យោងតាមការិយាល័យស្ថិតិជាតិក្នុងឆ្នាំ២០២០ បានឱ្យដឹងថា ប្រជាជនកម្ពុជាមានចំនួន ១៦.៤លាននាក់ ដែលស្មើនឹង ៣.៥៨ លានគ្រួសារ។ ចំនួននេះដែរ បានកើនឡើងក្នុងអាត្រា ១.៦៨% ប្រើធៀបទៅនឹងឆ្នាំមុនបន្ទាប់។ ដោយឡែក នៅក្នុងអំឡុងពេលនៃពិធីបុណ្យភ្ជុំបិណ្ឌឆ្នាំ២០២៣នេះ ប្រសិនបើក្នុងមួយគ្រួសារចំណាយថវិកាអស់ជាមធ្យមត្រឹមតែ ៥ម៉ឺនរៀលទៅលើការទិញផលិតផលនានាសម្រាប់រៀបចំជាទេយ្យវត្ថុ ឬចម្អិនជាចង្ហាន់យកទៅប្រគេនព្រះសង្ឃដែលគង់នៅតាមវត្តអារាម ក៏ដូចជាចែកជូនញាតិមិត្ត ឪពុកម្ដាយ នោះគេនឹងឃើញពីទំហំនៃថវិកាសរុបដែលចំណាយមានរហូតដល់ប្រមាណ ៤០លានដុល្លារឯណោះ។

ក្នុងន័យសេដ្ឋកិច្ច ប្រសិនបើប្រជាជនប្រើប្រាស់ថវិកាទាំងអស់ដូចបានធ្វើការប៉ាន់ស្មានខាងលើនេះ ទៅលើការទិញផលិតផលក្នុងស្រុក ប្រាក់ទាំង ៤០លានដុល្លារនេះនឹងមានចរន្ដនៅក្នុងសេដ្ឋកិច្ចជាតិ ដែលវាជាការចំណេញក្នុងទំហំដ៏ធំមួយ។ ប៉ុន្តែ បើពលរដ្ឋប្រើប្រាស់ថវិកាទាំងនេះ ដើម្បីទិញផលិតផលនាំចូលពីខាងក្រៅមកវិញ វានឹងក្លាយជាការខាតបង់ដល់សេដ្ឋកិច្ចជាតិ។

ឯកឧត្តម បណ្ឌិត សួង ណយ អគ្គលេខាធិការរងនៃចលនាភូមិមួយផលិតផលមួយ ដែលតែងតែធ្វើសកម្មភាពជំរុញ និងបំផុសបំផុលការគាំទ្រផលិតផលក្នុងស្រុកនោះបានឱ្យដឹងថា នៅក្នុងពិធីបុណ្យប្រពៃណី ឬពិធីបុណ្យជាតិនានា គឺជាឱកាសដែលប្រជាពលរដ្ឋចាយលុយ ប៉ុន្តែបើសិនជាពួកគេចាយមិនត្រូវអាចនឹងនាំឱ្យខាតបង់សេដ្ឋកិច្ច។

ឯកឧត្តម បណ្ឌិតបន្តលើកឡើងថា ៖

«ជានិច្ចជាកាល ខ្ញុំតែងតែបំផុសបំផុលឱ្យពលរដ្ឋយើងជួយគាំទ្រផលិតផលខ្មែរ ពិសេសនៅក្នុងអំឡុងពេលដែលមានពិធីបុណ្យនានាតែម្ដង»។

ឯកឧត្តម បណ្ឌិតបានបន្តគូសបញ្ជាក់ទៀតថា ប្រជាពលរដ្ឋអាចចូលរួមក្នុងសេដ្ឋកិច្ចជាតិតាមរយៈការទិញសម្ភារៈ ក៏ដូចជាផលិតផលក្នុងស្រុករៀបចំធ្វើជាទេយ្យទាន ឬទេយ្យវត្ថុ សម្រាប់ប្រគេនដល់ព្រះសង្ឃ និងការជូនជាអំណោយដល់ឪពុកម្ដាយ និងញាតិមិត្តជាដើម។

ឯកឧត្តមសង្កត់ធ្ងន់ថា ៖

«អ្វីដែលប្រជាជនមិនគួរភ្លេចនោះគឺ ការទិញកសិផលខ្មែរសម្រាប់​ធ្វើម្ហូបទៅវត្ត ព្រោះបើរាប់តាំងពីដាក់បិណ្ឌគឺមានរយៈពេលដល់ទៅ ១៥ថ្ងៃឯណោះ អីចឹងបើសិនយើងទិញផលិតផលយើងដើម្បីធ្វើម្ហូប គឺស្មើនឹងការជួយគាំទ្រជាតិយើងដែរ។ ម្យ៉ាងទៀត ផលិតផលកសិផលរបស់ខ្មែរយើងបច្ចុប្បន្ន ច្រើនតែជាផលិតផលសេរីរាង្គដែលមិនប៉ះពាល់ដល់សុខភាព ខុសពីផលិតផលនាំចូលដែលយើងមិនបានដឹងពីប្រភពច្បាស់លាស់»។

ជាចុងក្រោយ ឯកឧត្តម បណ្ឌិត ក៏នៅតែបន្តអំពាវនាវឱ្យប្រជាជនឱ្យចូលរួមបំផុសបំផុលចលនានេះឱ្យកាន់តែខ្លាំងក្លាឡើង តាមរយៈការផ្សព្វផ្សាយលើប្រព័ន្ធបណ្ដាញសង្គម ធ្វើយ៉ាងណាឱ្យផលិតផល ក្នុងស្រុកយើងរីកចម្រើន និងអាចប្រកួតប្រជែងជាមួយផលិតផលខាងក្រៅ៕