សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សមាគមកាហ្វេកម្ពុជាដែលទើបបង្កើតឡើងកាលពីថ្ងៃទី១៩ ខែមិថុនា ឆ្នាំ២០២៥ បានប្ដេជ្ញាក្នុងការបង្កើនការផលិតកាហ្វេដើម្បីផ្គត់ផ្គង់ទីផ្សារក្នុងស្រុក ខណៈបច្ចុប្បន្នការនាំចូលកាហ្វេពីខាងក្រៅប្រទេសមកផ្គត់ផ្គង់ក្នុងស្រុកមានរហូតដល់៩៥ភាគរយឯណោះ ។
នៅក្នុងជំនួបជាមួយឯកឧត្តម ធន់ វឌ្ឍនា អនុប្រធានទី២ ព្រឺទ្ធសភានៃព្រះរាជាណាចក្រកម្ពុជា កាលពីថ្ងៃទី០៧ ខែកក្កដា ឆ្នាំ២០២៥ លោក ឌុក ពិសិដ្ឋ ប្រធានសមាគមកាហ្វេកម្ពុជា បានមានប្រសាសន៍ថា គោលដៅសំខាន់ៗមួយចំនួននៃការបង្កើតសមាគមកាហ្វេកម្ពុជានេះឡើង ដើម្បីចងក្រងសមាជិកដែលជាអ្នកប្រកបអាជីវកម្ម និងអ្នកពាក់ព័ន្ធនានាក្នុងវិស័យកសិកម្មកាហ្វេ ជំរុញឱ្យមានការបង្កើតថ្មីក្នុងការដាំដុះកាហ្វេ កែច្នៃ និងការស្វែងរកទីផ្សារ និងរៀបចំជាបណ្ដុំដែលជួយជំរុញឱ្យកាហ្វេនៅប្រទេសកម្ពុជាមានវត្តមាននៅលើពិភពលោក ។
លោកបន្តថា ទីផ្សារកាហ្វេនៅក្នុងប្រទេសកម្ពុជាមានការរីកចម្រើនកាន់តែខ្លាំង ប៉ុន្តែការផ្គត់ផ្គង់កាហ្វេ ការដាំដុះក្នុងស្រុកមានតិចតួចនៅឡើយ ដោយបច្ចុប្បន្ននេះ គ្រាប់កាហ្វេពីប្រភពក្នុងស្រុកមានប្រមាណតែ៥ភាគរយប៉ុណ្ណោះ ដោយ៩៥ភាគរយជាកាហ្វេនាំចូល ។ ការនាំចូលកាហ្វេមានប្រភពពីវៀតណាម និងឡាវច្រើនជាងគេ ពីព្រោះប្រទេសទាំងពីរនេះចាត់ទុកជាប្រទេសដែលមានការផលិតកាហ្វេច្រើនជាងគេនៅលើពិភពលោក ។ ជាក់ស្ដែងក្នុងរយៈពេលត្រឹមតែប៉ុន្មានខែដើមឆ្នាំនេះ វៀតណាមបាននាំចេញកាហ្វេមានទំហំទឹកប្រាក់រហូតដល់ជិត៤ពាន់លានដុល្លារអាមេរិករួចទៅហើយ ហើយទីតាំងដែលវៀតណាមអាចដាំកាហ្វេនោះ ក៏ស្ថិតនៅខេត្តជាប់នឹងព្រំប្រទល់ប្រទេសកម្ពុជាផងដែរ ដូច្នេះ កម្ពុជាក៏មានសក្ដានុពលខ្ពស់លើដំណាំកាហ្វេដែរ ។
ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភានៃព្រះរាជាណាចក្រកម្ពុជាបានមានប្រសាសន៍ឱ្យដឹងផងដែរថា សមាគមកាហ្វេកម្ពុជា គឺជាការបើកទំព័រថ្មីមួយដល់វិស័យឧស្សាហកម្មកាហ្វេកម្ពុជា ដែលនឹងឈានទៅផ្លាស់ប្តូរពីប្រទេសនាំចូលគ្រាប់កាហ្វេទៅជាប្រទេសនាំចេញ និងផ្គត់ផ្គង់កាហ្វេវិញម្តង ។ ឯកឧត្តមបណ្ឌិត បានផ្តល់ជាទស្សនវិស័យដល់សមាគមកាហ្វេ ត្រូវធ្វើយ៉ាងណាពង្រឹងផលិតផលខ្មែរតាមរយៈគុណភាព មានតម្លៃសមរម្យ និងត្រូវជំរុញការដាំដុះ និងការចែកចាយ។
ឯកឧត្តមបណ្ឌិត ក៏បានលើកឡើងពីនិន្នាការទីផ្សារកាហ្វេពិភពលោក ដោយបង្ហាញពីការកើនឡើងនៃតម្រូវការកាហ្វេពិសេស ដែលកម្ពុជាអាចទាញយកបាន។ រាជរដ្ឋាភិបាល តែងជួយកសិករ ក៏ដូចជាសហគ្រិនខ្មែរ តាមរយៈគោលនយោបាយគាំទ្រ និងការសម្រួលហេដ្ឋារចនាសម្ព័ន្ធនានា។
គួរបញ្ជាក់ថា ដើម្បីគាំទ្រ និងជំរុញការអភិវឌ្ឍការផលិតកាហ្វេកម្ពុជាបន្ថែម សមាគមកាហ្វេកម្ពុជាបានចុះអនុស្សរណៈយោគយល់ជាមួយក្រុមហ៊ុន អង្គរហ្គ្រីន ដោយក្រុមហ៊ុន អង្គរហ្គ្រីននឹងលក់ជីកសិកម្ម ថ្នាំកសិកម្ម និងផលិតផលផ្សេងទៀតដល់សមាជិកនៃសមាគមកាហ្វេកម្ពុជាក្នុងតម្លៃទាប ធ្វើយ៉ាងណាដើម្បីចូលរួមជួយដល់កសិករម្ចាស់ចម្ការកាហ្វេបង្កើនការដាំដុះដំណាំកាហ្វេឱ្យបានច្រើន ៕
Account
Security
Favourite Content