សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាមួយនឹងភាពល្អប្រសើរនៃសេដ្ឋកិច្ចរបស់កម្ពុជា ការផ្គត់ផ្គង់ថាមពលអគ្គិសនីនៅក្នុងប្រទេសក៏មានភាពដិតដល់ជាងមុនផងដែរ។ ប៉ុន្តែលើសពីការប្រើប្រាស់អគ្គិសនីត្រឹមតែជាភ្លើងបំភ្លឺតាមផ្ទះ ថាមពលអគ្គិសនីក៏កាន់តែសំខាន់ក្នុងការជំរុញវិស័យឧស្សាហកម្ម។
សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងឱកាសអញ្ជើញទៅសំណាលជាមួយប្រជាពលរដ្ឋ និងត្រួតពិនិត្យការដ្ឋានសាងសង់វារីអគ្គិសនីស្ទឹងពោធិ៍សាត់១ នាព្រឹកថ្ងៃទី១៤ ខែមីនា ឆ្នាំ២០២៣ បានមានប្រសាសន៍ បច្ចុប្បន្ននេះ ប្រជាជនកម្ពុជាភាគច្រើនមានភ្លើងអគ្គិសនីប្រើប្រាស់ស្ទើរតែ១០០%ទៅហើយ។ ប៉ុន្តែយ៉ាងណា ថាមពលអគ្គិសនីក៏បានដើរតួយ៉ាងសំខាន់លើគ្រប់វិស័យ ជាពិសេសវាជាចំណែកក្នុងការជួយឱ្យសេដ្ឋកិច្ចកម្ពុជាមានភាពរីកចម្រើន។
ក្នុងឱកាសដដែលនេះ សម្ដេចនាយករដ្ឋមន្ត្រីក៏បានមានប្រសាសន៍ផងដែរថា ៖
“បើយើងមានអគ្គិសនី យើងមិនមែនដោះស្រាយតែបញ្ហាបំភ្លឺក្នុងផ្ទះទេ ប្រភពអគ្គិសនីនេះ គឺវានឹងផ្ដល់ឱកាសឱ្យយើងជំរុញវិស័យឧស្សាហកម្ម និងវិស័យដទៃទៀតដែលមានតម្រូវការប្រើប្រាស់អគ្គិសនី”
សម្ដេចបន្តមានប្រសាសន៍ថា ៖
“ឧស្សាហកម្មរោងចក្រនីមួយៗគឺប្រើប្រាស់នូវអគ្គិសនី ប៉ុន្តែអ្វីដែលធ្ងន់ជាងនេះគឺសេវាកម្មទាក់ទងនឹងសេវាទេសចរណ៍ គឺប្រើប្រាស់អគ្គិសនីធំណាស់ សណ្ឋាគារមួយដែលមាន ៤០០ ទៅ ៥០០បន្ទប់ តើត្រូវការអគ្គិសនីប៉ុន្មាន? ព្រោះនេះមិនមែនជាសម័យទេសចរបក់ផ្លិតទេ គឺសម័យទេសចរប្រើម៉ាស៊ីនត្រជាក់”
យ៉ាងណាក៏ដោយ នៅពេលដែលកម្ពុជាមានអគ្គិសនីប្រើប្រាស់សមស្រប ការងារផលិតកម្មក៏ងាយស្រួលជាងមុន ព្រោះរោងចក្រត្រូវការអគ្គិសនីដើម្បីផលិតចេញនូវផលិតផល។ ក្នុងន័យនេះ សម្ដេចបានបញ្ចាក់បន្ថែមថា មិនមានរោងចក្រណាដែលមិនប្រើអគ្គិសនីនោះទេ គឺត្រូវប្រើទាំងអស់ ដូច្នោះហើយបានជាតម្រូវការថាមពលអគ្គិសនីកាន់តែមានការកើនឡើងពីមួយឆ្នាំទៅមួយឆ្នាំ។ គួររំលឹកថា កាលពីទសវត្សរ៍៩០ហើយ កម្ពុជាមានអគ្គិសនីប្រើប្រាស់ត្រឹមតែ ៣០ មេហ្គាវ៉ាត់ប៉ុណ្ណោះនៅទីក្រុងភ្នំពេញ ហើយនៅតាមបណ្ដាខេត្តគឺមានការប្រើប្រាស់កាន់តែតិចតួច។ ប៉ុន្តែបច្ចុប្បន្ននេះ ទំហំនៃការប្រើប្រាស់នៅក្នុងប្រទេសកើនឡើងជាង ២ ២០០មេហ្កាវាត់ទៅហើយ ខណៈដែលទីក្រុងភ្នំពេញតែឯងប្រើអស់ប្រមាណ ១០០០មេហ្គាវ៉ាត់៕
Account
Security
Favourite Content