ភ្នំពេញ ៖ តម្លៃផលិតផល​ម្រេច​កំពត​បានឡើង​ថ្លៃ​ជា​បន្ត​បន្ទាប់ក្នុង​រយៈពេល​ប៉ុន្មានឆ្នាំចុងក្រោយនេះ ដែលធ្វើ​ឱ្យកសិករ​​ដាំដុះ​ម្រេច​ក្នុង​ខេត្តកំពតទទួលបានការ​សាទរយ៉ាងខ្លាំង ប៉ុន្តែទិន្នផល​សរុប​របស់ម្រេច​កំពតក្នុង​រយៈពេល ២-៣ ឆ្នាំចុងក្រោយនេះ មានការ​ធ្លាក់ចុះមិនមានកំណើន​នោះទេបើទោះបីជាតម្លៃ​ម្រេច​ហក់ឡើង​ក្ដី ។

បើតាមលោក ​ស៊ីម សុទុម ប្រធានសមាគម​លើកកម្ពស់​ម្រេច​ខេត្តកំពតបានប្រាប់​ AMS Economy នៅព្រឹកថ្ងៃទី​១៤ ខែតុលា ឆ្នាំ២០២៥ តាមទូរសព្ទ​ឱ្យដឹងថា ម្រេច​ខេត្តកំពត​​​មាន​ទីផ្សារ​យូរមកហើយ ហើយតម្លៃម្រេច​ក៏បានហក់ឡើង​ជា​បន្តបន្ទាប់ដែរ ដោយម្រេច​ខ្មៅ​អាចលក់​បានក្នុងតម្លៃ ១៨​ដុល្លារ​អាម៉េរិក​ក្នុងមួយគីឡូក្រាម ម្រេច​ក្រហម​លក់បាន​ក្នុងតម្លៃ ២៩​ដុល្លារអាម៉េរិក​ និង​ម្រេច​ស អាច​លក់​ក្នុងតម្លៃ៣១ដុល្លារ​អាម៉េរិកក្នុងមួយគីឡូក្រាម ។​

លោក​បន្តថា ថ្វីត្បិតតែតម្លៃម្រេច​បានហក់​ឡើង​មួយកម្រិតទៀត​ក្តី ប៉ុន្តែការ​ដាំដុះ​បន្ថែម​ក៏មិនមានច្រើន ហើយទិន្នផលក៏មិនកើន ផ្ទុយទៅវិញ មានតែធ្លាក់ចុះ ដោយសារកត្តាអាកាសធាតុ​ ។

លោកថា​​ ៖

« ម្រេច​កំពត ខុសពីម្រេចនៅតំបន់​ផ្សេង​ ហើយបើសិនជា​បងប្អូនកសិករចង់ផលិ​តម្រេចកំពត​ដែលអាច​លក់​បាន​ក្នុងតម្លៃខ្ពស់នេះ ពួកគាត់​ត្រូវ​គោរព​តាមស្តង់ដារ​តម្រូវដែលមានភាពពិបាក​ខ្លាំង ដូចជា​មិនត្រូវ​ថ្នាំគ្រប់ប្រភេទ​នៅក្នុង​ចម្ការម្រេច ហើយក៏មិនត្រូវ​ដាំដំណាំផ្សេង​លាយឡំនៅក្នុងចម្ការ​ម្រេច​តែមួយដែរ ។​ ​ម្រេច​កំពត ដែលអាច​លក់បានតម្លៃខ្ពស់ជាងម្រេច​សរីរាង្គ​​ ដូច្នេះ ការ​ថែទាំ​មានភាពពិបាក​ខ្លាំង ដោយកសិករត្រូវ​នៅចាំមើលថែចម្កា​រម្រេចជា​ប្រចាំ ដូច្នេះហើយ ទើប​ការ​បង្កបង្កើនផល​ម្រេចខេត្តកំពតមិនទទួល​បានផលច្រើន​ដូច​ម្រេច​នៅតំបន់​ផ្សេង»។​

