សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ជំនាញផលិតនំ ជាជំនាញទន់ក្រៅពីកម្មវិធីសិក្សាគោល ដែលវិទ្យាល័យ ប៊ុន រ៉ានី ហ៊ុន សែន ចរិយាវង្ស នៃខេត្តកែប បានចាប់ផ្ដើមបង្រៀនប្រមាណជា២ឆ្នាំមកហើយ។ ថ្វីត្បិតថា ចំនួនសិស្សដែលចូលរៀនវគ្គនេះនៅមានកម្រិតតិចតួចនៅឡើយ ប៉ុន្តែរយៈពេលជាងមួយឆ្នាំចុងក្រោយនេះ សិស្សានុសិស្សអាចរកប្រាក់ចំណូលបានបន្តិចបន្តួចពីការលក់នំរបស់ខ្លួន។
បើតាមការឱ្យដឹងរបស់គ្រូដឹកនាំ ជំនាញនេះស្ថិតនៅក្រោមគម្រោងមួយដែលបណ្ដុះបណ្ដាលដោយវិទ្យាស្ថានបច្ចេកវិទ្យាកម្ពុជា (តិចណូ) ដែលកាលណោះ គ្រូបង្គោលបានទទួលការបណ្ដុះបណ្ដាល ចំនួន២សប្ដាហ៍។ ក្រោយការបណ្ដុះបណ្ដាល គ្រូបង្គោលបានត្រឡប់មកបង្រៀនតាមមុខវិជ្ជារបស់ខ្លួនវិញ បូករួមបន្ថែមនូវការបណ្ដុះបណ្ដាលជំនាញផលិតនំនេះទៅដល់សិស្សក្រោមគោលការណ៍ស្ម័គ្រចិត្ត។
យុវតី ចរិយា ដែលបច្ចុប្បន្នជាសិស្សថ្នាក់ទី១១ នៅវិទ្យាល័យ ប៊ុន រ៉ានី ហ៊ុន សែន ចរិយាវង្ស និងជាប្រធានក្រុមផលិតនំបានរៀបរាប់ឱ្យដឹងថា ខ្លួនបានចូលរួមក្នុងវគ្គនេះចាប់តាំងថ្នាក់ទី៩ មក ដោយមានក្រុមគ្រួសារគាំទ្រស្រាប់។
ដោយមានចំណូលចិត្តផ្នែកគេហវិជ្ជានេះផង ចរិយា ហាក់ចាប់យកចំណេះជំនាញនេះបានលឿនបើធៀបទៅនឹងសិស្សដទៃទៀត។
សម្រាប់ការលក់វិញ យុវតី ចរិយា បានឱ្យដឹងថា៖
«ដំបូងឡើយ យើងអត់ទាន់មានកន្លែងលក់ច្បាស់លាស់ទេ ជួនកាលអាណាព្យាបាលជួយទិញ ជួនកាលផ្ញើអ្នកលក់នៅក្នុងសាលាយើង តែក្រោយមក មានខាងសហគមន៍គាត់ទាក់ទងមកកម្មង់ទិញប្រចាំសប្ដាហ៍តែម្ដង»។
សម្រាប់យុវតីរូបនេះ ខ្លួនមានអារម្មណ៍រំភើបបន្ទាប់ពីដឹងថា នំចំណី និងភេសជ្ជៈដែលខ្លួនបានផលិតមានចំណែកក្នុងការលើកកម្ពស់អាហារសុខភាព កាត់បន្ថយការបរិភោគគ្រឿងកំប៉ុងដល់ក្មេងៗនៅ ក្នុងសហគមន៍នោះ។ ជាអាហារសុខភាព ព្រោះយុវតីរូបនេះ និងក្រុមសិស្សានុសិស្សឯទៀតប្រើប្រាស់វត្ថុធាតុដើមច្រើន ហើយកាត់បន្ថយគ្រឿងផ្សំដែលអាចប៉ះពាល់ដល់សុខភាព ដូចជាស្ក ជាដើម។
