បរទេស ៖ បណ្តាប្រទេសមួយចំនួននៅទ្វីបអាស៊ីបានបង្ហាញពីក្តីបារម្ភនៃការធ្លាក់ចុះសេដ្ឋកិច្ច កើតមានអតិផរណា ដោយសារការឡើងថ្លៃនៃតម្លៃប្រេង ហើយថែមទាំងបានដាក់ចេញនូវវិធានការខ្លះៗដើម្បីទប់ទល់នឹងវិបត្តិប្រេងដែលកំពុងកើតមាន និងអាចបន្តទៅថ្ងៃខាងទៀតក្នុងរយៈពេលមិនអាចកំណត់បាន នេះបើងយោងតាមសេចក្ដីរាយការណ៍ពីសារព័ត៌មាន Anadolu Ajansi ។

នៅព្រឹកថ្ងៃព្រហស្បតិ៍ សប្ដាហ៍នេះ​ តម្លៃប្រេងឆៅ Brent បានឡើងថ្លៃជិត ៩% ឬ ១០០ ដុល្លារក្នុងមួយបារ៉ែល ខណៈដែលថ្នាក់ដឹកនាំយោធាអ៊ីរ៉ង់បានគំរាមថា តម្លៃប្រេងអាចឡើងថ្លៃដល់ ២០០ ដុល្លារក្នុងមួយបារ៉ែល ស្របពេលដែលការវាយប្រហារគ្នានៅច្រកសមុទ្រ Hormuz នៅតែបន្ត។ ស្ថិតក្នុងស្ថានការណ៍មិនច្បាស់លាស់បែបនេះ បណ្តាប្រទេសមួយចំនួននៅតំបន់អាស៊ីដែលពឹងផ្អែកខ្លាំងលើការនាំចូលប្រេង ដូចជា ប៉ាគីស្ថាន បង់ក្លាដែស ថៃ ឥណ្ឌា កូរ៉េខាងត្បូង និងនេប៉ាល់ កំពុងប្រឈមមុខនឹងការការខ្វះការផ្គត់ផ្គង់ ហើតតម្លៃថាមពលនឹងកាន់តែឡើងខ្ពស់។

លោក Trinh Nguyen អ្នក​សេដ្ឋកិច្ច​ជាន់​ខ្ពស់​នៃ​ក្រុមហ៊ុន Natixis បានលើកឡើង​ថា ស្របពេលដែលតម្រូវការ​កំពុង​កើន​ឡើងខ្លាំង អ្នកដែលងាយរងគ្រោះជាងគេគឺប៉ាគីស្ថាន និង​បង់ក្លាដែស បន្ទាប់​មក​គឺ​បណ្តាប្រទេសនៅតំបន់អាស៊ីអាគ្នេយ៍។ មិនត្រឹមតែប៉ុណ្ណោះ ឥណ្ឌា ក៏ងាយរងគ្រោះផងដែរ ដោយសារការពឹងផ្អែកលើការនាំចូលប្រេងឆៅជិត ៩០%។

នាយករដ្ឋមន្តី្រឥណ្ឌា លោក Narendra Moody បានទទួលស្គាល់ និងព្រមានថា ប្រទេសឥណ្ឌាគឺងាយរងគ្រោះដោយសារតែស្តុកប្រេងបម្រុងរបស់រដ្ឋគ្របដណ្តប់បានប្រហែល ១០ ថ្ងៃប៉ុណ្ណោះ ខណៈពេលដែលស្តុកប្រេងរបស់ក្រុមហ៊ុនឯកជនអាចគ្របដណ្តប់បានប្រមាណ ៦៥ ថ្ងៃ។

