ភ្នំពេញ ៖ ពាក្យថាបំណុល គឺមិនមែនសំដៅលើភាពអវិជ្ជមានទាំងស្រុងនោះទេ ពោល គឺបំណុលមានគុណសម្បត្តិ និងគុណវិបត្តរៀងៗខ្លួន។ ក្នុងនោះ ការជាប់បំណុលនៅតាមស្ថាប័នផ្លូវការដូចជា គ្រឹះស្ថានមីក្រូ​ហិរញ្ញវត្ថុ និងធនាគារ គឺស្មើទៅនឹងបំណុលល្អ ដោយហេតុថាអតិថិជន​ម្នាក់ៗតម្រូវឱ្យឆ្លងកាត់ការវាយតម្លៃយ៉ាងល្អិតល្អន់មុននឹងទទួលបានកម្ចី។ រីឯការជាប់បំណុលក្រៅផ្លូវការ គឺជាមូលហេតុសំខាន់មួយដែលអាចនាំឱ្យប្រជាជនធ្លាក់ចូលក្នុងបំណុលលើសលប់ ដោយសារតែការប្រាក់ខ្ពស់ រីឯដំណើរការផ្ដល់កម្ចីគឺធ្វើឡើងដោយមិនបានសិក្សាពីលទ្ធភាពសងត្រឡប់ឱ្យបានច្បាស់លាស់។ ប៉ុន្តែយ៉ាងណា ក្នុងករណីដែលបុគ្គលម្នាក់បានធ្លាក់ចូលទៅក្នុងបញ្ហាបំណុលលើសលប់ទៅ​ហើយនោះ អ្នកជំនាញ​បានណែនាំនូវដំណោះស្រាយមួយចំនួនដែលរួមមានដូចខាងក្រោមនេះ ៖

១. ថែរក្សាសុខភាពផ្លូវកាយ និងផ្លូវចិត្ត ៖ ជាការពិត ដើម្បីអាចដោះស្រាយបញ្ហានានាបាន បុគ្គលរូបនោះត្រូវថែរក្សាសុខភាពរបស់ខ្លួនទាំងផ្លូវកាយ និងផ្លូវចិត្តឱ្យបានរឹងមុំាជាមុនសិន។

២. ថែរក្សាសុខភាពហិរញ្ញវត្ថុ ៖ មិនត្រឹមតែសុខភាពផ្លូវកាយ ផ្លូវចិត្តទេ ដែលមានសារៈសំខាន់ សុខភាពហិរញ្ញវត្ថុក៏ជារឿងសំខាន់មួយផងដែរ។ សុខភាពហិរញ្ញវត្ថុនេះគឺសំដៅទៅលើការចាយវាយទូទៅរបស់បុគ្គលម្នាក់ៗ។ ការមានសុខភាពហិរញ្ញវត្ថុល្អ គឺបានន័យថាបុគ្គលនោះបានរៀបចំផែនការចំណាយបានត្រឹមត្រូវ ពោលគឺមិនលើសពីចំណូលដែលរកបាន។ នេះបើតាមការបញ្ជាក់របស់ លោក កាំង តុងងី ប្រធាននាយកទំនាក់ទំនងនៃសមាគមមីក្រូហិរញ្ញវត្ថុកម្ពុជា។

៣. កាត់បន្ថយការចំណាយដែលមិនចាំបាច់ ៖ អ្នកជំនាញដដែលបានបន្តណែនាំឱ្យពិនិត្យមើលទៅលើខ្ទង់ចំណាយប្រចាំថ្ងៃរបស់ខ្លួន ដើម្បីរកឱ្យ​ឃើញ​នូវចំណាយទាំងឡាយណាដែលមិនចាំបាច់។ ចំណាយមិនចាំបាច់ដូចជា ការដើរលេងកម្សាន្ដ ការទិញសម្ភារៈនិយម ការជួបជុំគ្នាជាមួយមិត្តភក្កិជាដើម គឺជាអ្វីដែលអាចកាត់បន្ថយបាន។

៤. បង្កើនប្រាក់ចំណូល ៖ ការកាត់បន្ថយចំណាយតែមួយមុខក៏មិនទាន់គ្រប់គ្រាន់ដែរ វាក៏ទាមទារឱ្យបុគ្គលនោះរិះរកវិធីដើម្បីបង្កើនចំណូលបន្ថែម ដូច្នេះទើបអាចមានលទ្ធភាពសងត្រឡប់ទៅកាន់ម្ចាស់បំណុលវិញ។

៥. រៀបចំផែនការ ៖ បន្ទាប់ពីបានដឹងលើការចំណាយ ចំណូលទូទៅហើយ អ្នកជំនាញខាងលើបានណែនាំឱ្យរៀបចំ​ផែនការចាយវាយឡើងវិញ។ ផែនការដែលរៀបចំថ្មីនេះ ត្រូវធ្វើយ៉ាងណាឱ្យសមស្របទៅនឹងលទ្ធ ភាពជាក់ស្ដែងរបស់បុគ្គល។

៦. ចរចាជាមួយម្ចាស់បំណុល ៖ ត្រង់ចំណុចនេះ លោកក៏បានគូសបញ្ជាក់ផងដែរថា ស្ថាប័នផ្លូវការតែងតែបើកចំហរក្នុងការចរចាជាមួយអតិថិជន ដើម្បីរកដំណោះស្រាយរួមគ្នា ដូច្នេះទាមទារឱ្យអតិថិជនខ្លួនឯងហ៊ានបើកចំហរ ដើម្បីប្រាប់ពីបញ្ហារបស់ខ្លួនទៅកាន់ស្ថាប័នផងដែរ។ ជាក់ស្ដែង ប្រសិនបើអតិថិជនណាម្នាក់បាត់បង់ប្រភពចំណូល ឬប្រភពចំណូលធ្លាក់ចុះ គ្រឹះស្ថាននឹងជជែកដើម្បីរៀបចំកាលវិភាគសងត្រឡប់ឡើងវិញឱ្យសមស្របទៅនឹងប្រភពចំណូលបច្ចុប្បន្នរបស់អតិថិជនរូបនោះ។

ជាចុងក្រោយ លោក កាំង តុងងី ក៏បានក្រើនរំលឹកទៅដល់ប្រជាជនផងដែរឱ្យមានការប្រុងប្រយ័ត្នចំពោះកម្ចីក្រៅផ្លូវការ ដូចជា កម្ចីឯកជន និងកម្ចីអនឡាញ ដែលកម្ចីទាំងនេះមិនស្ថិតក្រោមកិច្ចការពាររបស់ច្បាប់នោះ​ទេ៕