ទាក់ទិននឹងរឿងនេះដែរ លោក ហ៊ុន ភារី ដែលជាគ្រូបង្គោលបណ្ដុះបណ្ដាលជំនាញផលិតនំ និងភេសជ្ជៈនេះបានឱ្យដឹងថា រយៈពេលប្រហែលជា១ឆ្នាំហើយ ដែលសហគមន៍នៅក្នុងតំបន់ចាប់ផ្ដើមកម្មង់ទិញ ដោយក្នុងមួយសប្ដាហ៍ សហគមន៍មានតម្រូវការទឹកសណ្ដែកប្រមាណពី ៥០ ទៅ ១០០ ដប ដែលការបញ្ជាទិញក្នុងចំនួននេះ គឺដើម្បីឱ្យក្មេងៗដែលកំពុងរៀននៅសាលាអង្គការរបស់សហគមន៍បរិភោគ ក៏ដូចជាបញ្ចៀសពួកគេពីការបរិភោគអាហារមិនល្អសម្រាប់សុខភាព និងការលូតលាស់របស់ពួកគេ។
តាមរយៈការបញ្ជាទិញរបស់សហគមន៍បែបនេះ ក្រុមសិស្សានុសិស្សបានទទួលនូវប្រាក់កម្រៃបន្តិចបន្តួច ដោយមួយផ្នែកនៃប្រាក់ចំណូលត្រូវបានបែងចែកដើម្បីទិញវត្ថុធាតុដើមសម្រាប់ផលិតបន្តទៀត។
លោក ហ៊ុន ភារី បានបន្តឱ្យដឹងទៀតថា៖
«ពីមុនយើងមានសម្ងួតផ្លែឈើមួយចំនួន ប៉ុន្តែដោយសារថ្លៃដើមខ្ពស់ ហើយយើងពិបាករកទីផ្សារផង ទើបយើងឈប់ធ្វើ ហើយងាកមកផ្ដោតលើប្រភេទនំម៉ាហ្វីន និងទឹកសណ្ដែក»។
សម្រាប់តម្លៃលក់ចេញវិញ លោក ហ៊ុន ភារី បានបញ្ជាក់ដែរថា ទឹកសណ្ដែកលក់ក្នុងតម្លៃ ២០០០រៀល ក្នុងមួយដប រីឯនំម៉ាហ្វីនវិញ មួយមានតម្លៃ ៥០០រៀល ហើយក្នុងមួយសប្ដាហ៍អាចធ្វើបានជាង ៥០០នំ។
ក្នុងនាមជាគ្រូបង្គោលដឹកនាំម្នាក់ក្នុងចំណោមគ្រូដឹកនាំ ៤រូប លោក ហ៊ុន ភារី សប្បាយចិត្តដែលឃើញសិស្សានុសិស្សមានជំនាញទន់មួយចាប់តាំងពីថ្នាក់វិទ្យាល័យទៅ ហើយប្រសិនបើពួកគេមិនមានឱកាសបន្តការសិក្សានៅថ្នាក់មហាវិទ្យាល័យទេ យ៉ាងហោចណាស់ពួកគេក៏អាចចាប់ជំនាញនេះទៅជាអាជីពបានដែរ។
ម្យ៉ាងទៀត រាល់ពេលសាលាមានកម្មវិធី ឬមានកិច្ចប្រជុំធំៗ លោក និងគ្រូបង្គោល៣នាក់ទៀត បានដឹកនាំសិស្សឱ្យធ្វើនំ និងទឹកសណ្ដែកក្នុងទ្រង់ទាយធំ ដែលវាមិនត្រឹមតែបានជួយផ្ដល់ប្រាក់កម្រៃដល់សិស្សប៉ុណ្ណោះទេ ប៉ុន្តែវាក៏អាចជួយឱ្យអ្នកបរិភោគមានសុខភាពល្អផងដែរ៕
Account
Security
Favourite Content