បរទេស៖ GS Retail គឺជាក្រុមហ៊ុនលក់ទំនិញ និងជាអ្នកដំណើរការម៉ាស៊ីនលក់មាសមួយបានបង្ហាញថា ក្នុងរយៈពេល ៩ខែ ពួកគេលក់មាសបានតម្លៃសរុប ១៩ លានដុល្លារ ដោយម៉ាស៊ីនលក់មាសដែលដាក់នៅហាងរបស់ពួកគេ ខណៈដែលពេលនេះម៉ាស៊ីនលក់មាសស្វ័យប្រវត្តិនេះត្រូវបានពង្រីកដល់ ២៩ ហ៊ាង ហើយគ្រោងនឹងឈានដល់ ៥០ ហាងនៅចុងឆ្នាំនេះ។ ម៉ាស៊ីនលក់មាសនេះផ្តល់ជូននូវទម្ងន់មាសប្រាំជម្រើសចន្លោះពី ០,១៣ ទៅ ១,៣ អោន ហើយមាសដែលលក់ដាច់​បំផុត​​មាន​តម្លៃ​ប្រហែល ២២៥ ដុល្លារ។

អ្នកតំណាងរបស់ GS Retail បាននិយាយថា ភាគច្រើនអ្នកទិញគឺជាមនុស្សក្នុងវ័យកណ្តាលដោយសារការទិញមាសគឺជាការវិនិយោគមួយ ជាពិសេសនៅពេលដែលតម្លៃរបស់វាកំពុងបន្តកើនឡើងក្នុងពេលឥឡូវនេះ។​ ស្របពេលដែលកំពុងរងសម្ពាធពីអតិផរណា និង គោលនយោបានហិរញ្ញវត្ថុធនាគារកណ្តាលអាមេរិក ប្រជាជនកូរ៉េជាច្រើនបានចាប់ផ្តើមស្តុកទុកមាស។  ស្របពេលនេះដែរ ការទិញមាសពីម៉ាស៊ីនស្វ័យប្រវត្តិបានផ្តល់ភាពងាយស្រួលដល់អតិថិជនកូរ៉េទាំងនោះ។ គួរឲ្យបញ្ជាក់ដែរថា កូរ៉េខាងត្បូងមិនមែនជាប្រទេសដំបូងដែលណែនាំបទពិសោធន៍ទិញមាសតាមម៉ាស៊ីនស្វ័យប្រវត្តនេះទេ ប៉ុន្តែអារ៉ាប់រួមាប្រទេសដំបូងដែលលក់មាសតាមរយៈម៉ាស៊ីនលក់មាស Gold To Go ។

ទោះបីជាមានភាពពេញនិយមនៃមាសក្នុងស្រុកក៏ដោយ ធនាគារកណ្តាលរបស់កូរ៉េខាងត្បូង(BOK) កំពុងរៀបចំវិធីសាស្រ្តប្រុងប្រយ័ត្នបន្ថែមទៀតចំពោះការទិញមាស ដើម្បីកាត់បន្ថយការប៉ះពាល់ដល់ប្រាក់ដុល្លារអាមេរិកក្នុងទុនបម្រុងរបស់ខ្លួន។ នៅក្នុងរបាយការណ៍ខែមិថុនានេះ BOK បាននិយាយថា ខ្លួនរក្សាសាច់ប្រាក់ដុល្លារអាមេរិកនៅពេលមានហានិភ័យនៃការធ្លាក់ចុះសេដ្ឋកិច្ចខ្ពស់ និងភាពមិនច្បាស់លាស់នៃភូមិសាស្ត្រនយោបាយ រួមទាំងកំពុងព្រួយបារម្ភអំពីទិសដៅនៃតម្លៃមាស។ ដូច្នោះហើយ វិធីសាស្រ្តប្រុងប្រយ័ត្នគឺចាំបាច់សម្រាប់ការកំណត់ថា តើត្រូវបង្កើនសមាមាត្រនៃចំនួនមាសនៅក្នុងទុនបំរុងប្តូរប្រាក់បរទេសឬអត់?

មិនត្រឹមតែប៉ុណ្ណោះ ធនាគារកណ្តាលក៏បានកត់សម្គាល់ផងដែរថា ការឡើងថ្លៃតម្លៃមាសអាចជិតដល់ចំណុចកំពូល។ ប្រសិនបើអវិជ្ជមានមាសកាន់តែច្រើននោះ គឺអត្រាការប្រាក់ខ្ពស់ដែលបង្កភាពលំបាកក្នុងការលក់ចេញវិញ។​ កាលពីខែឧសភាកន្លងទៅនេះ ធនាគារកណ្តាលកូរ៉េ BOK បានកាន់កាប់មាសចំនួន ១០៤,៤ តោននៅក្នុងទុនបំរុងប្តូរប្រាក់បរទេសរបស់ខ្លួន ដែលមានតម្លៃប្រហែល ៤,៨ ពាន់លានដុល្លារ ឬ ស្មើនឹង ១,១៤ ភាគរយនៃទុនបម្រុងសរុបរបស់ខ្លួន៕