សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កណ្ដាល៖ ការចិញ្ចឹមត្រីឆ្ដោបានក្លាយជាប្រភពចំណូលដ៏សំខាន់សម្រាប់គ្រួសារ លោក នី ប្រុស នៅស្រុកស្អាង ខេត្តកណ្ដាល ដោយអាចប្រមូលផលបានពី ១០ ទៅ ១៥ តោនក្នុងមួយឆ្នាំ និងរកប្រាក់សរុបជិត ៤ ម៉ឺនដុល្លារ ក្នុងនោះអាចទទួលបានប្រាក់ចំណេញសុទ្ធប្រមាណ ២ ម៉ឺនដុល្លារ បន្ទាប់ពីកាត់កងចំណាយផ្សេងៗ។
ចំណូលពីមុខរបរនេះបានជួយសម្រួលបន្ទុកចំណាយក្នុងគ្រួសារ ជាពិសេសការសិក្សារបស់កូនៗ និងជួយឱ្យជីវភាពគ្រួសារកាន់តែប្រសើរឡើង។
លោក នី ប្រុស កសិករម្ចាស់ស្រះត្រី រស់នៅភូមិព្រែកតាឯក ឃុំតាលន់ ស្រុកស្អាង ខេត្តកណ្ដាល បានឱ្យដឹងថា លោកមានដីកន្លះហិកតា និងបានដាក់កូនត្រីឆ្ដោប្រមាណ ២ ម៉ឺនក្បាលក្នុងស្រះមួយ ដែលមានទទឹង ៣០ ម៉ែត្រ និងបណ្តោយ ៧០ ម៉ែត្រ។
លោកបានបន្ថែមថា ទោះបីការចិញ្ចឹមត្រីមានការប្រឈមខ្លះៗ និងទទួលបានផលមិនសូវទៀងទាត់ទៅតាមបច្ចេកទេស និងកត្តាអាកាសធាតុក៏ដោយ ក៏មុខរបរនេះនៅតែផ្តល់ផលចំណេញខ្ពស់។
លោក នី ប្រុស បានបញ្ជាក់ថា ក្នុងមួយស្រះដែលប្រមូលផលបានប្រមាណ ១៥ តោន ទោះបីមានការខាតបង់ខ្លះ ក៏នៅតែអាចរកប្រាក់សរុបជិត ៤ ម៉ឺនដុល្លារ ក្នុងនោះចំណេញបានប្រហែល ២ ម៉ឺនដុល្លារ បន្ទាប់ពីកាត់កងចំណាយផ្សេងៗ រួមទាំងថ្លៃដើមផលិតកម្ម។
បញ្ហាប្រឈមមួយក្នុងការចិញ្ចឹមត្រីឆ្ដោ គឺការផ្គត់ផ្គង់ចំណី ដោយសារត្រីប្រភេទនេះស៊ីតែសាច់សុទ្ធ ឬកូនត្រីសុទ្ធ ខុសពីត្រីទូទៅដែលអាចស៊ីចំណីផលិតដោយខ្លួនឯង ឬចំណីរោងចក្រ។ ត្រីឆ្ដោមិនស៊ីចំណីនុយ និងមិនអាចស៊ីចំណីដែលទុកស្តុកបានរាប់ខែទេ។ ដូច្នេះ បញ្ហាប្រឈមធំគឺនៅក្នុងខែដែលចំណីមិនសូវសម្បូរ ខណៈខែដែលមានចំណីសម្បូរ ការផ្គត់ផ្គង់មានភាពងាយស្រួលជាង។
លោក នី ប្រុស បានឱ្យដឹងថា សម្រាប់ត្រីចំនួន ២ ម៉ឺនក្បាលដែលមានទម្ងន់ពី ៣ ទៅ ៤ ខាំ ត្រូវដាក់ចំណីជាង ២០០ គីឡូក្រាមក្នុងមួយថ្ងៃ។ នៅពេលត្រីមានទម្ងន់លើសនេះ ក៏ត្រូវបន្ថែមចំណី ដើម្បីឱ្យត្រីអាចធំធាត់បានល្អ។
ក្រៅពីបញ្ហាចំណី ការប្តូរទឹកក៏ជារឿងសំខាន់សម្រាប់ការចិញ្ចឹមត្រីឆ្ដោ។ លោកបានបញ្ជាក់ថា ប្រសិនបើគ្មានទឹកសម្រាប់ផ្លាស់ប្តូរ នោះការចិញ្ចឹមត្រីឆ្ដោក៏ជួបការលំបាក។ ដើម្បីឱ្យត្រីធំធាត់បានល្អ ត្រូវប្តូរទឹកឱ្យបានញឹកញាប់ ហើយការមានទឹកស្អាតស្តុកទុកសម្រាប់ប្តូរក៏ជាកត្តាល្អផងដែរ។ សម្រាប់ការចិញ្ចឹមរបស់លោក លោកមានទឹកអណ្តូងស្នប់សម្រាប់ផ្គត់ផ្គង់ការប្តូរទឹកត្រី។