ក្រៅពីប្រទេសមហាអំណាច ឥណ្ឌា សូម្បីតែប្រទេសម៉ាឡេស៊ី ដែលជាអ្នកនាំចេញប្រេងដ៏សំខាន់មួយក្នុងតំបន់ក៏ជួបកង្វះខាតប្រេងភ្លាមៗផងដែរ ខណៈដែលខ្លួនអាចផ្គត់ផ្គង់ និងគ្រប់គ្រងស្ថានការណ៍ក្នុងប្រទេសបានយ៉ាងហោចណាស់រហូតដល់ខែឧសភាប៉ុណ្ណោះ។ ក្នុងន័យនេះ រដ្ឋាភិបាលរបស់នាយករដ្ឋមន្រ្តីម៉ាឡេស៊ី លោក Anwar Ibrahim នឹងបើកកិច្ចប្រជុំគណៈរដ្ឋមន្ត្រីពិសេសរយៈពេល២ថ្ងៃ នៅថ្ងៃសុក្រ និងថ្ងៃសៅរ៍ ដើម្បីពិនិត្យឡើងវិញនូវជំហរសារពើពន្ធរបស់ប្រទេស។ ទន្ទឹមនឹងនេះ សភារបស់ប្រទេសស្រីលង្កា គ្រោងនឹងបើកការជជែកដេញដោលគ្នារយៈពេល ២ថ្ងៃផងដែរនៅសប្តាហ៍ក្រោយ ស្តីពីជម្លោះមជ្ឈិមបូព៌ា និងផលប៉ះពាល់លើការនាំចូលឥន្ធនៈ។ ក្រៅពីនេះ ប្រទេសប៉ាគីស្ថាន និងបង់ក្លាដែស ក៏បានដាក់ចេញនូវវិធានការតឹងរ៉ឹងមួយចំនួន រួមមាន គោលនយោបាយការងារពីផ្ទះ កាត់បន្ថយការដឹកជញ្ជូន និងការបែងចែកប្រេងឥន្ធនៈ ខណៈដែលថៃ ប្រើយន្តការកាត់បន្ថយប្រើប្រាស់ថាមពលនៅក្នុងការិយាល័យរដ្ឋាភិបាល និងលើកទឹកចិត្តដល់ការបំពេញការងារពីចម្ងាយ។ គួរកត់សម្គាល់ថា បង់ក្លាដែស ក៏ធានាបានការផ្គត់ផ្គង់ប្រេងពីម៉ាឡេស៊ី ឥណ្ឌា និងសិង្ហបុរីផងដែរ ដើម្បីកាត់បន្ថយការពឹងផ្អែកលើដៃគូផ្គត់ផ្គង់ផ្សេងទៀត។

ដោយឡែក នៅក្នុងប្រទេសកូរ៉េខាងត្បូង លោក Son Joo-suk ប្រធានក្រុមហ៊ុន Korea National Oil Corp. បានសុំទោសជាសាធារណៈសម្រាប់ការឡើងថ្លៃនៅតាមស្ថានីយ៍ប្រេងឥន្ធនៈមួយចំនួនដែលគ្រប់គ្រងដោយរដ្ឋាភិបាល។ នៅខាងប្រទេសនេប៉ាល់ឯណោះវិញ ពួកគេនឹងបញ្ជូនជើងហោះហើរទៅកាន់ទីក្រុងឌូបៃនៅថ្ងៃពុធ សប្ដាហ៍ក្រោយនេះ ដើម្បីជម្លៀសអ្នកដំណើរដែលជាប់គាំង ខណៈដែលភាពតានតឹងបានកើនឡើងពាសពេញតំបន់។ សូមជម្រាបថា បន្ទាប់ពីសន្តិសុខនេប៉ាល់បានស្លាប់នៅក្នុងការវាយប្រហារដោយយន្តហោះគ្មានមនុស្សបើកនៅអាកាសយានដ្ឋានអន្តរជាតិ Zayed របស់ទីក្រុងឌូបៃ ពួកគេកាន់តែព្រួយបារម្ភអំពីសុវត្ថិភាពរបស់កម្មករនេប៉ាល់ ដែលមានប្រមាណ ៧ សែននាក់កំពុងរស់នៅអារ៉ាប់រួម ។

យ៉ាងណាក៏ដោយ រហូតមកដល់ថ្ងៃព្រហស្បតិ៍ សប្ដាហ៍នេះ ភាពតានតឹងក្នុងតំបន់មជ្ឈិមបូព៌ាកាន់តែក្តៅមិនទាន់ស្ងប់នៅឡើយនោះទេ ពោលគឺបន្ទាប់ពីអាម៉េរិក និងអ៊ីស្រាអែលបើកការវាយប្រហាររួមគ្នាទៅលើអ៊ីរ៉ង់ចាប់គិតតាំងពីថ្ងៃទី ២៨ ខែកុម្ភៈ រហូតមកម៉្លេះ។ ជាការឆ្លើយតប អ៊ីរ៉ង់ បានសងសឹកដោយការវាយប្រហារពីសំណាក់យន្តហោះគ្មានមនុស្សបើក និងមីស៊ីលសំដៅលើអ៊ីស្រាអែល ហ្ស៊កដានី អ៊ីរ៉ាក់ និងបណ្តាប្រទេសឈូងសមុទ្រដែលមានមូលដ្ឋានយោធារបស់អាម៉េរិក។ ដោយឡែក ចាប់តាំងពីថ្ងៃទី ១ ខែមីនា ទីក្រុងតេអេរ៉ង់ បានបិទច្រកសមុទ្រ Hormuz ដែលជាមូលហេតុធ្វើឲ្យមានការឡើងថ្លៃតម្លៃថាមពល និងការដឹកជញ្ជូនឡើងថ្លៃ ហើយថែមទាំងតម្រូវឱ្យមានការចំណាយពេលយូរជាងធម្មតាក្នុងការដឹកជញ្ជូនទំនិញ៕