្រភេទដីកសិកម្មនៅឡើយ ដោយយកតែដីទាំងឡាយណាដែលមិនមានសកម្មភាពសេដ្ឋកិច្ច ឬហៅម្យ៉ាងទៀតហៅថា ដីទំនេរ លើសពី ៥ហិកតាឡើងទៅ ។ តើមកពីហេតុផលអ្វីខ្លះ ទើបរាជរដ្ឋាភិបាលមិនយកពន្ធលើប្រភេទដីស្រែចម្ការ ?
យោងតាមប្រសាសន៍ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា ពន្ធមិនមានអ្វីអាក្រក់នោះទេ ។ ពន្ធ ជាយន្តការក្នុងការបង្វិលហិរញ្ញវត្ថុនៅក្នុងសង្គមជាតិ ។ ការវាស់វែង ការចុះបញ្ជីដីធ្លី និងចេញបណ្ណកម្មសិទ្ធិ ត្រូវចាត់ទុកថាជាពាងទឹកសេដ្ឋកិច្ចដ៏សំខាន់បំផុតរបស់កម្ពុជា ។
ឯកឧត្តមបន្តថា រាជរដ្ឋាភិបាលរបស់គណបក្សប្រជាជនកម្ពុជា មិនយកពន្ធលើដីប្រភេទកសិកម្ម ដីស្រែចម្ការនោះទេ ពីព្រោះថា ពេលនេះវាមិនទាន់ដល់ពេលដែលត្រូវយកពន្ធលើប្រភេទដីកសិកម្មទេ ។ ជីវភាពកសិករក្នុងប្រទេសកម្ពុជានៅមានកម្រិតនៅឡើយ ហើយការដែលមិនយកពន្ធលើដីកសិកម្ម គឺជាការទុកពេលវេលា និងឱកាសឱ្យជីវភាពប្រជាជនកម្ពុជាឡើងមកស្មើគ្នា ។
ឯកឧត្តមបានបញ្ជាក់ថា ៖
«ការមិនយកពន្ធលើដីស្រែចម្ការ ដីកសិកម្ម គឺជាសុភវិនិច្ឆ័យដ៏ត្រឹមត្រូវបំផុតពីសំណាក់សម្ដេចតេជោ អតីតនាយករដ្ឋមន្ត្រីនៃព្រះរាជាណាចក្រកម្ពុជា និងបច្ចុប្បន្នជាប្រធានព្រឹទ្ធសភានៃព្រះរាជាណាចក្រកម្ពុជា ព្រោះថា ក្នុងមួយឆ្នាំ ចំណូលរបស់ពលរដ្ឋពីកសិកម្មនៅមានកម្រិតតិចតួចនៅឡើយ ជាក់ស្ដែងការធ្វើស្រូវនៅតំបន់ខ្លះ ក្នុងមួយឆ្នាំធ្វើបានតែម្ដង និងធ្វើស្រែសម្រាប់តែទុកបរិភោគ មិនមែនជាការធ្វើស្រែសម្រាប់លក់យកចំណូលដុំនោះឡើយ»។
ឯកឧត្តម សាយ សំអាល់ បានលើកឡើងទៀតថា នៅក្នុងឆ្នាំ២០២៥នេះ គឺជាពេលវេលាដែលត្រូវបញ្ចប់សមរភូមិវាស់វែង ចុះបញ្ជីក្បាលដីនៅទូទាំងប្រទេស ហើយនៅពេលបញ្ចប់ការវាស់វែង ចុះបញ្ជីក្បាលដីនេះហើយ ក្រសួងរៀបចំដែនដី នគរូបនីយកម្ម និងសំណង់ នឹងបន្តសមរភូមិរបស់ខ្លួនជាបន្តបន្ទាប់ ដោយក្នុងនោះ មានសមរភូមិបញ្ចប់វិវាទនៅទូទាំងប្រទេស និងសមរភូមិរៀបចំនគរូបនីយកម្ម ដែលត្រូវរៀបចំទីក្រុងឱ្យមានសណ្ដាប់ធ្នាប់ មានលំហសាធារណៈ និងធ្លាគម្លាតនៅតាមលំនៅឋានជាដើម ។
គួរបញ្ជាក់ថា ពាក់ព័ន្ធនឹងពន្ធលើដីធ្លីដែរ រាជរដ្ឋាភិបាលចាប់ផ្ដើមអនុវត្តពន្ធលើដីមិនបានប្រើប្រាស់ក្នុងឆ្នាំ២០២៥ ដោយមានលក្ខខណ្ឌបន្ធូរបន្ថយជាច្រើន ដូចជា ដីធ្លីមិនបានប្រើប្រាស់ដែលមានទំហំក្រោម ឬស្មើនឹង៥ហិកតា ត្រូវបានលើកលែង ។ យ៉ាងណាក្ដី សម្រាប់ដីធ្លីមិនបានប្រើប្រាស់ ដែលមានផ្ទៃក្រឡាតិចជាង ឬស្មើ ៥ហិកតា ក្នុងមួយកន្លែង មិនមានកាតព្វកិច្ចដាក់លិខិតប្រកាស និងបង់ប្រាក់ពន្ធនោះទេ ខណៈដីធ្លីមិនបានប្រើប្រាស់ដែលលើសពី ៥ហិកតា ត្រូវដាក់លិខិតប្រកាស និងបង់ប្រាក់ពន្ធចាប់ពីថ្ងៃទី១ ខែមករា ដល់ថ្ងៃទី៣០ ខែកញ្ញា នៃឆ្នាំជាប់ពន្ធនីមួយៗ ៕
Account
Security
Favourite Content