បរទេស៖ យោងទៅតាមប្រភពពី Weforum បានបង្ហាញថា ប្រភេទពូជសត្វ និងរុក្ខជាតិប្រហែលមួយលានត្រូវបានគំរាមកំហែងងាយនឹងការផុតពូជដោយសារតែសកម្មភាពរបស់មនុស្ស។ ស្របពេលនេះដែរ ទីក្រុងចំនួន៤ បានបង្ហាញពីរបៀបដែលពួកគេកំពុងថែរក្សាជីវចម្រុះ។

ទន្ទឹមនឹងនេះ សិង្ហបុរីជាជម្រករបស់ប្រភេទពូជសត្វ និងរុក្ខជាតិប្រមាណជាង ៤ ម៉ឺនប្រភេទ។ មជ្ឈមណ្ឌលជីវចម្រុះជាតិរបស់ប្រទេសនេះបានបង្កើតកម្មវិធីមួយដែលអនុញ្ញាតឱ្យប្រជាពលរដ្ឋផ្ញើរូបថតរុក្ខជាតិ និងសត្វទៅកាន់មូលដ្ឋានទិន្នន័យកណ្តាលមួយ ដើម្បីរួមគ្នាតាមដានពីជីវិតនៃជីវចម្រុះទាំងនោះ និងជាការចែកចាយចំណេះដឹងឲ្យកាន់តែទូលាយ។ គោលនយោបាយ​អភិវឌ្ឍន៍​ទីក្រុង​បៃតង​របស់​សិង្ហបុរី​ក៏បាន​ជំរុញ​ជីវចម្រុះ​ផងដែរ ដោយតំបន់បៃតងរបស់ទីក្រុងបានពង្រីកពី ៣៦ ភាគរយទៅ ៤៧ ភាគរយនៃផ្ទៃដីសរុបរបស់វា។

ស្របពេលនេះដែរ អាជ្ញាធរក្នុងទីក្រុង Eindhoven របស់ប្រទេសហូឡង់ កំពុងលើកទឹកចិត្តពលរដ្ឋកុំឱ្យបោសស្លឹកឈើជ្រុះនៅក្នុងសួនច្បារ ពីព្រោះស្លឹកឈើទាំងនោះការពារជីវិតសត្វល្អិត និងជាចំណីអាហាររបស់ពួកវាផងដែរ។ ការ​ទុក​ស្លឹក​ឈើចោលផ្តល់មាន​អត្ថប្រយោជន៍ដល់បរិស្ថាន​ជា​ច្រើន និងមានតម្រូវការទឹកតិចក្នុងរដូវក្តៅ។ លើសពីនេះ ក្រុមប្រឹក្សា​របស់រដ្ឋាភិបាល​គ្រោងនឹងពង្រាយកន្ត្រក​ចំនួន ២០០ ជុំវិញ​ទីក្រុង ដោយសង្ឃឹម​ថាវិធីនេះ​នឹង​លើក​ទឹក​ចិត្ត​ដល់​អ្នក​ដែល​ចង់​រៀបចំ​ស្លឹក​ឈើ​ជ្រុះ​ឱ្យ​បាន​ស្អាតជាងមុន។

មួយវិញទៀតនោះគឺនៅក្នុងទីក្រុង Montreal ប្រទេសកាណាដាកំពុងពន្យល់ដល់ប្រជាពលរដ្ឋអំពីមូលហេតុដែលគួរថែរក្សាដើមឈើងាប់ជាជាងកាប់បំផ្លាញ និងដកចេញ។ ទីក្រុងពន្យល់ថា ពួកវាផ្តល់ទីជម្រកសម្រាប់ប្រភេទសត្វស្លាប និងថនិកសត្វតូចៗជាច្រើនផងដែរ។ ជាក់ស្តែង ប្រហោងដើមឈើគឺជាសំបុកសត្វស្លាប ហើយវាមានប្រហែលមួយភាគប្រាំនៃសំបុកសរុបនៅក្នុងឧទ្យានធម្មជាតិក្នុងទីក្រុង Montreal។ ដើមឈើពុកផុយអាចធ្វើជាជម្រកសត្វបានរហូតដល់ ៣០ ឆ្នាំ មុនពេលដែលពួកវាត្រឡប់ទៅជាសារធាតុសរីរាង្គនៅក្នុងដីវិញ។

នៅក្នុងប្រទេសអូស្ត្រាលីវិញ ម្ចាស់ផ្ទះ ឬ ម្ចាស់ដីឯកជនជាច្រើនកំពុងសិក្សាស្វែងយល់អំពីរបៀបកែលម្អសួន ដែលអំណោយផលដល់ជីវិតភាវៈរស់ទាំងនោះ។ ‘Gardens for Wildlife’ គឺជាបណ្តាញសហគមន៍ក្នុងទីក្រុង Melbourne ដែលប្រមូលផ្តុំប្រជាពលរដ្ឋ អាជីវកម្ម និងសាលារៀន ដើម្បីការពារថែទាំរុក្ខជាតិ និងសត្វដើម។ សកម្មភាពទាំងនោះមានដូចជា ការដាំដើមឈើពូជចាស់ៗ ដាំដើមឈើដុះក្រាស់ដែលសត្វស្លាបអាចជ្រកកោន ស្រះចិញ្ចឹមកង្កែប និង ចិញ្ចឹមរុក្ខជាតិសម្រាប់មេអំបៅ។ លើសពីនេះក្រុមប្រឹក្សាក៏បានណែនាំដល់អ្នកចូលរួម កុំឱ្យព្យាយាមចិញ្ចឹមសត្វព្រៃព្រោះវាអាចបង្កបញ្ហាច្រើនជាងការដោះស្រាយ ប៉ុន្តែការជួយពួកវាគឺជាមធ្យោបាយដ៏ល្អបំផុតដូចជា ការផ្តល់ទឹក និង ដាំដើមឈើជាជម្រកសត្វទាំងនោះជាដើម៕