ភ្នំពេញ ៖ ស្ថិតនៅក្នុងអំឡុង​ពេលនៃការរាតត្បាតជំងឺកូវីដ១៩ មានមនុស្សមិនតិចនាក់នោះទេ​ដែលជួបវិបត្តិហិរញ្ញវត្ថុ​ ដោយខ្លះបាត់បង់ការងារ បាត់ប្រាក់​ចំណូ​ល​ សម្រាប់ផ្គត់ផ្គង់គ្រួសារ ប៉ុន្តែក៏មានអ្នកខ្លះ​បានកែច្នៃ​វិបត្តិឱ្យ​ទៅជា​ប្រភពចំណូល​ដ៏សំខាន់សម្រា​ប់​ដោះស្រាយ​បញ្ហាសេដ្ឋកិច្ចគ្រួសារបានយ៉ាងប្រសើរ។ ជាក់ស្ដែង ក្រៅពីអាជីវកម្មដឹកជញ្ជូន និងការលក់ទំនិញតាមអនឡាញ ដែលអាចទទួលបានកម្រៃក្នុងអំឡុងពេលវិបត្តិកូវីដនោះ បុរសជាកសិករម្នាក់បានកែច្នៃដីទំនេរ​របស់​ខ្លួន​ដែល​មានទំហំត្រឹម ៤ X ៩ ម៉ែត្រ បង្កើតជាអាជីវកម្មកសិកម្មបណ្តុះផ្សិតក្ងោក ឬផ្សិតស លក់ ដែលអាចទទួលបានចំណូលប្រចាំខែជាង ២លានរៀលក្នុងមួយខែ។

លោក ​សម សុខ​ ជាកសិករ​មួយរូបរស់​នៅភូមិអង្គរជ័យ​ទី​២ ឃុំ​ដំណាក់​កន្ទួត​ខាងត្បូង ស្រុកកំពង់ត្រាច ខេត្តកំពត​ បានកែខៃជីវភាព​របស់ខ្លួនពីភាពខ្សត់ខ្សោយ​ក្នុងស្ថានការវិបត្តិកូវី-១៩ មករកភាពល្អប្រសើរ និងបានធូរស្រាលពីការចំណាយប្រចាំថ្ងៃ ហើយថែមទាំងអាចរកបាន​ចំណូល​ប្រចាំខែប្រមាណជាង ២លានរៀល​ ឬច្រើនជាងនេះសម្រាប់​ផ្គត់ផ្គង់ជីវភាពគ្រួសារ។

បុរសរូបនេះបានប្រាប់ AMS ឱ្យដឹងថា គ្រាដែលមុនពេលមានវិបត្តិជំងឺ​កូវីដ-​១៩​ លោកបានទៅស៊ីឈ្នួលធ្វើកាឱ្យគេ​នៅ​ខេត្តព្រះសីហនុ​ដោយ​ទទួលបានប្រាក់បៀវត្សរ៍​ប្រចាំខែគួរសមគ្រាន់ដោះស្រាយជីវភាពគ្រួសារ ប៉ុន្តែដោយសារកូវីដ​១៩​ លោក​ត្រូវបាន​បាត់បង់ការងារ​ បាត់បង់​ចំណូល​សម្រាប់ផ្គត់ផ្គង់​គ្រួសារ ​ហើយក៏ត្រលប់មកស្រុកកំណើត​វិញ ។​

លោក​បន្តថា នៅពេលត្រលប់មក​ដល់ស្រុកវិញ លោកមិនដឹងថា​ត្រូវធ្វើអ្វីនោះទេ ក្រោយមកលោកមើល​យូធូប (youtube)​ ពីបៀប​បណ្ដុះផ្សិត​ ហើយក៏ចាប់អារម្មណ៍​លើការ​ងារ​បណ្ដុះផ្សិតក្ងោក​នេះ និងបានអនុវត្តន៍តាម​ដោយ​គ្រាន់តែយក​ដី​ទំនេរទំហំ ​៤ម៉ែត្រ​គុណនឹង​៩ម៉ែត្រ​សម្រាប់​បង្កើត​អាជីវកម្មមួយនេះ ។

