មនុស្សភាគច្រើនសុទ្ធតែបានស្គាល់ពីភាពទូលំទូលាយនៃកេរ្តិ៍ឈ្មោះដ៏ល្បីល្បាញរបស់ Amazon.com ដែលជាទីផ្សារលក់ទំនិញអនឡាញដ៏ជោគជ័យបំផុត និងអាចទាញយកចំណូលបានយ៉ាងច្រើនបំផុតអស់រយៈពេលជាច្រើនទសវត្សរ៍មកហើយ។ គំរូអាជីវកម្មអនឡាញមួយនេះ បានទាក់ចិត្តសហគ្រិនរាប់រយរាប់ពាន់នាក់នៅជុំវិញពិភពលោកក្នុងការដើរតាមក្តីស្រម៉ៃ និងសង្ឃឹមទទួលបានជោគជ័យដូចទៅនឹង Amazon ដែរ ប៉ុន្តែគេក៏មិនត្រូវភ្លេចនោះទេថា អាជីវកម្មមួយដែលអាចជោគជ័យមិនមែនជារឿងចៃដន្យនោះឡើយ។

Amazon.com បច្ចុប្បន្នជាក្រុមហ៊ុនលក់ទំនិញអនឡាញដ៏ធំបំផុតនៅលើពិភពលោកដោយមានលោក Jeff Bezos ជាស្ថាបនិកក្រុមហ៊ុន។ តើរបៀបនៃការធ្វើអាជីវកម្មរបស់បុរសអាមេរិករូបនេះចាប់ផ្តើមដំបូងដោយរបៀបណា ហើយអ្វីដែលសហគ្រិនគួររៀនសូត្រអំពីអាជីវកម្មរបស់ Amazon?

ប្រវត្តិមួយចំនួនរបស់ក្រុមហ៊ុនត្រូវបានមនុស្សជាច្រើនបានដឹងថាជាក្រុមហ៊ុនលក់អនឡាញដែលបានកើតឡើងកាលពីថ្ងៃទី១៦ ខែកក្កដា ឆ្នាំ១៩៩៥។ គួរឲ្យចាប់អារម្មណ៍ និងមិនគួរនឹកស្មានសម្រាប់អ្នកមិនទាន់បានដឹង ពីព្រោះថាដំបូងឡើយអាជីវកម្មរបស់លោក Bezos គឺត្រឹមតែជាទីផ្សារអនឡាញសម្រាប់លក់សៀវភៅប៉ុណ្ណោះ។

Amazon.com បានរីកចម្រើនយ៉ាងឆាប់រហ័សជាមួយនឹងអាជីវកម្មដំបូងរបស់ខ្លួនដោយសៀវភៅរបស់ខ្លួនត្រូវបានដឹកជញ្ជូនទៅកាន់អតិថិជននៅទូទាំងរដ្ឋទាំង៥០របស់ប្រទេសអាមេរិកព្រមទាំងប្រទេសនានាប្រមាណជា៤៥ផងដែរ។

នៅចុងឆ្នាំ១៩៩៦ ក្រុមហ៊ុន Amazon បានរកប្រាក់ចំណូល ១៥,៧លានដុល្លារ ហើយនៅឆ្នាំ១៩៩៧ ស្ថាបនិកលោក Bezos បានយកក្រុមហ៊ុនចូលក្នុងទីផ្សារលក់ភាគហ៊ុនជាលើកដំបូង ហើយជាលទ្ធផល Amazon អាចប្រមូលបានប្រាក់វិនិយោគដល់ទៅ ៥៤លានដុល្លារ។

ឆ្នាំ១៩៩៨ ក្រុមហ៊ុនបានចាប់ផ្តើមផ្លាស់ប្តូរទិសដៅអាជីវកម្មរបស់ខ្លួនដោយបន្ថែមការលក់ទំនិញជាច្រើនទៀត ដូចជា ស៊ីឌី និងរបស់របរជាច្រើនមុខ រហូតមកដល់ខែធ្នូឆ្នាំ១៩៩៩ ក្រុមហ៊ុន Amazon បានដឹកជញ្ជូនទំនិញចំនួន២០លានមុខទៅកាន់ប្រទេសចំនួន១៥០នៅទូទាំងពិភពលោក ហើយនៅក្នុងខែដដែលនោះ Bezos ត្រូវបានគេដាក់ឈ្មោះថា Person of the Year ។

បច្ចុប្បន្ននៅលើវេបសាយ Amazon អ្នកអាចរកទិញទំនិញស្ទើរគ្រប់មុខចាំបាច់សម្រាប់ប្រើប្រាស់ចាប់រាប់ពីចុងជើងដល់ចុងសក់របស់មនុស្សម្នាក់ៗដែលជាវិធីសាស្ត្រគ្មាន២លើពិភពលោកអាចទាញបានប្រាក់ចំណូលដល់ទៅរាប់ពាន់លានដុល្លាររៀងរាល់ឆ្នាំ។

ផ្អែកទៅលើបទពិសោធន៍អាជីវកម្មរបស់ Amazon ដែលគេទទួលបាននៅពេលនេះខុសពីអាជីវកម្មផ្សេងៗទៀតដែលតែងតែជួបប្រទះបញ្ហាឧបសគ្គខ្លាំង ប៉ុន្តែ Amazon ហាក់ដូចជាបានដំណើរការយ៉ាងរលូន។

មកដល់ពេលនេះ រឿងសំខាន់មួយដែលគេគួរស្វែងយល់ និងរៀនសូត្រពីអាជីវកម្មមួយរបស់ Aamzon គឺមាន២ចំណុចដែលទី១គឺជាការធ្វើអាជីវកម្មចំពេលវេលា ខណៈដែល Amzaon បានចាប់ផ្តើមចំពេលវេលានៃការផ្លាស់ប្តូរបច្ចេកវិទ្យាក្នុងសម័យដែលពិភពលោកកំពុងដើរទៅមុខជាមួយនឹងប្រព័ន្ធអ៊ិនធឺណេត ហើយមេរៀនទី២គេអាចទទួលបាន ក៏ជាគោលការណ៍ដែលមនុស្សជោគជ័យភាគច្រើនធ្លាប់បានលើកឡើងដែរ នោះគឺជាការចាប់ផ្តើមអាជីវកម្មពីតូចបំផុត និងសាមញ្ញបំផុត ពីព្រោះថាវាអាចឲ្យមនុស្សភាគច្រើនងាយស្រួលយល់ពីគំនិតអាជីវកម្ម និងការប្រើប្រាស់សេវា ឬផលិតផលរបស់អ្នកលឿន និងមុនគេ៕