ពាក់ព័ន្ធនឹងទីផ្សារ និងតម្លៃ លោក នី ប្រុស បានបញ្ជាក់ថា បច្ចុប្បន្នទីផ្សារត្រីឆ្ដោមានភាពល្អប្រសើរ និងមានការប្រកួតប្រជែងតម្លៃពីសំណាក់ឈ្មួញកណ្ដាល។ ត្រីឆ្ដោដែលប្រមូលផលបាន ត្រូវបានលក់ទៅឱ្យឈ្មួញនៅតំបន់ព្រែកព្នៅ និងគីឡូម៉ែត្រលេខ ៦ ក្នុងតម្លៃចន្លោះពី ១០,០០០ រៀល ទៅជាង ១២,០០០ រៀលក្នុងមួយគីឡូក្រាម។
ការលក់ដូរមានភាពងាយស្រួល ដោយឈ្មួញចុះមកទិញ និងដឹកជញ្ជូនត្រីដល់ទីតាំងស្រះផ្ទាល់តែម្តង។
លោក នី ប្រុស បានឱ្យដឹងថា កត្តាដែលជួយឱ្យការចិញ្ចឹមត្រីរបស់លោកទទួលបានលទ្ធផលល្អ ក៏មានការចូលរួមចំណែកពីមន្ត្រីជំនាញរដ្ឋបាលជលផលប្រចាំស្រុកស្អាង ដែលបានចុះមកផ្តល់វគ្គបណ្តុះបណ្តាលបច្ចេកទេស ចែករំលែកបទពិសោធន៍ និងជួយអន្តរាគមន៍ដោះស្រាយបញ្ហាប្រឈមផ្សេងៗបានទាន់ពេលវេលា។
តាមរយៈចំណូលដែលទទួលបានពីការចិញ្ចឹមត្រី លោក នី ប្រុស មានលទ្ធភាពគ្រប់គ្រាន់ក្នុងការផ្គត់ផ្គង់ជីវភាពគ្រួសារ និងធានាការសិក្សារបស់កូនៗទាំង ៤ នាក់។ ក្នុងនោះ កូន ២ នាក់កំពុងសិក្សានៅភ្នំពេញ ដែលត្រូវចំណាយប្រាក់ប្រមាណ ២០០ ដុល្លារក្នុងមួយខែ ខណៈកូន ២ នាក់ទៀតកំពុងសិក្សានៅទីតាំងរស់នៅបច្ចុប្បន្ន។
ផ្អែកលើលទ្ធផលដែលទទួលបានពីមុខរបរនេះ លោក នី ប្រុស មានផែនការប្រមូលដើមទុនបន្ថែម ដើម្បីពង្រីកស្រះចិញ្ចឹម និងដាក់កូនត្រីបន្តទៀត។
ជាមួយគ្នានេះ លោកបានអំពាវនាវ និងលើកទឹកចិត្តដល់ប្រជាពលរដ្ឋផ្សេងទៀតឱ្យចាប់យកមុខរបរវារីវប្បកម្មនៅក្នុងស្រុក ដើម្បីបង្កើតប្រភពចំណូលរឹងមាំសម្រាប់គ្រួសារ និងចៀសវាងការធ្វើចំណាកស្រុកទៅប្រកួតប្រជែងការងារនៅឆ្ងាយពីផ្ទះ។
លោក នី ប្រុស បានបញ្ជាក់ថា ប្រជាពលរដ្ឋដែលចង់ចាប់យកមុខរបរចិញ្ចឹមត្រី អាចចិញ្ចឹមត្រីប្រភេទផ្សេងៗ ដូចជា ត្រីប្រា ត្រីអណ្តែង ត្រីរ៉ស់ និងត្រីទីឡាបយ៉ា ដែលនៅតំបន់នេះមានអ្នកចិញ្ចឹមច្រើន។
ចំពោះត្រីឆ្ដោ អ្នកចិញ្ចឹមគួរតែសិក្សាតាមរយៈវគ្គបណ្តុះបណ្តាល ឬសិក្សាពីអ្នកចិញ្ចឹមដែលមានបទពិសោធន៍ជាមុន ដើម្បីមានចំណេះដឹង និងបទពិសោធន៍ខ្លះ មុននឹងចាប់ផ្តើមចិញ្ចឹម ដើម្បីកាត់បន្ថយការខាតបង់ និងទទួលបានផលល្អពីការចិញ្ចឹម៕
Account
Security
Favourite Content