លោកបន្ថែមថា ៖

“អាជីវកម្មមួយនេះ​បានធ្វើឱ្យខ្ញុំអាចទទួលបានប្រាក់កម្រៃ​ជា​ប្រចាំថ្ងៃ​ ដើម្បី​ផ្គត់ផ្គង់​គ្រួសារ និងសម្រាប់​កូនៗសិក្សា​ ក៏ដូចជាការ​ចំណាយផ្សេងៗប្រចាំថ្ងៃ និងចំណាយក្នុងពិធី​បុណ្យ មង្គលការញាតិមិត្ត និង​ថ្លៃម្ហូបអាហារ​ជាដើម។ ក្នុងមួយ​ថ្ងៃ​ ខ្ញុំអាច​ទទួលបាន​ផល​ផ្សិតពី​ ២០គីឡូក្រាម​ទៅ ​៥០គីឡូក្រាម​ ហើយក្នុងមួយគីឡូក្រាម​អាច​លក់​បាន​ ៥ ០០០រៀល​ទៅ ៦ ០០០រៀល​ អាស្រ័យ​លើ​ទីផ្សារ​សំបូរ​ផ្សិត ​ឬអត់ ។ បើសិនជា​នៅលើទីផ្សារមិនសូវ​សំបូរ​អាច​លក់បានថ្លៃបន្តិច តែបើសំបូរយ៉ាង​ហោចណាស់ក៏បា​ន ​៥០០០រៀល​ក្នុងមួយគីឡូក្រាម​ដែរ”

លោក​បន្ថែមទៀតថា ៖

“ការងារ​ជា​កសិករ​វាពិបាកបន្តិច​តែមានសេរីភាព បើទោះបីជា​ចំណូលនេះមិនច្រើ​នដូ​ច​ដែល​​​​ធ្វើការឱ្យគេដែលបើកប្រាក់ខែម្ដង​ៗឃើញថា​ច្រើន​មែន តែពេលចាត់ចែង​ក៏អត់មានសល់​អ្វីដែរ ។ ​ប​ច្ចុប្ប​ន្ន​​​ដោយសារតែទីផ្សារ​មានតម្រូវការ​ខ្ពស់ ជាពិសេស​នៅរដូវ​កាលបុណ្យ ឬមង្គលការ​ផ្សេងៗ ខ្ញុំមា​ន​គ​ម្រោ​ង​​​​​​​ព​ង្រី​ក​​ផ្ទៃដីបណ្តុះផ្សិតបន្ថែមទៀត​ ដើម្បីឱ្យស្របទៅ​នឹង​តម្រូវការ​ជាក់ស្ដែង”

នៅក្នុងឱកាសនេះផងដែរ លោកក៏បានបញ្ជាក់ឱ្យដឹងដែរថា ការអនុវត្ត​លើ​ការ​ងារ​នេះ លោកមិនបានរៀនជំនាញ​បច្ចេកទេស​ពី​ខាងណា​នោះទេ ពោលគឺលោក​​មើ​ល​តាមវីឌីអូ យូធូប (youtube)​ ដែលគេ​បង្ហោះ​ក្នុងបណ្ដាញ​យូធូប ហើយក៏អនុវត្ត និងទទួលបាន​លទ្ធផល​បែប​នេះ។ ជាមួយគ្នានេះ លោកក៏ចង់ឱ្យ​កសិករដទៃទៀត ​ដែល​មានដីទំនេរ​ ទោះជាមិនធំក៏ដោយ ក៏អាចសាក​អនុវត្តន៍​លើការ​ងារ​បណ្ដុះផ្សិត​ក្ងោក ឬមុខ​របរកសិកម្ម​ផ្សេង​ៗ​ទៀត​ដែលអាច​រកចំណូល​បានប្រចាំថ្ងៃ ដោយមិនចាំបាច់ធ្វើការងារឱ្យ​គេដែលមិនមា​នសេ​រី​ភាព​​នោះ​ទេ​ ។

ក្រៅពីលោក​ សំ សុខ​ បច្ចុប្បន្ន​នេះ​ក៏មានកសិករ​ជាច្រើនបានកែច្នៃ​ដី​ដែលទំនេរ​ក្នុងទំហំតូច​ៗ ទៅជា​ឱកាស​រក​​ប្រាក់ចំណូលបានសមរម្យ​សម្រាប់ដោះស្រាយ​ជីវភាពប្រចាំថ្ងៃ​ ហើយបើសិនជាមានលទ្ធភាពអាចពង្រីក​អាជីវកម្ម​កាន់តែធំដើម្បីផ្គត់ផ្គង់លើទីផ្សារ​ក្នុងមូលដ្ឋានទៅជា​ក្នុង​ស្រុក​ក្នុងខេត្ត​និង​ក្នុង​ប្រទេស​ផងដែរ ៕