ភ្នំពេញ ៖ ធនាគារជាតិនៃកម្ពុជា (NBC) និងក្រុមហ៊ុន Ant International ដែលមានមូលដ្ឋាននៅប្រទេសសិង្ហបុរី ប្រកាសដាក់ឱ្យដំណើរការជាផ្លូវការគម្រោងទូទាត់ឆ្លងដែនតាមឃ្យូអរកូត (QR Code ) តាមរយៈប្រព័ន្ធបាគង និងកម្មវិធីទូទាត់ Alipay+ ដើម្បីជួយសម្រួលដល់ការទូទាត់របស់ភ្ញៀវទេសចរ និងការលក់រាយនៅកម្ពុជាឱ្យកាន់តែងាយស្រួល។

ពិធីសម្ពោធដាក់ឲ្យដំណើរការជាផ្លូវការគម្រោងទូទាត់ឆ្លងដែនតាមឃ្យូអរកូត (QR Code ) រវាងធនាគារជាតិនៃកម្ពុជា និងក្រុមហ៊ុន​ Ant International នេះ ត្រូវបាន​ប្រព្រឹត្ត​ទៅ​នៅ​សណ្ឋាគារសូហ្វីតែល រាជធានីភ្នំពេញ ​នាថ្ងៃ​ទី​១៤ ខែតុលា ឆ្នាំ២០២៤ ក្រោម​អធិបតីភាព​របស់លោកជំទាវបណ្ឌិត ជា សេរី ទេសាភិបាលធនាគារជាតិនៃកម្ពុជា និង លោក Edward Yue អគ្គនាយកក្រុមហ៊ុន Ant international ប្រចាំអាស៊ីអាគ្នេយ៍ អូស្ត្រាលី និងនូវែលសេឡង់។

លោកជំទាវបណ្ឌិត បានថ្លែងថា នេះជាកិច្ចសហប្រតិបត្តិការរវាង Ant International និងធនាគារជាតិនៃកម្ពុជា ដែលនឹងអនុញ្ញាតឲ្យអតិថិជនរបស់ Alipay+ មកពី ៩ ប្រទេស មក scan KHQR នៅកម្ពុជា។ កិច្ចសហប្រតិបត្តិការនេះនឹងជួយសម្រួលភ្ញៀវទេសចរ និងការលក់រាយនៅកម្ពុជាឲ្យកាន់តែងាយស្រួល។ ចំពោះដំណាក់កាលបន្ទាប់ អ្នកប្រើប្រាស់ app Bakong នឹងអាច scan Alipay នៅប្រទេស ចិន និង Alipay+ នៅប្រទេសដទៃដោយងាយស្រួល។ សូមបញ្ជាក់ថា ការប្រើប្រាស់នេះគឺសម្រាប់តែគណនីប្រាក់រៀលតែប៉ុណ្ណោះ។ ដូច្នេះ លោកជំទាវបណ្ឌិត ជា សេរី បានលើកទឹកចិត្តឱ្យអ្នកលក់ទាំងអស់មាន KHQR និងគណនីប្រាក់រៀលដើម្បីទទួលបានផលប្រយោជន៍ទាំងនេះ។

កិច្ចសហការនេះគឺជាព្រឹត្តិការណ៍ដ៏សំខាន់មួយនៅក្នុងកិច្ចខិតខំប្រឹងប្រែងរបស់ធនាគារជាតិនៃកម្ពុជា ដើម្បីជំរុញឌីជីថលូបនីយកម្មនៅទូទាំងប្រទេសកម្ពុជា។ ការដាក់ឱ្យដំណើរការនៃគម្រោងទូទាត់ QR Code ឆ្លងព្រំដែនរវាងបាគង និង Alipay+ នឹងលើកកម្ពស់កិច្ចសហប្រតិបត្តិការហិរញ្ញវត្ថុ ដោយប្រើប្រាស់បច្ចេកវិទ្យា ដើម្បីផ្តល់អត្ថប្រយោជន៍ដល់អ្នកប្រើប្រាស់។

លោកជំទាវបណ្ឌិត ជា សិរី បានថ្លែងបន្តថា កិច្ចសហប្រតិបត្តិការនេះនឹងរួមចំណែកយ៉ាងសំខាន់ដល់ការលើកកម្ពស់សកម្មភាពពាណិជ្ជកម្ម ទេសចរណ៍ និងបរិយាបន្នហិរញ្ញវត្ថុនៅក្នុងប្រទេសកម្ពុជា និងតំបន់។ កម្មវិធីទូរស័ព្ទ ដូចជា Alipay និងដៃគូ Alipay+ ផ្សេងទៀត បានដំណើរការប្រតិបត្តិការរាប់មិនអស់នៅទូទាំងពិភពលោក សម្រួលដល់ដំណើរការទិញ និងធ្វើឱ្យការទិញទំនិញ ម្ហូបអាហារ និងការទិញប្រចាំថ្ងៃទាំងងាយស្រួល និងមានសុវត្ថិភាព។

ការងារអាទិភាពមួយក្នុងចំណោមការងារអាទិភាពសំខាន់ៗរបស់ធនាគារជាតិនៃកម្ពុជា គឺការបន្តពង្រឹង និងធ្វើទំនើបកម្មការទូទាត់ឆ្លងដែននៅក្នុងតំបន់អាស៊ី និងប្រទេសដៃគូ។ រហូតមកដល់ពេលនេះ ធនាគារជាតិនៃកម្ពុជា បានដំណើរការដោយជោគជ័យនូវគម្រោងទូទាត់ឆ្លងដែនជាមួយប្រទេសថៃ វៀតណាម ឡាវ កូរ៉េខាងត្បូង និងម៉ាឡេស៊ីជាដើម។

ក្រុមហ៊ុន Ant International ដែលមានទីស្នាក់ការកណ្តាលនៅប្រទេសសិង្ហបុរី គឺជាក្រុមហ៊ុនដ៏លេចធ្លោមួយ ផ្តល់នូវដំណោះស្រាយហិរញ្ញវត្ថុប្រកបដោយភាពច្នៃប្រឌិត។ ផលិតផលរបស់ខ្លួន AliPay+ (AliPay Plus) ត្រូវបានរៀបចំឡើង ដើម្បីជួយសម្រួលប្រតិបត្តិការសម្រាប់ដៃគូទូទាត់អន្តរជាតិជាង ១០ នៅកម្ពុជា រួមទាំង AliPay ពីប្រទេសចិន រួមជាមួយនឹងក្រុមហ៊ុនផ្សេងទៀតដូចជា Touch ‘n Go ពីម៉ាឡេស៊ី Kakao Pay ពីកូរ៉េខាងត្បូង និង OCBC ពីសិង្ហបុរី៕