ភ្នំពេញ ៖ ជាធម្មតា មនុស្សតែងតែចង់មានការគ្រប់គ្រងចំណូល និងចំណាយឱ្យបានត្រឹមត្រូវ ពិសេសសល់លុយខ្លះបន្ទាប់ពីការចំណាយ ដើម្បសន្សំសម្រាប់អនាគត ហើយបើសិនជាមិនមានការគ្រប់គ្រងលុយឱ្យបានត្រឹមត្រូវនោះទេ នោះវានឹងឱ្យប្រព័ន្ធហិរញ្ញវត្ថមានលិចធ្លាយ ឬអាចឈានដល់ការជួបប្រទះបញ្ហាហិរញ្ញវត្ថុផ្ទាល់ខ្លួន។

លោក ង៉ែត ជូ អ្នកជំនាញសេដ្ឋកិច្ច និងហិរញ្ញវត្ថុ បានឱ្យដឹងថា សម្រាប់មនុស្សជាច្រើន នៅមិនចេះស្ងៀម បន្តិចនឹកចង់បាននេះ បន្តិចនឹកចង់បាននោះមិនចេះចប់មិនចេះហើយ ហើយពេលឃើញមានការលក់សំលៀកបំពាក់បញ្ចុះតម្លៃ ចិត្តក៏នឹកចង់ដើរមើលរកទិញ។ ពេលទូរសព្ទចេញស៊េរីថ្មី ចិត្តក៏ចង់បាន។ បើចេះតែបណ្តោយតាមចិត្ត នោះការគ្រប់គ្រងចំណាយរបស់អ្នកដូចទូកលេចធ្លាយ ដែលអាចនឹងងាយរងការលិចលង់ជាក់ជាមិនខាន។

លោកបានបន្តថា បើដូច្នេះតើអ្នកអាចគ្រប់គ្រងចិត្តដោយរបៀបណា? អ្នកអាចគ្រប់គ្រងចិត្តតាមរយៈវិធីសាស្ត្រចំនួន៤ គឺបង្កើតឧបសគ្គក្នុងការចំណាយ ពន្យាពេលទិញ ប្រាប់ថានឹងមានស៊េរីថ្មីៗទៀតនៅឆ្នាំក្រោយ ឬរំលឹកដល់គោលដៅផ្នែកហិរញ្ញវត្ថុដែលអ្នកបានកំណត់រួចហើយ ៖

១) បង្កើតឧបសគ្គក្នុងការចំណាយ៖

សម័យកាលបច្ចេកវិទ្យាពិតជាមានភាពងាយស្រួល ស្ទើរតែរាល់ការចំណាយអាចធ្វើប្រតិបត្តិការតាមទូរសព្ទដៃ។ ភាពងាយស្រួលបែបនេះ អាចធ្វើអោយអ្នកដែលខ្វះវិន័យហិរញ្ញវត្ថុចំណាយតាមចិត្តចង់បាន។ ដូច្នេះ អ្នកគួរសាកល្បងបង្កើតឧបសគ្គនៃការចំណាយតាមរយៈការភ្ជាប់អេបទៅគណនីដែលមានតែចំនួនសាច់ប្រាក់ដែលអ្នកត្រូវការចំណាយចាំបាច់ជាប្រចាំ ឬចាយជាសាច់ប្រាក់សុទ្ធ។ ឧទាហរណ៍ លោក Warren Buffet មានទម្លាប់ដាក់សាច់ប្រាក់តែ ៤០០ ដុល្លាក្នុងការបូបលុយរបស់គាត់សម្រាប់ការចំណាយចាំបាច់នានា។

២) ពន្យាពេលទិញ៖

នៅពេលចិត្តចង់បានអ្វីមួយដែលមិនចាំបាច់ ឬមិនមានក្នុងខ្ទង់ចំណាយ អ្នកគប្បីសាកល្បងសួរខ្លួនឯងថា តើខ្ញុំពិតជាត្រូវការរបស់នេះចាំបាច់ឬទេ? សួររួចប្រាប់ខ្លួនឯងថាចាំមកលើកក្រោយចាំទិញក៏មិនហួសពេលដែរ។ ម្យ៉ាងត្រូវដាក់ក្នុងខ្ទង់ថវិកាសិនមុននឹងទិញ។ ធ្វើដូច្នេះ ចិត្តរបស់អ្នកអាចប្រែប្រួលហើយត្រឡប់ជាលែងចង់បានវិញក៏មាន។

៣) ប្រាប់ចិត្តថានឹងមានស៊េរីថ្មី និងល្អជាងនេះនៅឆ្នាំក្រោយ៖

ឧទាហរណ៍ ប្រសិនបើអ្នកចង់ទិញរថយន្តថ្មីនៅពេលនេះ អ្នកប្រហែលជាគួរសាកល្បងគិតថាបើប្តូររថយន្តថ្មីដែលប្រើប្រេងឥន្ទនៈនៅពេលនេះតើសមហេតុផលឬទេ បើពិភពលោកកំពុងវិវត្តទៅប្រើរថយន្តអេឡិកទ្រិក (រថយន្តអាគុយ) ដូចជាម៉ាកតេស្លា ភីវ៉ាយឌី។ល។ ការចោទសួរបែបនេះអាចបង្កាក់ចិត្តដែលចង់បានដោយមិនសមហេតុផល។

៤) រំលឹកដល់គោលដៅហិរញ្ញវត្ថុដែលអ្នកបានកំណត់រួចហើយ៖

អ្នកគួរមានគោលដៅផ្នែកហិរញ្ញវត្ថុធំៗជាក់លាក់ដែលធ្វើឱ្យអ្នករំភើបរីករាយ និង សំដៅតម្រង់ការគ្រប់គ្រង់ហិរញ្ញវត្ថុប្រកបដោយប្រសិទ្ធិភាពដើម្បីឱ្យសម្រេចគោលដៅទាំងនោះ។ គោលដៅទាំងនោះ ដូចជាអ្នកមានបំណងបញ្ជូនកូនៗទាំងពីរទៅរៀននៅបរទេសក្នុងរយៈពេល១០ឆ្នាំខាងមុខ ហើយអ្នកត្រូវការប្រាក់៣០ម៉ឺនដុល្លាដើម្បីផ្គត់ផ្គង់ការស្នាក់នៅ និងការសិក្សារបស់ពួកគេ។ អ្នកត្រូវការប្រាក់១លានដុល្លា ដើម្បីចូលនិវត្តន៍ក្នុងរយៈពេល៥ឆ្នាំទៀត។ល។ ការនឹកគិតដល់គោលដៅធំៗដ៏គួរឱ្យរំភើបបែបនេះ ចិត្តរបស់អ្នកអាចប្តូរវិញភ្លាមក៏មាន។

សរុបមកអ្នកគួរព្យាយាមកាត់បន្ថយចំណាយតាមចិត្ត។ ការព្យាយាមបង្អាក់មិនចេះតែបណ្តោយតាមចិត្តយូរៗទៅ នោះអ្នកនឹងមិនលំបាកគ្រប់គ្រងចិត្តទៀតទេ។ ប្រៀបដូចកូនក្មេងដែលទារចង់បាននេះចង់បាននោះ ហើយបើអ្នកបដិសេធញយៗ នោះក្មេងក៏ឈប់ទារផ្តេសផ្តាសដែរ។ ប៉ុន្តែបើអ្នកចេះតែបណ្តោយឱ្យតាមចិត្តក្មេង នោះក្មេងនឹងមានទម្លាប់ទារជាប្រចាំ៕