លោកបញ្ជាក់ថា បច្ចុប្បន្ននេះ ផ្ទៃដីដាំដំណាំម្រេច​កំពតមានប្រមាណ ​២២៧ ហិកតា ដោយមានកសិករ​ដាំដុះ​ប្រមាណជាង​ ៣៤០គ្រួសារ និងអាច​ទទួល​ទិន្នផល​ក្នុងរង្វង់ប្រមាណ ១៣០​តោន ឬអាច​លើស​ ឬនៅក្រោមនេះ​អាស្រ័យលើ​អាកាសធាតុ​អំណោល ។ ជាក់ស្ដែង​កាលពីឆ្នាំកន្លងទៅ ទិន្នផលបានធ្លាក់ចុះជាងនេះ ដោយសារតែអាកាសធាតុក្ដៅខ្លាំង ហើយឆ្នាំ២០២៥ និង២០២៦ ក៏មិនរំពឹងថា​អាចទទួល​បានទិន្នផលខ្ពស់ជា​ងនេះដែរ ។

លោក អូន វិបុល ផលិត​ករ​ម្រេច​ខេត្តកំពត​ម្នាក់​បានប្រាប់ឱ្យដឹងថា បច្ចុប្បន្ន​នេះ ម្រេច​កំពត​ហាក់មានហាងឆេង​ខ្ពស់ ទាំង​ក្រុមហ៊ុនមកទាក់ទងទិញ​តាមសមាគមក៏ច្រើន ខាងក្រុមហ៊ុន​ខាងក្រៅ​មករកទិញផ្ទាល់​ៗក៏ច្រើន​ ហើយកសិករ​ខ្លះដែល​ត្រូវការ​លុយ​បន្ទាន់​ៗ អាច​លក់​ឱ្យក្រុមហ៊ុនដែលមកទិញខាងក្រៅ តែតម្លៃរាង​ទាបជា​ង​ការលក់តាមរយៈសមាគម​ ។

លោក​បន្តថា គ្រប់​ចម្ការម្រេច​នៅក្នុងខេត្ត​កំពត​មិនមែន​សុទ្ធតែចាត់ចូលជា​ម្រេច​កំពត​ ឬអ្នកផលិតម្រេច​កំពត ( GI ) នោះទេ ពីព្រោះថា​ការ​ផលិតម្រេចកំពតឱ្យមានការទទួល​ស្គាល់ពី​សមាគម ឬក្រុមហ៊ុន​នាំចេញ ត្រូវ​គោរព​តាមស្តង់ដារ​របស់គេ ដូចជា ​មិនត្រូវ​ដាំដំណាំផ្គួប​ផ្សំនៅក្នុង​ចម្ការ​ម្រេច ដូចជា​ម្ទេស ល្ពៅ ពោត​ ឬដំណាំផ្សេង ។ ក្នុងន័យនេះ​ ចម្កា​រម្រេច​ ត្រូវមានតែម្រេច​មួយ​មុខ​ប៉ុណ្ណោះ ទើប​គុណភាពម្រេច​ល្អ ឈ្ងុយ ហឹរ និងមានការទទួល​ស្គាល់ពីអន្តរជាតិ ។

លោក​ វិបុល បាន​មើលឃើញថា កសិករដែល​ដាំដុះម្រេច​នៅខេត្ត​កំពត ចាប់ផ្ដើម​មានជីវភាពធូរធា ​និងបានពង្រីកការ​ដាំដុះជា​បន្ត​បន្ទាប់ក្នុងពេល​ម្រេច​បន្ត​ឡើងថ្លៃ ប៉ុន្តែ​ចង់បានម្រេច​ដែលអាចលក់​បានថ្លៃ​ត្រូវតែមានស្តង់ដារ​ដាំដុះស្របតាម​​តម្រូវរបស់​ក្រុមហ៊ុន​នាំចេញ ហើយក៏ធ្វើឱ្យកេរ្តិ៍ឈ្មោះម្រេច​កំពត​កាន់តែល្បីលើ​ឆាកអន្តរជាតិ ៕