សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កាកសំណល់ប្លាស្ទិក ដូចជា កំប៉ុង ថង់ ទុយោជាដើម ជាសំរាមដែលគេគិតថាគ្មានប្រយោជន៍ និងត្រូវបានប្រមូលចាក់ចោលជាច្រើនតោននៅតាមកន្លែងចាក់សំរាមនានា។ ផ្ទុយពីគំនិត និងការគិតទូទៅរបស់មនុស្សមួយចំនួន ម្ចាស់សិប្បកម្មម្នាក់បានស្រាវជ្រាវ និងប្រមូលយកសំរាមប្លាស្ទិកទាំងនោះទៅកែច្នៃផលិតជាដុំឥដ្ឋអេកូ ដែលមានគុណភាពល្អសម្រាប់សាងសង់សំណង់កម្រិតមធ្យម និងបានចូលរួមជួយដល់បរិស្ថាន ដោយការកែច្នៃកាកសំណល់ឱ្យអស់ពីលទ្ធភាព។
ឥដ្ឋអេកូ (Eco-Bricks) ជាឈ្មោះសិប្បកម្មកែច្នៃកាកសំណល់ប្លាស្ទិកដែលគេឈប់ប្រើប្រាស់ ឬសូម្បីតែអេតចាយក៏មិនទិញដែរនោះ យកមកកិន និងលាយជាមួយដី ផលិតទៅជាដុំឥដ្ឋមួយប្រភេទដែលមានគុណភាពសម្រាប់ការសាងសង់សំណង់ផ្សេងៗ។
លោក សុខ ធី ជាស្ថាបនិកឥដ្ឋអេកូដែលមានទីតាំងនៅក្រុងតាខ្មៅ ខេត្តកណ្ដាល បានប្រាប់ AMS ឱ្យដឹងថា ឥដ្ឋអេកូ ជាឥដ្ឋដែលកែច្នៃពីកាកសំណល់ប្លាស្ទិក មានគុណភាពល្អ និងងាយស្រួលសាងសង់ មិនចាំបាច់បូកជញ្ជាំង ប្រើល្បាយស៊ីម៉ង់ត៍តិច មិនប្រើកម្លាំងពលកម្មជាងច្រើន ហើយចំណេញទាំងពេលវេលា និងចំណេញទាំងថវិកា ដោយក្នុងមួយខែសិប្បកម្មមួយនេះអាចផលិតបានចន្លោះពី ៨០០០-១០០០០ដុំ។
លោកបញ្ជាក់ថា ៖
«អតិថិជនរបស់ឥដ្ឋអេកូភាគច្រើនជាអ្នកនៅតាមបណ្ដាខេត្តដែលបានកម្ម៉ង់ទិញ ដោយ ១ការ៉េ មាន ៤០ដុំ លក់ក្នុងតម្លៃ ៨.៥ដុល្លារ។ ដោយឡែក បច្ចេកទេសក្នុងការផលិត យើងបានសិក្សាច្រើនប្រទេសផ្សេងគ្នា ដូចជា ឥណ្ឌា ថៃ ម៉ាឡេស៊ី ដោយច្របាច់បច្ចេកទេសទាំងនោះបញ្ចូលគ្នា រួមជាមួយនឹងការសិក្សាស្រាវជ្រាវបន្ថែមតាមអ៊ីធឺណេត ទើបអាចសម្រេចចេញជាប្រភេទឥដ្ឋមួយដែលច្នៃចេញពីកាកសំណល់វេចខ្ចប់អាហារដូចជា ថង់ ប្រអប់ស្នោ ទុយោ ជាដើម ដែលសុទ្ធសឹងជាកាកសំណល់ប្លាស្ទិចដែលគេមិនទិញយកទៅកែច្នៃបន្ត»។
ដោយឡែកពាក់ព័ន្ធនឹងការផលិតវិញ ស្ថាបនិកខាងលើបានប្រាប់ឱ្យដឹងថា ចំពោះការផលិត គឺមាន ៤ដំណាក់កាលធំៗ ដូចជា ដំបូងឡើយគេត្រូវកិនដីស្ងួតឱ្យម៉ដ្ឋ បន្ទាប់មកសម្អាត និងកិនប្លាស្ទិកឱ្យទៅជាកម្ទេចតូចៗ រួចលាយល្បាយទាំងអស់បញ្ចូលគ្នា ទើបចុងក្រោយគេអាចដាក់ចូលក្នុងពុម្ពឥដ្ឋសង្កត់ឱ្យបានហាប់ណែន ហើយដកចេញពីពុម្ពយកទៅស្រោចទឹក និងដាក់ហាលថ្ងៃឱ្យស្ងួត ខណៈដែលឥដ្ឋបរិស្ថាននេះមានគុណភាពល្អជាងឥដ្ឋក្រហមរហូតដល់ប្រមាណ៤ ទៅ ៥ដង។
គួរបញ្ជាក់ថា បច្ចុប្បន្ននេះ លោក សុខ ធី បានលក់សិទ្ធិអាជីវកម្មទៅឱ្យក្រុមហ៊ុនផ្សេងៗបានជាង១០សាខាហើយដែលមានន័យថា ក្រុមហ៊ុនទាំងនោះបានទិញសិទ្ធិអាជីវកម្មពីលោក។ ដូច្នេះហើយលោកត្រូវតែបង្រៀនពីជំនាញបច្ចេកទេសនិងបង្រៀនពីការដំឡើងម៉ាស៊ីនផលិតឥដ្ឋអេកូជូនដល់សាខាទាំងនោះដើម្បីឱ្យចេះផលិតឥដ្ឋអេកូពីកាកសំណល់ប្លាស្ទិកដូចលោកដែរ។ លោកបានឱ្យដឹងថា ឥដ្ឋអេកូ ដែលលោកផលិត មាន៥ប្រភេទគឺទី១-ឥដ្ឋលាតធម្មតា ទី២-ឥដ្ឋឡាំងតូ ទី៣-ឥដ្ឋម៉ូដសម្បកឈើទី៤-ឥដ្ឋផ្កាភ្ញីទេស និងទី៥-ឥដ្ឋរូបនាគ។រីឯទំហំវិញមានបណ្តោយ២៥សង់ទីម៉ែត្រ ទទឹង១២,៥០សង់ទីម៉ែត្រ និងកម្ពស់១០សង់ទីម៉ែត្រ ហើយមានអតិថិជនគ្រប់ប្រភេទបានបញ្ជាទិញឥដ្ឋយកទៅសាងសង់សំណង់ផ្សេងៗ៕
Account
Security
Favourite Content