សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពពី Investopedia បានលើកឡើងថា តម្លៃមាសបានបន្តឡើងថ្លៃដល់កម្រិតខ្ពស់គួរឲ្យកត់សម្គាល់នៅដើមឆ្នាំ២០២៥ ខណៈពេលដែលអ្នកវិភាគបានព្យាករណ៍ថា អាចនឹងឡើងថ្លៃដល់ ៣ ០០០ ដុល្លារក្នុងមួយអោន ឬស្មើនឹងជាង ៣៦០០ដុល្លារក្នុងមួយតម្លឹងនាពេលឆាប់ៗនេះ។
ថ្មីៗនេះ តម្លៃមាសឡើងថ្លៃដល់កម្រិតខ្ពស់រហូតដល់ ២ ៩៥៤ ដុល្លារក្នុងមួយអោន (នៅលើទីផ្សារកម្ពុជា មាសមានតម្លៃ ៣៥៣ ដុល្លារក្នុងមួយជី និង ៣ ៥៣៩ ដុល្លារក្នុងមួយតម្លឹង)។ ក្នុងប៉ុន្មានសប្តាហ៍ថ្មីៗនេះ តម្លៃមាសបានឡើងដល់កម្រិតខ្ពស់ម្តងហើយម្តងទៀត ដោយបានកើនឡើងប្រហែល ១៣ ភាគរយរួចទៅហើយនៅឆ្នាំនេះ។ ជាទូទៅ មាសត្រូវបានចាត់ទុកថាជាទ្រព្យសម្បត្តិដែលមានសុវត្ថិភាពក្នុងអំឡុងពេលដែលសេដ្ឋកិច្ចមានភាពមិនច្បាស់លាស់។ ឥឡូវនេះ តម្រូវការមាសពីអ្នកវិនិយោគកំពុងកើនឡើង ដោយសារមានការព្រួយបារម្ភអំពីទិសដៅនៃសេដ្ឋកិច្ចពិភពលោក និងផលប៉ះពាល់នៃពន្ធថ្មីរបស់សហរដ្ឋអាម៉េរិក។
ក្រុមហ៊ុនហិរញ្ញវត្ថុ និងអចលទ្រព្យនៅ Wall Street ជាច្រើនបានបង្កើនការព្យាករណ៍ថា តម្លៃមាសអាចនឹងឡើងថ្លៃដល់ ៣ ០០០ ដុល្លារក្នុងមួយអោន ឬខ្ពស់ជាងនេះ។ ក្រុមហ៊ុន Goldman Sachs ព្យាករណ៍ថា តម្លៃមាសអាចនឹងឡើងថ្លៃដល់ ៣ ១០០ ដុល្លារក្នុងមួយអោននៅចុងឆ្នាំ២០២៥ ដោយលើកឡើងពីតម្រូវការខ្ពស់របស់ធនាគារកណ្តាលសម្រាប់មាស ក៏ដូចជាតម្រូវការរបស់អ្នកវិនិយោគសម្រាប់ទ្រព្យសកម្មដែលមានសុវត្ថិភាព។ លើសពីនេះ អ្នកវិភាគនៅ ING ក៏បានព្យាករណ៍ដែរថា តម្លៃមាសអាចនឹងឡើងថ្លៃដល់ ៣ ០០០ ដុល្លារក្នុងមួយអោននៅត្រីមាសទីមួយឆ្នាំ២០២៥ នេះ។ យ៉ាងណាមិញ មិនមែនគ្រប់ក្រុមហ៊ុនទាំងអស់មានការព្យាករណ៍វិជ្ជមាន ឬ សុទិដ្ឋិនិយមដូចគ្នានោះទេ។ ទោះបីជានិន្នាការមាសកំពុងឡើងថ្លៃក្នុងពេលបច្ចុប្បន្នក៏ពិតមែន ប៉ុន្តែក្រុមហ៊ុន Morgan Stanley មើលឃើញថា តម្លៃមាសអាចធ្លាក់ចុះដល់ ២ ៧០០ ដុល្លារក្នុងមួយអោននៅត្រីមាសទីបួន ដោយលើកឡើងថា កិច្ចព្រមព្រៀងសន្តិភាពរុស្ស៊ី-អ៊ុយក្រែនអាចមានសក្ដានុពលបង្អាក់តម្រូវការមាសរបស់ធនាគារកណ្តាល។
ទោះជាយ៉ាងនេះក្តី ភាគច្រើនបានព្យាករណ៍ថា តម្លៃនឹងបន្តឡើងថ្លៃ ខណៈដែលការដាក់ពន្ធរបស់ Trump លើទំនិញកាណាដា ម៉ិកស៊ិក និងចិន កំពុងធ្វើឱ្យមានការព្រួយបារម្ភអំពីសេដ្ឋកិច្ចពិភពលោក។ ជាលទ្ធផល វិនិយោគិនមើលឃើញពីតម្លៃមាសកាន់តែច្រើន។ មិនត្រឹមតែប៉ុណ្ណោះ គេមើលឃើញថា ការធ្លាក់ចុះសេដ្ឋកិច្ចនៅអឺរ៉ុប និងចិន ដែលបណ្តាលមកពីការដាក់ពន្ធសងសឹកគ្នាជាមួយនឹងអាម៉េរិកនឹងជំរុញមាសឱ្យកាន់តែខ្ពស់។ អ្នកវិភាគ ING យល់ស្របលើកត្តានេះ ដោយកត់សម្គាល់ថា ភាពមិនប្រាកដប្រជានៃពាណិជ្ជកម្ម និងពន្ធនឹងបន្តជំរុញមាសឲ្យកាន់តែឡើងថ្លៃ៕
Account
Security
Favourite Content